O Le Mealilo e Lē Toe Toilalo Ai

Ata na tusia e Eric Chow

“Ou te fiafia i le toilalo!”

Atonu e le o se mea lena ua e faalogo i ai o fai mai ai le toatele o tagata. O le toatele o i tatou e le fiafia i le toilalo. E mafai ona tiga, e lafoaiina ai a tatou fuafuaga, ma o nisi taimi e matuai maasiasi lava.

Ae faapefea pe afai e i ai se mealilo e le toe toilalo ai lava?

“Faatali mai,” atonu o loo e mafaufau ai. “E leai se isi e atoatoa. Tatou te faia uma lava ni mea sese. E mafai faapefea e se tasi ona le toilalo lava?”

Na iloa e Thomas Edison le mealilo a o ia taumafai i le tele o taimi e fausia le matauila. “E le’i faa-afe [1,000] ona ou toilalo,” o lana tala lea. “O le matāuila o se fatufatua’iga o laasaga e 1,000.”

Sa faafia ona toilalo Edison, ae sa lei filifili o ia e vaai i ai faapena. Ma o le mealilo lena! Sui lau vaaiga! Pe a e fesuisuiai lau vaaiga, o ou “toilalo” e mafai ona avea ma se mea fou ma lelei.

O auala nei e fa e fesuisuiai ai lau vaaiga e uiga i le toilalo:

1. Fuafua po o le a le mea e mafai ma le mea e le mafai ona e pulea. O nisi taimi o mea tatou te popole tele i ai e le mafai ona tatou puleaina. Avea le talosaga mo se galuega, mo se faataitaiga. E mafai ona e pulea le taumafaiga na e faia i le talosagaina, ae e le mafai ona e pulea le taunuuga. Nai lo le faaaluina o le malosi e popole ai o le a e “toilalo,” taumafai e tuu taumafaiga i mea ua e pulea ma faatuatuaina le Alii. Na toe faamanatu ai e Paulo i le Au Paia o le a “galulue faatasi mea uma e lelei ai i latou e ua alofa atu i le Atua”(Roma 8:28). Ae afai e te le maua lena galuega? E le o oe o se tagata toilalo! E tusa lava pe e te le maua le taunuuga sa e faamoemoe i ai, ae sa e tuuina atu lau taumafaiga sili, ma o le manuia lena!

   

2. Uumau mea lelei ma faaauau pea. A e lagonaina ua e toilalo, taumafai e vaai loloto atu i lou aafiaga. E le’i lavea i le filiina o le au taalo? Ua maua se togi/faaiuga lē manuia i se suega? O le vaai atu i le mea sa e tauivi ai o le a e maua ai se faafanua lelei mo mea e tatau ona e faia i le lumanai. Afai o se aafiaga e te lagona ai le le mautonu, ia faailoa atu ou lagona ona filifili lea e agai i luma i mea lelei. O le toilalo e mafai ona fesoasoani moni lava ia te oe e faaauau ai pea i luma i itu fou ma sili atu ona lelei.

   

3. Ia manatua e le o le mutaaga lenei. E i ai se faaupuga masani: “O le a lelei mea uma i le iuga. Afai e le lelei, e le o le mutaaga lea.” Ua aoao mai e Moronae se mea faapena. Sa ia faapea mai, “Po ua oo mai ea le iuga? Faauta ou te fai atu ia te outou, E leai; ma ua lei taofia lava le avea o le Atua ma se Atua o vavega” (Mamona 9:15). A o tatou faalagolago i le Atua, fetaomi atu i luma i le faatuatua, ma manatua e le muta a tatou tala pe a sese se mea, e mafai ona tutupu vavega ma soo se “toilalo” tatou te ono feagai e mafai ona iu ina avea ma ni faamanuiaga ofoofogia.

4. Tutu faatasi ma Keriso. Ona o le Togiola a Iesu Keriso, e le tumau lava se toilalo. E i ai lava i taimi uma ia i tatou le filifiliga e salamo ai, toe liliu atu o tatou loto i le Atua, ma ole atu mo Lana fesoasoani. Na aoao mai Peresitene Jeffrey R. Holland, o le Sui Peresitene o le Korama a Aposetolo e Toasefululua: “E tusa lava po o le a le tele o mea sese e te lagona ua e faia … , ou te molimau atu e te lei malaga i tala atu o le aapa atu o le alofa paia. E le mafai ona e magoto maualalo ifo nai lo le mea e suluia e le malamalama le i’u o le Togiola a Keriso.” O lea la, i se isi itu, pe a e tu faatasi ma Keriso, e le mafai ona e toilalo!

A o e vaai i ou toilalo o ni laasaga i le manuia, ua e tatalaina le mealilo ia aua lava nei toe toilalo moni.

Ia, taumafai la’ia! Ae afai e le manuia? Ia manatua—e te le o toilalo moni lava . O lo’o e alualu pea i luma, tasi le laa i le taimi.