Ko Hono Vahevahe Atu ʻo e Kilisimasí

ʻI he faʻahitaʻu Kilisimasi kuo ʻosí, naʻá ku nofotaha ʻi hono lau ʻa e ngaahi talanoa ʻo e Kilisimasí mei he folofolá pea vahevahe ia ki he niʻihi kehé. ʻI ha pō ʻe taha lolotonga haʻaku toʻotama ʻi he kiʻi taʻahine taʻu fā ʻoku ou tokoua ʻaki ko Poetí, naʻá ku ʻeke ange ki ai pe ko e hā ʻoku makehe ai ʻa e taimi Kilisimasí. Naʻe kamata ke ne talanoa ʻo kau kia Sanitā mo e ngaahi meʻaʻofá. Naʻá ku fakamatalaʻi ange kiate ia ʻoku mātuʻaki mahuʻinga ʻa e Kilisimasí koeʻuhí ko Sīsū.

Naʻá ku fakaʻaliʻali ange kia Poeti ha kiʻi tohi māhina makehe ʻi he holisí naʻe ʻi ai ha fakatātā ki he talanoa ʻo e Kilisimasí. Naʻá ne fakatokangaʻi ʻoku hangē ʻoku ulo mai ʻa e fakatātā ʻo e kiʻi pēpē ko Sīsuú, peá u fakamatalaʻi ange kiate ia ʻoku makehe ʻaupito ʻa Sīsū. Naʻá ku talaange kiate ia naʻá Ne hāʻele mai ki māmani ke pekia maʻatautolu koeʻuhí ke tau lava ʻi ha ʻaho ʻe taha ʻo nofo mo Ia. Naʻá ma sio ʻi ha ngaahi vitiō mo sio ki Hano ngaahi tā.

Naʻá ku lotu ʻi he pō ko iá ke u lava ʻo manatuʻi ʻa e laumālie naʻá ku ongoʻí pea ke manatuʻi ʻe Poeti ʻa e ngaahi meʻa naʻá ku akoʻi ange kiate iá.

Hili ha ngaahi uike siʻi mei ai, naʻe fakataha mai homau fāmilí ʻi he Efiafi kimuʻa ʻi he Kilisimasí. Hili ʻemau fai ha fanga kiʻi vaʻinga, pea fakaava ʻa e ngaahi meʻaʻofá, mo mamata ʻi he vitiō ʻa e Siasí “The Christ Child,” naʻe ʻalu ʻa Poeti ki he tēpilé ke fai haʻane valivali. Naʻá ku mamata ki heʻene fakaʻaliʻali ange ki he taʻu ua ko Sēletí naʻá ma tuongaʻane ʻakí, ʻa e fakatātā naʻá ne tā ʻo e kiʻi pēpē ko Sīsuú ʻi ha ʻaiʻangakai ʻo e manú, kae pehē kia Mele mo Siosefa. Ko e meʻa naʻá ku saiʻia aí ko ʻene tā ha ulo ngingila takatakai ʻi he kiʻi pēpeé. Naʻá ne fakamatalaʻi ange kia Sēleti naʻe ulo ngingila ʻa [Sīsuú] koeʻuhí he naʻá Ne fuʻu makehe.

Naʻe manatuʻi lelei pē ʻe Poeti ʻa e meʻa naʻá ku akoʻi ange kiate iá. Naʻá ku ongoʻi fiefia he sio ki heʻene vahevahe ʻa e talanoá ki he niʻihi kehé, ʻo hangē pē ko ia naʻá ku faí.

ʻOku ou ʻiloʻi ʻa e mahuʻinga ʻo hono vahevahe ʻo e ngaahi talanoa ʻo Kalaisí mo kinautolu ʻoku mau feohí, ʻo fakatou tatau pē ki he kakai kei talavou mo toulekeleká. ʻOku ou maʻu ʻi he taimí ni ha fakamoʻoni mālohi ange ki he makehe moʻoni ʻo Kalaisí.