Faaaogaina o le Taiala
Aisa Kulimi, Faauooga, ma le Alofa i Lou Tuaoi
O le tausia o le poloaiga sili lona lua e le faigata e pei ona e mafaufau i ai.
Ata na tusia e Valentina Vinci
Pe a feagai se uo po o se tagata o le aiga ma se taimi faigata tele, pe e te popole ea pe o le a faapefea ona aveesea o latou faafitauli? E foliga mai o se manatu lelei i le fogatia.
Ae manatu la faapea o le a tatala le faaipoipoga a mātua o lau uō. Pe o loo soona fai lou uso laitiiti i le aoga. Pe o loo tauivi lou tamamatua ma se atuatuvale ogaoga. E faapefea ona e foia na mea uma?
O le tali puupuu o le, e te le mafaia. Ma e le afaina lea. Ae peita’i, i le taimi lava e tasi, e mafai ona e fesoasoani i taimi uma. Ma o le a e ofo i le mafai e sina fesoasoani itiiti ona feliua’i mea.
Tauiviga Tetele, Agalelei Faigofie
Sa ola ae Foni P. i se aiga e toatasi le matua. I le taimi o lona tamaitiiti ma le talavou, sa vaai ai Foni i lona tina o tauivi e tausia na o ia se fanau e toatolu. O le taunuuga, na atiina a’e ai e Foni ni lagona lē lelei i lona tamā. Talu ai nei lava, ina ua atoa lona 19 tausaga, na amata ona aapa atu lona tama e taumafai e fesootai.
“Sa ou le fiafia,” o le tala lea a Foni. “O lo’u mafaufau, ‘E 19 tausaga na tatau ona ulufale mai ai o ia i lo’u olaga ae e leai. Aisea ua tupu ai i lenei taimi?’” E ui lava sa tatalo ma mafaufau loloto o ia, ae sa le mafai lava e Foni ona maua le filemu. Sa fesoasoani teisi le talanoa ma lona tina ma le uso o lona tina, ae sa tuua ai pea lona lagona o le nonoaina i noataga. Ona tupu lea o se mea ofoofogia (ae faigofie): Na valaaulia Foni e lana uo mamae mo se aisa kulimi ma se faatauga.
“E toatele tagata e vaai i lena mea ma manatu e le o se mea tele,” o le tala lea a Foni, “ae sa matuai taua tele! Sa ou lagonaina le la i lo’u pau. Sa ma savavali i fafo, ma sa ou vaaia laau. Sa ou lagonaina le matagi, ma sa ou lagonaina le Agaga i le taimi lava e tasi. Sa ofoofogia lava.”
Pe na foia e lenei malaga faafuasei mo faatauga ia faafitauli o Foni? Ia, e leai. Ua ta’utino mai e Foni o loo faigatā pea lana faiā ma lona tamā. Ae o lena faatinoga faigofie o le agalelei mai lana uo na mafai ai e Foni ona toe lagonaina le Agaga Paia. Ona mafai lea ona ia feagai ma ona tauiviga ma le malosi faaopoopo. “Ou te iloa sa uunaia o ia e le Agaga Paia e aveese mai a’u i fafo o le fale,” o le faasoa mai lea a Foni.
O Ai o Manaomia Oe i le Asō?
I le taiala Mo Le Malosi o le Autalavou , ua valaaulia ai i tatou e “aapa atu ia i latou o e lagonaina le tuuatoatasi, faaesea, po o le leai o se faamoemoega. Fesoasoani ia latou lagonaina le alofa o le Tama Faalelagi e ala atu ia te oe” (Mo Le Malosi o le Autalavou: O Se Taiala mo le Faia o Filifiliga [2022], 12). O lena faatinoga faigofie o le faauooga na fesoasoani ia Foni e lagona ai le alofa o le Atua i taimi o se tulaga faigata. O ai e mafai ona e fesoasoani i ai ia lagonaina lena lava alofa i le aso nei?