Tuha’a purera’a nō te po’ipo’i mahana mā’a
I mua noa i tō tātou mata
Hu’a parau
’Ua māuruuru rahi tātou tei ’ō nei tātou i ni’a i te fenua nei ’a tupu rahi ai te ’Ēkālesia i te pae o te nūmera ’e te fa’aururura’a, hau roa atu rā, tei roto i te ’ā’au ’e i te orara’a o tōna mau melo.
I teie mahana, e 367 hiero tā te ’Ēkālesia, tei te mau tuha’a rau nō te ferurira’a i te hōho’a, te patura’a ’e te terera’a. Te mau taea’e ’e te mau tuahine, e ha’avitiviti tātou i tō tātou mo’ara’a ’ia ora ti’a mā tātou nō te hiero, ’ia ha’amori tātou i roto i te fare o te Fatu ’e ’ia rave tātou i te mau fafaura’a ’e te Atua nō tātou iho ’e nā ni’a i te i’oa o tō tātou hui tupuna i te tahi atu pae o te pāruru.
Tē ’ite nei tātou i te Fatu i te ha’avitivitira’a i tāna ’ohipa i roto i te mau misiōni. Hau atu i te nūmera, tē fa’atae nei te vārua nō te ha’aputuputura’a i te mau vairua ia Iesu Mesia ra ’e i tāna ’evanelia.
Tē ’ite nei tātou i te Fatu i te ha’avitivitira’a i te mau rāve’a au nō te ha’api’ira’a nō tō tātou mau melo, ’e rātou e ’ere nō tā tātou fa’aro’o, ’ati a’e te ao nei.
I teienei, ’ua hau i te 800 000 pīahi ’ati a’e te ao nei tei tāpa’o ia rātou i te séminaire ’e i te institut, te tāpa’ora’a i’oa teitei roa a’e i roto i te tua’ā’ai o te ’Ēkālesia.
Te tahi fa’ahou vāhi e fa’a’ite nei i te tupura’a e rahi noa atu ra nō te ha’api’ira’a i roto i te ’Ēkālesia, ’o BYU–Pathway Worldwide ïa. Te fa’aotira’a i teie mau piha ha’api’ira’a, e matara mai ïa te tōro’a ’ohipa, ’e te matarara’a te tōro’a ’ohipa, e orara’a maita’i a’e ïa nō te ’utuāfare, ’e te fāna’ora’a rahi atu ā nō te tāvini i te Fatu.
’Ua ta’a iā’u ē, noa atu ā teie parau ’āpī maita’i nō te ’evanelia, tē vai nei te feiā e tāfifi ra, ’o tē fa’aruru nei i te fa’aro’o tāpetepete, i te fē’a’ara’a ’e i te mau uira’a e au ē ’aita e pāhonora’a. Te mau taea’e ’e te mau tuahine, ’o Iesu Mesia te pāhonora’a. ’A ha’amata nā ni’a iāna. ’A ’imi i tōna rima i roto i tō ’outou orara’a. ’A fa’aro’o iāna.
’Ia ’ite ’outou ē, tē hāro’aro’a nei ’oia.