Sau, Mulimuli Mai ia te A’u
Se Vaaiga Fou i le Salamo
O le salamo e sili atu nai lo le na o le faanoanoa mo au agasala—o le avea atili e faapei o Iesu Keriso.
I Le Ekalesia a Iesu Keriso o le Au Paia o Aso e Gata Ai, tatou te talanoa ai e uiga i le salamo—e faatele. Aiseā?
Tatou te faia lenei mea aua o le salamo o se tasi lea o mataupu faavae autu o le talalelei a Iesu Keriso (tagai i le Mataupu Faavae o le Faatuatua 1:4). E le na o se mea manaia e fai po o se auala e “faagaloina” ai a tatou agasala (tagai i le Mataupu Faavae ma Feagaiga 58:42). E matuai taua lava i lo tatou avea atili e faapei o le Faaola ma ia i ai se aso e nonofo faatasi ai ma le Tama Faalelagi ma o tatou aiga e faavavau.
O le salamo o se “suiga o le mafaufau ma le loto lea e aumaia ai se amio fou i le Atua, o ia lava, ma le olaga lautele.” O lea la, o le uiga o le salamo o le fesoasoani lea ia i tatou e sui ma vaai i le Atua, i tatou lava, ma le olaga faaletino i se auala e ese mai ai, ma sili atu. Ae pe faapefea ona tatou faia o lena mea?
Liliu atu ia Keriso
Na aoao mai Elder Dale G. Renlund o le Korama a Aposetolo e Toasefululua e faapea, o le upu Suetena mo le “salamo” o le omvänd, o lona uiga moni lava o le “liliu.” Na ia saunoa mai, “O le salamo moni e tatau ona aofia ai le faatuatua i le Alii o Iesu Keriso, le faatuatua e mafai ona Ia suia i tatou, le faatuatua e mafai ona Ia faamagalo ai i tatou, ma le faatuatua o le a Ia fesoasoani mai ia i tatou ia aloese mai isi mea sese. O lenei ituaiga o faatuatua e aoga ai Lana Togiola i o tatou olaga.”
O le salamo e le na o le liliu ese mai le agasala ae o se liliu atoatoa, fuafuaina, ma le faasaga atoa atu ia Iesu Keriso. Mafaufau i ai i le ala lenei: Afai o loo e taumafai e savali atu i se tasi e talanoa ma i latou, pe e te savali agai i tua? Pe e te oo atu ia i latou e ala i le faase’ese’e atu iai? O auala na, o ni auala faigata e feiloai ai i se tasi. Afai e te lei liliu atoatoa atu i le mea o le a e alu i ai (po o ai o le a e alu i ai), e faigofie lava ona e alu ese mai le ala. O le aotelega, e saogalemu le faapea atu, o le a faigofie ma sili atu le lelei o le talanoaga pe a e faalatalata atu i le tagata a o faafesagai ma i latou.
E faapena foi le salamo. E talia ma fiafia le Faaola i a tatou taumafaiga e salamo, ae e na o le pau le taimi e aoga ai pe a taulai atu ia te Ia. O le tele o lo tatou faatinoina o le faatuatua ia Iesu Keriso, iloa a tatou mea sese, faatoese atu mo na mea, ma taumafai e faaleleia, o le tele foi lena o lo tatou avea faapei o Ia.
O Le Valaau a le Faaola ia i Tatou
Vaai faalemafaufau i le fiafia o le Faaola i le vaai atu ia te oe o e taumafai malosi e faaleleia atili! Na ia fetalai mai: “Aua, faauta, na mafatia le Alii lo oulua Togiola i le oti i la le tino; o le mea lea na mafatia o ia i le tiga o tagata uma, ina ia mafai ona salamo tagata uma ma o mai ia te ia. …
“Ma ua matua tele lava lona olioli i le agaga e salamo!” (Mataupu Faavae ma Feagaiga 18:11, 13).
Sa puapuagatia Iesu Keriso ina ia mafai ona tatou maua le avanoa e salamo ai. Afai tatou te le salamo, tatou te le faatagaina Lona mana togiola e uunaia ai o tatou olaga. Pe a tatou faamaualaloina i tatou lava ma faalagolago i le Faaola, o le a tatou lelei atili, ma avea atili ai i tatou e faapei o Ia.
E pei lava ona olioli le Faaola pe a tatou salamo, e mafai foi ona tatou lagonaina lena olioli. Na aoao mai Elder Craig C. Christensen o le Fitugafulu, “A o tatou salamo i a tatou agasala, e tatau ona tatou taulai atu i le olioli tele o le a mulimuli mai. Atonu e uumi po, ae e oo mai lava le taeao, oi, oka se matagofie o le filemu ma le mamalu o le olioli tatou te lagonaina a o faasa’olotoina i tatou e le Togiola a le Faaola mai agasala ma mafatiaga.”
Ma aua nei galo ia i tatou: E finagalo le Tama Faalelagi ia toe foi uma Ana fanau ia te Ia. Ua valaauina i tatou ia salamo, ia faasoa atu le talalelei, ma valaaulia tagata uma ia salamo ma faaleleia atili. E le faapea la tatou te o solo ma alalaga, “Salamo, salamo!” i tagata i le auala. Nai lo lena, pe a talafeagai ai, tatou te uunaia ma le alofa i latou o loo siomia i tatou ia o mai i lo latou Faaola o Iesu Keriso ma avea e sili atu nai lo le mea e mafai ona latou faia na o i latou.