’O ’oe te Mesia

The Things Which He Prayed Cannot Be Written, nā Casey Childs

I te taime tei roto tā māua tamaiti ’o Eli i te piha ha’api’ira’a fāito maha, ’ua fa’atupu tāna piha i te hō’ē fa’aterera’a hau ha’avare, i reira ’oia i te mā’itira’ahia e tōna mau hoa o te piha ’ia riro ’ei ha’avā. I te hō’ē mahana, ’ua haere mai te hō’ē ha’avā mana nō te mataeina piti nō Utaha e fārerei ia rātou, ’ua fa’a’ō’omo ia Eli i tōna ’ahu ha’avā ’e ’ua fa’ahōreo atu i tāna piha. ’Ua fa’a’ara te reira i roto i te vairua fa’ahiahia ’āpī ’o Eli i te hō’ē hia’ai nō te ha’api’ira’a i te pae o te ture ’e te ’Īriti ture iho ’o Iesu Mesia.

I muri mai e rave rahi matahiti nō te tauto’ora’a tāmau, ’ua fa’ari’i Eli i te hō’ē anira’a nō te hō’ē uiuira’a ’e te hō’ē o tāna mau mā’itira’a nō te ha’api’ira’a tōro’a o te ture. ’Ua parau ’oia, « […] Te uira’a hōpe’a ’oia ho’i, ‘nō hea mai tō ’oe mana’o itoito ?’ […] ’Ua ha’apāpū atu vau ’ahiri te ta’ata ato’a e fa’atura nei i te mau ha’api’ira’a a Iesu Mesia, i roto i te A’ora’a i ni’a i te Mou’a, e riro te ao nei ’ei vāhi maita’i a’e ’e te hau ». I muri iho ’ua hope te uiuira’a, ’e ’ua parau ’oia iāna iho, « ’o te hōpe’ara’a ihoā ïa o tō’u mau moemoeā tamari’i. ’Aita e ta’ata i roto i te ha’api’ira’a tuatoru ti’amā e hina’aro e fa’aro’o nō ni’a ia Iesu Mesia ».

Piti hepetoma i muri mai, ’ua fa’ari’ihia Eli i te fare ha’api’ira’a. Hou te fa’aōra’a, ’ua haere atu mātou e māta’ita’i i te fare ha’api’ira’a tōro’a […] Ma te fa’ahiahia, ’a haere ai mātou nā roto i te piha vaira’a buka hanahana rahi ’e te mau āroa nehenehe, ’ua ’ite atu mātou i ni’a i te mau reva ’e te mau ’ōfa’i i nana’ohia te mau taipe nō roto mai i te A’ora’a i ni’a i te Mou’a.

Te A’ora’a i ni’a i te Mou’a ’o te a’ora’a fa’ahiahia roa a’e tei ’ore ā i fa’ahitihia a’enei, e pionie i roto i tāna mau ha’api’ira’a. ’Aita atu e a’ora’a e nehenehe e tauturu ia tātou ’ia hāro’aro’a maita’i a’e i te nātura o Iesu Mesia, tōna mau huru hanahana, ’e tā tātou fā hōpe’a ’ia riro mai, mai iāna te huru […]

E ti’a ia tātou e pūhi i te māramarama o Iesu Mesia i roto i te mau poro ato’a o tō tātou orara’a […]