Mo Se Taimi Pe a E Lē Fiafia
Ua ofoina mai e le Mataupu Faavae ma Feagaiga le fesoasoani pe a le o gatasi mea ma ala ua e fuafuaina.
Ata na tusia e Luciana Abrão
Pe na i ai se taimi na e le fiafia ea? Ioe. O le mea moni, sa ou le fiafia i le vaiaso ua tea. E matuai mamafa lava—loimata ma mea uma.
Na fetalai atu le Alii ia Iosefa Samita, “Ia e onosai i puapuaga, ona o le a tele o le a oo mai ia te oe.” Folo patato. Ou te le fiafia i lena mea.
Ae o le mea e faafetai ai, o loo faaauau pea le mau: “Ae ia e onosaia i latou, aua faauta, ou te faatasi ma oe, e oo lava i le iuga o ou aso” (Mataupu Faavae ma Feagaiga 24:8, faaopoopo le faamamafa). Ua lelei. Manavanava loloa
Pe a ou mafaufau i ai, ou te iloa sa faatasi le Alii ma a’u i taimi uma na ou le fiafia ai. O nisi nei o faataitaiga:
Ina ua Ou Le Maua le Vaega …
Ina ua 15 o’u tausaga, sa ou faataitai mo se tala faatino i le aoga. Sa ou taumafai mo le matafaioi autu, ae i le faaiuga, ou te lei maua lena vaega.
O le mea e sili ona leaga, ua uma ona tofi e le faiaoga ia matafaioi laiti uma, o lea sa leai ai lava se vaega mo a’u. Sa ia faia a’u ma Faatonusili o Tamaiti Aoga, ma ona sa faanoanoa o ia ona o a’u, sa ia faaopoopoina ai foi se vaega fou—sa tatau ona ou sau i luga o le tulaga mo le tusa ma le 30 sekone o se taupousa le leoa.
Ioe. Sa ou tagi.
… Sa Faamalosia A’u e le Alii.
O le toe tepa i tua, ua ou iloa ai na fesoasoani mai le Faaola ia te au i lena taimi le fiafia. Sa ia faamalosia a’u ina ia faatumauina se uiga lelei ma atiina ae le lotomaualalo sili atu. I le faaiuga, sa ou fiafia i lo’u taimi i le tala faatino i le vasega iva.
“Ia tatou faia ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma lona aao e faaali mai” (Mataupu Faavae ma Feagaiga 123:17, faaopoopo le faamamafa).
Ina Ua le Agai Taaloga i Le Mea Sa Ou Manao Ai …
I lo’u tausaga mulimuli i le aoga maualuga, sa ou manao ai ia ou i ai i le au tenisi a le vasega matutua (po o le au maualuga). Sa tatau ona ou faatoilaloina le teineitiiti sa faatulagaina i luga a’e o a’u ina ia ou i ai i le ‘au. Ae ina ua ma taaalo, sa ou faia’ina.
E ui lava sa ou le fiafia, ae sa ou taalo i le ‘au a le vasega laiti. I le tauvaga mulimuli a le vasega laiti, sa faatulagaina ai a’u i le nofoaga muamua. Ae o le a le mea na tatou iloa? Sa ou faiaina i le tauvaga mulimuli. Sa ou toe—tagi.
Sa ou toe le fiafia mulimuli ane foi. Ina ua uma ona ou maua se taui mo le mauaina o togi lelei ma le taalo i taaloga, sa latou filifili e aveese le taui—aua e foliga mai, sa mo na o i latou sa taaalo i le vasega matutua.
… Sa Na o se ”Taimi Laitiiti”
I lena taimi, o le tenisi o se vaega tele o lo’u olaga, ma sa lagonaina le tetele o na faanoanoaga. O le mea ou te lei iloaina o le faatasi pea o le Faaola ma a’u, e fesoasoani ia te a’u. O na le fiafia tetele sa le tumau e faavavau, e tusa lava pe sa pei o le a tumau.
“Ia filemu lou agaga; o lou tiga ma ou puapuaga o le a na o sina minute laititi; ma ona oo lea, afai e te talitalia lelei o le a faaeaina oe e le Atua i luga” (Mataupu Faavae ma Feagaiga 121:7–8, faaopoopo le faamamafa).
Ina ua Ou Taumafai e Alofia le Le Fiafia …
O nisi taimi, sa ou taumafai ai e aloese atoa mai le le fiafia. Ina ua 13 ou tausaga ma ou le maua se avanoa i le laulau a tofi a tamaiti aoga, ou te lei toe taumafai lava, e ui lava o se mea semanu ou te fiafia ai. Sa ou musu ona sa ou fefe ne’i ou toe le fiafia.
… Sa Manaomia Ona “Aua le Fefe”
Sa manaomia ona ou manatua o loo faatasi le Alii ma i tatou, e oo lava i o tatou le fiafia. O nisi taimi e le mafai ona tatou faia ni mea, ae e mafai ona Ia fesoasoani ia i tatou e feagai ma lagona le lelei ma faataitai ni mea fou.
“Vaai mai ia te au i manatu uma; aua le masalosalo, aua le fefe” (Mataupu Faavae ma Feagaiga 6:36–37, faaopoopo le faamamafa).
Ina Ua le Alu Tonu le Tulaga o le Auauna Atu i se Misiona e Pei ona Fuafuaina …
Ina ua maea le aoga maualuga, sa ou filifili e auauna atu i se misiona.s Ae sa i ai ni faafitauli faafuase’i i lo’u ola mālōlōina lea na taofia ai a’u mai le alu ese atu i le taimi na ou faamoemoe e alu ai.
Sa tatau ona ou onosai, ae na iu lava ina valaauina au i le Misiona a Mekisiko Guadalajara Sasae. O iina, sa ou aoaoina ai le tele o tagata ofoofogia ma sa oo lava ina fesoasoani i nisi o i latou ia papatisoina. Ae e oo lava i lo’u faatuatua, usiusitai, ma le galue malosi, e leai se tasi o i latou na tumau le toaaga i le Ekalesia.
… Sa Ou Faamoemoe i le Finagalo o le Atua
E masani lava, e lē mafai ona tatou pulea mea e tutupu i le olaga. Sa le mafai ona ou foia vave ou faafitauli tau i togafitiga faafomai. Ma e le mafai ona ou faamalosia isi e ola i le talalelei. Ae e mafai ona ou faatuatuaina le taimi ma le ala a le Alii.
“O lea, ia outou faapaia outou lava ina ia tau-tasi o o outou mafaufau i le Atua, ma e oo mai aso o le a outou vaai ai ia te ia; … ma o le a faia lena mea i lona lava taimi, ma i lana lava ala, ma e tusa ai ma lona lava finagalo” (Mataupu Faavae ma Feagaiga 88:68, faaopoopo le faamamafa).
Ina ua Ou Le Fiafia i le Vaiaso ua Tea …
Ua avea nei a’u ma se tagata matua. Ae o lo’o o’u le fiafia pea lava. O le mea moni, i le vaiaso ua tea sa ou alu ai i se konafesi o tusitusiga. Sa ou lagona le mautinoa i nisi o a’u tusitusiga, ae sa ou maua ni manatu faaalia le fiafia mai isi tusitala.
… Sa Faatasi Pea o Ia ma A’u
O lea la, o loo ou taumafai e faatuatuaina teisi le Alii. O le le fiafia o se vaega lea o le olaga. E le faapea o loo e faia se mea sese.
O lea la, toe foi i le mau mai le amataga. Ioe, atonu e “tele” o tatou puapuaga ma ni le fiaia. Ae ou te iloa o le a faatasi le Alii ma a’u e ala mai ia i na mea uma. Ma o le a faatasi foi o Ia ma oe.
“Onosai i puapuaga, ona o le a tele o le a oo mi ia te oe; ae ia onosaia i latou, aua, faauta, Ua ou faatasi ma oe, e oo lava i le iuga” (Mataupu Faavae ma Feagaiga 24:8, faaopoopo le faamamafa).