Ko e Tamasiʻi ko Kalaisí

Faitaaʻi ʻe Cristy Powell

ʻI ha taʻu ʻe taha naʻá ku fai ha kiʻi ngāue ʻi ha ngaahi hoʻatā lahi ke tānaki ha paʻanga ke fakatau ʻaki ha seti fakatātā ʻo e ʻAloʻí. Naʻá ku fakatau mai ha seti kakato naʻe maʻamaʻa pea ʻomi fakataha ai mo ha kiʻi fale ngaohi mei he ʻakaú siʻisiʻi ʻoku tauhi ai ʻa e fanga monumanú. Naʻe fakatātaaʻi ʻe he fanga kiʻi tamapuá ʻa e fānaú ʻoku nau tui ʻa e vala ʻo e ʻAloʻí; naʻe ʻinisi ʻe tolu honau lōloá pea naʻe ngaohi ʻaki ia ha sioʻata lanu hinehina. Naʻá ku fili mai ʻa e seti ko iá koeʻuhí he naʻe ʻi ai ʻema ongo kiʻi tamaiki tangata kei iiki—ko Kēlepi, ʻa ia naʻe taʻu tolu mo Siua, ʻa ia naʻe taʻu taha pē.

Naʻá ku haʻu mo e seti fakatātā ʻo e ʻAloʻí ki ʻapi ʻo fokotuʻutuʻu fakalelei ia ʻi he tuliki ʻo e tēpilé ʻi homau loto falé. Naʻe loto ʻa Kēlepi ke sio ʻi he taimi pē ko iá ki he meʻa foʻou ʻe fakaʻaliʻalí. Naʻá ku fakamatalaʻi lelei ange kiate ia ʻoku pelepelengesi ʻa e konga takitaha pea kuo pau ke ʻoua naʻá ne ala ki ai, kae sio ʻataʻatā pē. Naʻá ku fakahinohinoʻi ange ʻa Siosefa mo hono tokotoko tauhisipí, pea ʻoku tūʻulutui ʻa Mele ʻi he veʻe mohenga pēpē ʻoku ʻi ai ʻa e kiʻi pēpē ko Sīsuú. Naʻe ʻi ai ha kiʻi ʻāngelo siʻisiʻi, kau tangata poto ʻe toko tolu, mo ha tauhisipi mo ha ongo kiʻi lami iiki. Naʻá ku fokotuʻutuʻu fakalelei ʻa e fakatātā ʻo e ʻAloʻí takitaha ki hono feituʻu. Naʻá ma tangutu fakalelei mo Kēlepi ʻo sio mo fakaʻofoʻofaʻia ʻi heʻema teuteu foʻoú.

ʻI he pongipongi hono hokó naʻe ʻuluaki aʻu hifo ʻa Kēlepi ia ki lalo ʻi ʻiate au. Hili ha miniti nai ʻe hongofulu mā nima naʻá ku aʻu hifo ki lalo, ʻo kiʻi tuʻu ke fai ha sio ki heʻeku mataʻikoloa foʻoú ʻi heʻeku fou atu ki peitó. Naʻá ku ʻohovale ʻi heʻeku sio atu kuo moveuveu ʻa e meʻa kotoa! Kuo fakaʻefiʻefiʻi kotoa ʻa e fanga kiʻi fakatātā ʻo e ʻAloʻí ia ʻi he fale tauhiʻanga monumanú. Kuo ʻikai ha ʻuhingamālie ʻo e fokotuʻutuʻu ʻa e fanga kiʻi fakatātā ʻo e ʻAloʻí, pea mahino kiate au ʻoku pau pē ko e ngāue ʻeni ʻa Kēlepi.

Naʻá ku fokotuʻutuʻu fakalelei ʻa e fakatātā ʻo e ʻAloʻí takitaha ki hono tuʻuʻangá peá u ʻalu leva ke kumi mai ʻa Kēlepi. Naʻá ku toe fakamatalaʻi fakalelei ange ʻa hono mahuʻinga ke ʻoua naʻa ala ki he fanga kiʻi fakatātā ʻo e ʻAloʻí koeʻuhí he ʻe lava ke nau maumau. Ko ha kiʻi tamasiʻi talangofua ʻaupito ʻa Kēlepi—naʻá ne talangofua maʻu pē—pea naʻá ku ʻilo he ʻikai toe hoko ha meʻa pehé ni.

Fakakaukau angé ki heʻeku ʻohovale ʻi heʻeku hifo ki lalo ʻi he pongipongi hono hokó ʻo sio ki he meʻa tatau pē ʻo hangē ko e pongipongi kimuʻá. Naʻá ku ʻalu hangatonu atu ai pē ʻo kumi mai ʻa Kēlepi. Naʻá ku fokotuʻu ia ʻi muʻa ʻi he seti fakatātā ʻo e ʻAloʻi kuo moveuveú ʻo ʻeke ange, “Naʻá ke ala ki he ʻaiʻangakai ʻo e manú?” Naʻe sio mai hono fofonga kanoʻi mata lanu pulū fuopotopotó kiate au peá ne tali mai,“ʻIo.”

“ʻOkú ke manatuʻi ʻoku ʻikai totonu ke ke ala ki he ʻaiʻangakai ʻo e manu ʻa Mamí?” Ko ʻeku fehuʻí ange ia. Naʻe toe fai mai pē ʻa e tali tatau: “ʻIo.”

“Pea ko e hā ʻa e ʻuhinga naʻá ke ala ai ki aí?” Naʻá ku fakafehuʻi ange.

Naʻe mahinongofua ʻene talí, “Koeʻuhí he ʻoku ʻikai ke nau lava ʻo sio kia Sīsū.”

Naʻá ku siofi fakalelei ʻa e ʻaiʻangakai ʻo e manú ʻo ʻiloʻi mahalo naʻe ʻi ai pē ha faʻahinga fokotuʻutuʻu ki he meʻa naʻe moveuveú. Naʻe feinga hono kiʻi nima feifeiʻavalé ke fokotuʻutuʻu ʻa e fakatātā ʻo e ʻAloʻí kotoa pē ke nau takatakaiʻi ʻa e konga mahuʻinga taha ʻo e setí—ko e kiʻi pēpē ʻi he ʻaiʻangakai ʻo e manú. Naʻe lava ʻa e fakatātā ʻo e ʻAloʻí kotoa pē ʻo sio lelei ki he kiʻi pēpeé ʻi hono faʻo fakaʻefiʻefiʻi kinautolu ʻi he kiʻi fale tauhiʻanga monumanu siʻisiʻí. Naʻe lava ʻa e taha kotoa pē ʻo sio kia Sīsū.

Ko ha lēsoni maʻongoʻonga ia.

Ko ia ai, naʻe tuku ai pē ʻema fakaʻaliʻalí ʻi he tuʻunga ko iá ʻi he toenga ʻo e faʻahitaʻú, pea ʻi he taʻu kotoa pē talu mei ai.

Ko e meʻa ʻoku mālié, ko e taimi pē naʻe fokotuʻutuʻu fakalelei ai ʻa e ngaahi fakatātā ʻo e ʻAloʻí takitaha ʻi ha siakale ʻo takatakaiʻi ʻa e kiʻi pēpeé, naʻe ʻikai pē ke toe ala ʻa Kēlepi ia ki he setí. Naʻá ne fiemālie pē ki he fokotuʻutuʻu ko iá. Kuo hoko ʻa e tokotaha mahuʻinga tahá ko e meʻa ia ke tukutaha ai ʻa e tokangá.

ʻOku tukutaha hoʻo tokangá ʻi fē ʻi he faʻahitaʻu Kilisimasi ko ʻení?

ʻOkú ke lava nai ʻo sio kia Sīsū?