Ko Sīsū Kalaisi Ho Mālohingá
ʻEiki, Nofo Mo Au
Naʻe ako ʻe Foloiti ʻa e founga ʻe lava ai ʻe he meʻaʻofa ʻo e fakamolemolé ʻo fakamoʻui mo fakamālohia kitautolú.
Ko e ʻOfa ʻa ha Tamai, tā fakatātā ʻa Kelsy mo Jesse Lightweave
ʻOku manako ʻa Foloiti, ko ha talavou ʻoku nofo ʻi ʻIukanitā, ke tisikou, fakatupulaki hono ngaahi talēnití, mo tauhi ki he ʻOtuá. Naʻe fehangahangai ʻa Foloiti ʻi hono taʻu 13 mo e ʻahiʻahi ʻi he Lea ʻo e Potó. ʻOku angamaheni ʻaki pē ʻa e inu kofí mo e tií ʻi hono koló, pea naʻe faʻa kau ai ʻa Foloiti mo hono ngaahi kaungāmeʻá.
Hili ʻene talanoa mo ʻene ongomātuʻá mo lau ʻa e meʻa ʻoku akoʻi ʻe he folofolá fekauʻaki mo e moʻui leleí, naʻá ne fakakaukau ke ne tauhi ʻa e Lea ʻo e Potó. ʻI he fakaʻamu ʻa Foloiti ke fai ha liliú, naʻá ne lotu ki he Tamai Hēvaní ke maʻu ha fakamolemole. ʻOkú ne pehē ʻoku fiemaʻu ha “taimi mo ha ngāue” ki hono ikunaʻi ha tōʻonga moʻui kovi.
Naʻe maʻu ʻe Foloiti ha ʻamanaki lelei mei he fakalea ʻo e himi ʻokú ne saiʻia taha aí, “Afe Mai Hē!” (Ngaahi Himí, fika 87). ʻOkú ne pehē, “Ko ha himi ia ʻokú ne fakamālohia hotau ngaahi laumālié.”
Hangē pē ko Foloití, te tau lava ʻo maʻu ha mālohi ʻia Sīsū Kalaisi. ʻI he taimi ʻoku tau “nofo” ai mo Kalaisí, ʻokú Ne nofo mo kitautolu, fakafiemālieʻi kitautolu, mo ʻomi ha ʻamanaki lelei! Ko e founga ʻe taha te tau lava ai ʻo fakaafeʻi ʻa Kalaisi ke nofo mo kitautolú ko e fakatomala mei heʻetau ngaahi angahalá pea kole ki he ʻOtuá ha fakamolemole.
ʻOku tau ʻilo ko e “lahi ange” ko ia ʻetau fakatomalá mo fekumi ki ha fakamolemolé, ʻi he loto-moʻoní, ʻoku fakamolemoleʻi leva kitautolu (Molonai 6:8). Te tau lava ʻo fakalakalaka ʻi he taimi kotoa pē ʻoku hoko ai ha fehālaaki, ʻo kapau te tau fakatomala! ʻOua ʻe foʻi!
Naʻe aʻusia ʻe Foloiti ʻa e ngaahi tāpuaki ʻo e fakatomalá mo e fakamolemolé ʻi heʻene moʻuí. ʻOkú ne maʻu ha mālohi ʻo fakafou ʻia Sīsū Kalaisi. ʻOkú ne pehē, “ʻOku ou ʻilo ʻokú Ne ʻi ai ʻi he taimi ʻoku tau faingataʻaʻia aí.”
ʻE lava ʻe he meʻaʻofa ʻo e fakamolemolé ʻo fakamoʻui mo fakamālohia kitautolu. ʻOku fetongi ʻe Kalaisi ʻetau ongoʻi halaiá mo e mamahí ʻaki ʻa e melinó mo e fiefiá! ʻI hoʻo kole fakamolemole hono hoko ki he ʻEikí, manatuʻi te Ne ʻafioʻi lelei koe, pea te Ne ʻi ai maʻu pē ke tokoniʻi koe.