E Finagalo Lou Tama Faalelagi e Talanoa Atu ia te Oe

Sa faatonuina e se agelu ia Atamu ma Eva ma i latou uma o le a mulimuli ia i laua ina ia “salamo ma valaau atu i le Atua i le suafa o le Alo e faavavau” (Mose 5:8).

Na aoao mai e Iesu:

• “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou” (Mataio 7:7

• “Pe a e tatalo, … tatalo i lou Tama … i le faalilolilo” (Mataio 6:6).

• “O lenei ia faapea outou ona tatalo: Lo matou Tamā e, o i le lagi, ia paia lou suafa” (Mataio 6:9).

Sa tatalo pea Iesu i Lona Tama (tagai i le Luka 6:12; Mareko 6:46). I Ketesemane, sa Ia fetalai atu ai i Ona soo, “Ia outou nonofo iinei, a’o ou tatalo” (Mareko 14:32). A o i ai Iesu i luga o le satauro, sa tatalo mo fitafita na faasatauroina o Ia: “Lo’u Tama e, ia e faamagalo atu ia te i latou; aua ua latou le iloa mea ua latou faia” (Luka 23:34).

Ua fautuaina i tatou ia “tatalo e le aunoa.” Ua fautuaina i tatou e tusitusiga paia ia “filifili faatasi ma le Alii i [a tatou] mea uma e fai, ma o le a ia taitai [tatou] mo le lelei” (Alema 37:37). E le gata i lea, tatou te “avatu le faafetai ma le viiga atoa ua i ai i [o tatou] agaga atoa le mana e maua ai” (Mosaea 2:20).

Ae o le mea e sili atu ona mamalu, e tali mai lo tatou Tama oi le Lagi i a tatou tatalo! O se fesili musuia mo i tatou o le, e faapefea ona tatou maua ma malamalama lelei i tali, taitaiga, ma faamafanafanaga e sau mai lo tatou Tama?

O le mauaina o tali i a tatou tatalo e amata i le faatuatua i le Tama Faalelagi ma Lona Alo, o Iesu Keriso. Tatou te faalagolago i lo tatou Tama, faia le mea sili tatou te mafaia e tausi ai poloaiga, ma vaavaai mo Lona aao i mea uma (tagai i le Mataupu Faavae ma Feagaiga 59:21).

O le a tu lou Tama Faalelagi i ou autafa, faamalosia ou tomai, faamafanafanaina oe, ma “faapaiaina ou puapuaga mo lou manuia” (2 Nifae 2:2) a o e valaau atu ia te Ia.

A o tatou faatinoina le faatuatua i le Atua ma tausi Ana poloaiga, e masani lava ona tatou aoao e faalogo lelei atu i Lona siufofoga.

I le 1993, sa valaaulia ai i maua ma Peresitene James E. Faust (1920–2007), o le sa avea ma se tasi o le Korama a Aposetolo e Toasefululua, ma lo’u toalua o Kathy, e auai faatasi ma ia i se faigalotu i le Iunivesite o Polika Iaga. Na tupu lenei faigalotu a o le’i oo i le taimi na faateleina ai le mauaina o telefonipoto, ala o faasalalauga faaagafesootai, ma le Initoneti.

I Lana lauga, na lapatai mai ai Peresitene Faust: “I la outou tupulaga, o le a outou faalogo pea i le tele o leo o ta’u atu le ala e ola ai, le ala e faamalie ai ou manao, le ala e te maua uma ai.” Ae “o le leo e tatau ona e aoao e faalogo i ai o le siufofoga lea o le Agaga.” Ina ia faia lena mea, “E tatau … ia i tatou ona tatala o tatou taliga, liliu atu le mata o le faatuatua i le faapogai o le leo, ma vaai atu ma le mausali i le lagi.”

I tausaga mulimuli ane, na aoao mai ai Peresitene Russell M. Nelson, “Afai o loo sili atu lou gauai i mea e fafagaina mai ala o faasalalauga faaagafesootai nai lo musumusuga a le Agaga, o lona uiga ua e tuuina oe lava i se tulaga lamatia faaleagaga.”

E oo mai le siufofoga o le Agaga i lo tatou atamai ma o tatou lagona. “O le a ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2 Faalogo i lou lotofuatiaifo—e masani ona amata faaaliga iina.

E le mafai ona faamalosia tali ma uunaiga mai le Atua. Tatou te tatalo ma faatalitali ma se loto talitonu. O nisi tali o le a le oo mai i lenei olaga, ae i e amiotonu, o le a auina mai pea e le Alii Lona filemu (tagai i le Ioane 14:27). Ua aoao e le Alii Ana fanau i “lea fuaitau i luga o lea fuaitau, ma lea mataupu i luga o lea mataupu” (Mataupu Faavae ma Feagaiga 98:12

E mafai ona faafuasei ona oo mai le leo o le lagi i avanoa toafilemu ma nofoaga paia. I le filemu o a’u tatalo ma manatunatuga i le taeao po, ou te maua ai faamanuiaga e le masani ai. O se faitauga o tusitusiga paia i aso taitasi, patino, e le faalavelaveina, a o faia soo i nisi taimi, e mafai ona aumaia ai le siufofoga o le Agaga i o tatou loto e pei o le afi i isi taimi.

A o faataavili taamilomilo le pisapisao ma mea faalavefau o le lalolagi ia i tatou, ua faatonuina e le Alii Lana perofeta e fausia le tele ma le tele o malumalu. I nei fale paia o le Alii, a o tatou tuua o tatou luitau i fafo ae ulufale atu ma a tatou tatalo ma popolega, e aoaoina i tatou i upumoni o le faavavau. I se tausaga talu ai, na folafola mai ai e Peresitene Nelson a o tatou tapuai i le malumalu, “E leai se mea o le a sili atu onatatalaina ai le lagi. E leai se mea!”

O konafesi aoao taitasi e aumaia ai foi faamanuiaga faaopoopo e tele. I le masina a sau o Aperila, o le a tatou toe feiloai ai i le konafesi aoao e faalogo i le siufofoga o le Alii. Ou te folafola atu a o outou sauniuni ma o mai ma le agaga tatalo i le konafesi aoao, o le a outou maua tali i o outou popolega ma iloa ai o loo i o outou luga le “aao o le lagi”.

Ia e faatuatua o loo fetalai mai lou Tama Faalelagi ia te oe. Ua Ia faia lava! Ia avea lou faaatuatua ia te Ia ma Lona Alo Pele e fesoasoani ia te oe e vavae ai le veli ma mauaina le siufofoga o lou Tama. Ou te molimau atu o loo i ai o Ia iina ma e sili atu lona alofa ia te outou e le mafai e upu ona faamatala.