Afi. Naifi. Sisiva. Ma le Talalelei.

O le siva afi a Samoa, po o le ailao afi, o se siva faaonapo nei e afua mai i se siva masani o le taua. O se taleni tulaga ese, o se ituaiga o faatufugaga ma faamatalaga, ma, mo le toatele, o se auala e faamamaluina ai a latou aganuu.

O le auala lenei na faamatala ai e ni talavou se toatolu mai Hawaii, ISA:

Vivian, 18: “I le tulaga faaleaganuu, o se mea sa faia e autau i le na o se naifi. Mulimuli ane, na faaopoopo ai le afi ma le taavilivili. E talitutusa lava ma le taavilivili o patolo, ma ona pito uma e lua o lo’o mumu.”

Tui, 12: “O siva afi e aofia ai le tele o le vevela. Ae e tele foi le faataavili. E te togiina foi le naifi ma fesiitai solo a o viliina.”

Iosefa, 18: “Pe a minoi le afi, e mapumapu le matagi, ma o loo tata tagipalau, e leotele lava. Ae o le mea moni, o se taimi faaleagaga le leoa mo au, aua e tele lona uiga ia te au. O le siva afi o se auala ou te fesootai ai ma lo’u aiga ma lau aganuu.”

Mo nei talavou, o siva afi e le na o se taleni ofoofogia ma tulagaese. Ua aoaoina ai foi i latou i le tele o lesona taua o le olaga e uiga i le tumau latalata atu i le Alii e ala i le ola ai i le talalelei ma fesoasoani i isi.

A e siva i le ailao afi, e tele mea e mafai ona faaletonu. E mafai ona oo atu le penisini i le ’au atoa, ma maseesee ai. E mafai foi e le matagi ona suia mea uma ma faigata ai ona sapo le naifi. O le faalagolago i le Alii a o sisiva ua avea ma se fesoasoani tele mo au.

O se tasi o mau ou te fiafia i ai o le Faataoto 3:5, lea o loo talanoa mai e uiga i le faalagolago i le Alii ma lou loto atoa. Ou te manatu e taua lena mea aua i le taimi o le faatinoga e te iloa ai ua e tuuina i totonu na faataitaiga uma, ae o le mea moni lava e faamoemoe ia te oe, o le ailao afi, ma le Tama Faalelagi.

Ou te fiafia e tatalo i le Tama Faalelagi, “Ua lelei, ua ou faia le galuega, faamolemole ia taiala o’u lima.”

E tele sauniuniga e faia i tauvaga o le ailao afi. Ou te faataitai i aso uma pe tusa ma le ono masina e tau atu i le tauvaga.

E mafai foi ona faigata, aua e pisi tele la’u faatulagaga. Ae ou te faia i taimi uma se avanoa mo le Alii e ala i le alu i le lotu, gaoioiga a Alii Talavou, ma le seminare ma e ala i le faitauina o au tusitusiga paia ma tatalo. Pe a ou faia nei mea, ou te matauina se eseesega i lo’u aso. E lelei mea uma.

Ou te lagonaina moni lava o loo i ai Keriso iina mo au. Afai e te faalagolago i le Alii ma taumafai e faamuamua o Ia, o le a Ia fesoasoani ia te oe i soo se mea e tatau ona e faia.

A o ou tuputupu ae, sa ou matamata i uso o lo’u tama ma tausoga o sisiva i le ailao afi Sa ou manatu e manaia tele, ae ou te lei iloa pe mafai ona ou faia e au lava ia. I le aoga maualuga, sa avea o se tasi o a’u sini ia aoao pe faapefea ona fai. Ina ua uma ona ou aoaoina, sa ou faia la’u sini ia sili atu ona patino: Sa ou manao e tauva i se tauvaga siva afi.

Ua fesoasoani le siva afi ia te au ia maua le talitonuga ia te au lava ia. A e siva, e i ai ni gaoioiga patino e te togiina i luga le naifi, matamata i ai i le ea, ona sapo lea. Sa masani ona ou sola ese mai le lau ina ua uma ona ou togiina i luga. Sa aoaoina au e lo’u tama e tatau ona ou tautino atu i le faatinoga ma ia ou talitonu ia te a’u lava ia.

I le aluga o taimi, na amata ona ou tauaveina au lava ia ma le mautinoa a o ou faatinoina ma isi mea uma. Ua matua manaia lava i le taimi nei aua o nisi taimi e o mai ai teineiti ia te au pe a uma faafiafiaga ma fai mai sa musuia i latou ma mananao foi e faataitai siva afi. Ua ou fiafia lava ua ou musuia isi tagata e fai se mea sa latou manatu atonu e le mafai ona latou faia.

Pe a ou faatinoina, ou te le popole. Ou te lagonaina se fiafia. Ua ou aoaoina e tusa lava pe ou te sese, e mafai ona ou liliuina i se mea matagofie. E pei lava o le valiata. Pe a faia e se tagata vali se mea sese, atonu o le a avea ma se mea fou. O nisi taimi e pa’ū ai la’u naifi, ae ou te toe pikiina i luga ma faaauau pea ona siva.

O le faamalosiauina o au lava ia ua fesoasoani tele ia te au i lo’u fefe. Nai lo le i ai o ni manatu e pei o le, “Ae faapefea pe a ou sese?” Ou te taumafai ia tele atu ni ou manatu e pei o le, “Ia, ae faapefea pe lelei la’u faatinoga!”

Ua avea foi ma se faiga masani mo au le faia o sina tatalo laitiiti i taimi uma a o lei faia se faatinoga o le siva afi. O le tatalo e puipuia ai au ma fesoasoani ia te au e maua ai se siva lelei. Pe a ou tatalo, ou te lagona le mautinoa o le a ou faia mea lelei.

Ae ou te lei faatinoina le siva afi, e masani lava ona ou popole. O taimi uma lava ae ou te lei faaauau, ou te faia ai se tatalo. I se tasi taimi, ae ou te lei faaauauina sa ou faia se tatalo, ma sa ou lagonaina le mafanafana ma le le fefe. Ina ua ou siva, sa ou lagonaina e pei o loo tu iina se tasi i o’u tafatafa.

E fesoasoani tele le tatalo ia te au e aua nei ou lagonaina le popole. A uma ona ou tatalo, ua ou iloaina ua na o lou fiafia lava!

O le taumafanafana ua tea, sa matou faatinoina ai le siva afi i Romania ma Palekeria. E fai mai lava lo’u tama matou te aoaoina i taimi uma le “A i ai i le Aiga le Alofa” (Viiga, nu. 181) i le gagana o atunuu matou te asiasi i ai. Matou te faia lenei mea ina ia mafai ona matou usuina faatasi o se aiga pe a uma ona matou faafiafia.

Ou te manatu o le savali o le alofa i le aiga e taua aua e faamanatu mai ai ia i tatou ia i ai le alofa i soo se mea tatou te o i ai. Ou te lagona e pei o loo ou faagaeetia isi tagata ma faafiafiaina i latou. Ma e ui lava o nisi taimi latou te le mafai ona tautatala i la’u gagana, ae ou te iloa sa latou lagonaina le faasoaina atu o le talalelei e ala i a matou taleni.

Nainoa A., 13

E taua le savali o le alofa i le aiga aua afai e le iloa e tagata o loo i ai le alofa i o latou autafa, ona atonu lea o le a latou faanoanoa. A i ai le alofa i lo’u aiga, ou te lagona le toafilemu ma le toafimalie.

O siva afi o se tasi lea o auala e faasusulu atu ai e nei talavou lo latou malamalama ma faasoa atu a latou taleni i isi. “Ou te faatinoina ma faasoa atu au taleni i le lalolagi faatasi ma lo’u aiga. Ou te lagona ai le fiafia i le iloaina afai e te faasoa atu au taleni, o lona uiga o le a e siitia isi i luga,” o le tala lea a Nainoa.

Fai mai le uso matua o Nainoa, o Kawiki, o siva afi e faamanatu atu ai ia te ia le auala e manumalo ai le malamalama i le pogisa. Ia te ia, o le faasoaina atu o ana taleni e pei lava o le faasoa atu o lona malamalama i isi.

Fai mai Iosefa, a tatou susulu atu, tatou te susulu atu mo le Tama Faalelagi. “Pe a tatou faasoa atu mea ua tatou maua, e le gata ina tatou faamanuiaina i tatou lava, pe faamanuiaina i latou o loo tatou faasoaina atu i ai a tatou taleni, ae tatou te avatu foi le viiga i lo tatou Tama Faalelagi.”

Fai mai Vivian e faasoa mai e lona tamamatua i taimi uma le mau Mataio 5:16, lea e talanoa e uiga i le faasusulu atu o lo tatou malamalama i luma o tagata. “Ou te manatu o se mau lelei aua e le tatau ona e lelei i le na o le siva afi e faasoa atu ai le talalelei. E mafai ona e lelei i soo se mea ma faaaoga au taleni e faasoa atu ai le talalelei i lena ala.”