Te fa’atura i te mau mea mo’a

’Ei pipi nā Iesu Mesia, te tītau-manihini-hia nei tātou ’ia fa’atupu i te hōro’a o te fa’atura i roto i tō tātou orara’a nō te fāri’i i te hō’ē tā’aira’a hōhonu a’e ’e te Atua ’e Tāna Tamaiti o Iesu Mesia, ma te ha’apūai ato’a i tō tātou huru pae vārua. ’Āhiri ē ’ua rahi a’e teie mau mana’o i roto i tō tātou māfatu, e rahi ato’a atu te ’oa’oa ’e te ’ārearea i roto i tō tātou orara’a, ’e e iti mai te vāhi nō te ’oto ’e te pe’ape’a […]

Te vahi pe’ape’a rā, te ora nei tātou i roto i te hō’ē ao i reira te fa’atura i te mau mea mo’a e riro noa ai ’ei mea mātau-’ore-hia […]

[…] Te fa’atura ’ore i te mau mea mo’a, e ha’amaita’i te reira i te mau ’opuara’a a te ’enemi nā roto i te ha’afifira’a i tā tātou mau rāve’a heheura’a, tei riro ’ei mea faufa’a roa nō tō tātou orara’a i te pae vārua i tō tātou nei ’anotau […]

E tō’u mau taea’e ’e tuahine, te fa’atura i te mea mo’a e fa’atupu ïa i te māuruuru mau, e fa’arahi i te ’oa’oa mau, e arata’i i tō tātou mau ferurira’a i te heheura’a, ’e e hōro’a mai i te ’oa’oa rahi a’e i roto i tō tātou orara’a. E tu’u te reira i tō tātou ’āvae i ni’a i te repo mo’a ’e e fa’ateitei i tō tātou ’ā’au i ni’a i te Atua ra.

Tē fa’a’ite pāpū nei au ia ’outou ē, ’a tāmata ai tātou i te fa’aō atu i teie huru maita’i i roto i tō tātou orara’a i te mau mahana ato’a, e nehenehe tā tātou e fa’arahi i tō tātou ha’eha’a, e fa’arahi i tō tātou ite i te hina’aro ’o te Atua nō tātou, ’e e ha’apūai i tō tātou ti’aturi i roto i te mau fafaura’a nō te mau fafaura’a tā tātou i rave e te Fatu. Tē fa’a’ite pāpū nei au ē, ’a fāri’i ai tātou i teie hōro’ara’a nō te fa’atura i te mau mea mo’a, i ni’a ānei i te mou’a o te fare o te Fatu, i roto ānei i te hō’ē fare purera’a, e ’aore rā i roto i tō tātou iho fare, e fa’a’īhia tātou i te maere ’e te fa’ahiahia ’a ’āmui atu ai tātou i te here fāito ’ore o tō tātou Metua i te Ao ra ’e o Iesu Mesia.