Ko e hā ʻoku tau ʻilo fekauʻaki mo Siosefa, ko e husepāniti ʻo Melé?

Ko e meʻa ʻeni ʻoku talamai ʻe he folofolá ʻo kau kia Siosefa, ko e husepāniti ʻo Melé.

• Ko ha hako ia ʻo Tēvita (vakai, Mātiu 1:1–16, 20; Luke 2:4; 3:23–38) pea naʻe nofo ʻi Nāsaleti (vakai, Mātiu 2:19–23).

• Naʻá ne fakamaʻu mo Mele ke na mali ʻi he taimi naʻe ʻilo ai ʻe [Mele] te ne hoko ko e faʻē ʻa Sīsuú, ko e ʻAlo ʻo e ʻOtuá (vakai, Mātiu 1:18).

• Ko ha tangata tufunga ia (vakai, Mātiu 13:55).

• Ko ha “tangata angatonu ia” (vakai, Mātiu 1:19).

• ʻI he taimi naʻá ne ʻilo ai ʻoku feitama ʻa Melé, naʻá ne loto ke fakahaofi ia mei hano fakamaaʻi mo lumolumaʻi ʻe he kakaí (vakai, Mātiu 1:19–20).

• Naʻe tuʻo fā ʻa ʻena fetuʻutaki mo e ʻOtuá ʻi ha misi: (1) naʻe fakahā ange ʻe ha ʻāngelo kiate ia kuo tuʻituʻia ʻa Mele ʻi he ʻAlo ʻo e ʻOtuá (vakai, Mātiu 1:20–21), (2) naʻe fakatokanga ange ha ʻāngelo ke hola mo hono fāmilí ki ʻIsipite (vakai, Mātiu 2:13), (3) naʻe talaange ʻe ha ʻāngelo ke ne foki ki ʻIsileli (vakai, Mātiu 2:19–20), pea (4) naʻe fakatokanga kiate ia ke ʻoua te ne ʻalu ki Siutea ʻi heʻene fokí (vakai, Mātiu 2:22).

• Naʻá ne ʻalu ki Pētelihema ke fakatukuhauʻi ia, peá ne ʻave ʻa Mele mo ia, pea naʻá ne ʻi ai ʻi he taimi naʻe ʻaloʻi ai ʻa e Fakamoʻuí (vakai, Luke 2:1–7, 16).

• Naʻe ʻikai ko e tamai totonu ia ʻa Sīsū Kalaisí, ka naʻe fakaʻapaʻapaʻi ia ʻe he tamasiʻi ko Sīsuú ʻo hangē pē ko ʻene tamai totonú ia (vakai, Luke 2:48, 51).

• ʻOku hangē naʻá ne maʻu fakataha mo Mele ha ngaahi foha ʻe toko fā pe lahi ange, pea pehē foki ki ha ngaahi ʻofefine (vakai, Mātiu 13:55–56).

• Mahalo naʻá ne mālōlō hili ha taimi nounou mei he taʻu 12 ʻa Sīsuú pea kimuʻa ʻi he Tutukí (vakai, Luke 2:42–52; Sione 19:25–27).