Kilisimasi ʻi he Faʻahitaʻu Failaú

Tā fakatātā ʻa Simona Love

Ko e Kilisimasi lelei taha ʻa homau fāmilí naʻe ʻikai ke hoko ia ʻi he ʻAho Kilisimasí. Naʻe hoko ia ʻi he Toetuʻú.

Naʻe ʻi ai ha Kilisimasi ʻe taha naʻe ʻikai ke nau fuʻu tokanga ki ai koeʻuhí he naʻe lahi ange ʻa e tokanga ki homa foha ko Tená, ʻa ia naʻe faingataʻaʻia ʻi falemahaki ʻi ha mahaki matuʻaki fakatuʻutāmaki. Naʻe fai hano faitoʻo pea mohe ai pē ia he foʻi uike ʻe 10. Naʻe kei hoko atu pē ʻene mohé ʻi he taimi Kilisimasí.

Naʻe fakafiefia hono toe maʻu māmālie ʻe Tena hono iví pea lava ke ne foki mai ki ʻapi ʻi he faʻahitaʻu failaú. ʻI he fakaofi mai ʻa e Toetuʻú, naʻa mau talanoa ʻo kau ki he ʻikai ke ʻiloʻi ʻe Tena ʻa e Kilisimasí. Naʻe fakakaukau hono ngaahi tuofāfiné mo e tokouá ke ʻai ha meʻa ke ne toe maʻu ai ʻa e taimi Kilisimasí. Naʻá ma fakakaukau ki hano fakafiefia ʻo hano liliu ʻa e Toetuʻú ki ha ʻaho mālōlō ʻe ua.

Ke mateuteu ki heʻemau kātoanga Kilisimasi ʻi he faʻahitaʻu failaú, naʻa mau toʻo hake ha puha ʻo ha ngaahi maama Kilisimasi, ʻo ngaohi ʻaki ha kiʻi fuʻu ʻakau Kilisimasi, pea fakatau mai mo kofukofu ha fanga kiʻi meʻaʻofa Kilisimasi maʻá e taha kotoa.

ʻI he pō kimuʻa ʻi he Toetuʻú, naʻa mau tui ha ngaahi pulupulu kaukau motuʻa mo ha ngaahi teunga naʻe ngaohi ki ha fakaʻaliʻali ʻo e ʻAloʻí ki he fāmilí ʻi he “Efiafi Kimuʻa ʻi he Kilisimasí.” Naʻa mau lau mei he folofolá fekauʻaki mo e hā ʻa e ʻāngeló kia Mele mo Siosefá, ʻena fononga ki Pētelihemá, mo ʻena fekumi ki ha feituʻu ke na nofo ai ka naʻe ʻikai ha loki naʻe ʻatā ʻi he fale tali-fonongá.

Naʻa mau lau foki ki hono tokangaʻi ʻe he kau tauhisipí ʻenau tākangá ʻi he poʻulí, hā mai ʻa e ʻāngelo ʻa e ʻEikí kiate kinautolú, mo hivaʻi ʻe ha kuaea ʻa e kau ʻāngelo mei he langí ʻa e, “Fakafetaʻi ki he ʻOtuá ʻi ʻolunga, pea ʻi māmani ʻa e melinó, ko e ʻofa ki he kakai” (Luke 2:14). ʻI heʻemau fakaʻaliʻalí, naʻe ʻaʻahi ʻa e kau tauhisipí ki he fale ʻoku tauhi ai ʻa e fanga monumanú pea naʻe tui ai heʻemau fānaú ʻa e teunga ʻo e fanga monumanu ʻi he fāmá (ʻi he taʻu ko iá, naʻe kau foki ʻi heʻemau fale tauhiʻanga monumanu ʻo e ʻAloʻí ha kiʻi sīlafi!).

Naʻe ʻikai ngata pē ai ʻemau fakaʻaliʻali Kilisimasi fakafāmilí. Koeʻuhí he ko e taimi Toetuʻú ia, naʻe hokohoko atu ʻemau lau ki he anga ʻo e tupulaki ʻa e pēpē ko Sīsuú ʻi he lahí, ʻaʻahi mo akoʻi ha kau mataotao fakaʻatamai ʻi he falelotu lahí, fakahoko ha ngaahi mana, ngāue fakaetauhi ki Hono kakaí, pea fakataha mo ʻEne kau ʻAposetoló ʻi ha loki ʻi ʻolunga ʻi Selusalema, ʻa ia naʻá Ne fakafeʻiloaki ai ʻa e sākalamēnití.

Naʻa mau lau ʻi he loto ʻapasia ʻa e talanoa ʻo e hū ʻa Sīsū ki he Ngoue ko Ketisemaní ke kamata ʻEne ngāue fakalelei kāfakafá—ke mamahi, tautaʻa, pea pekia maʻatautolu. Pea naʻa mau lau leva ki he anga ʻEne toetuʻu ʻi he ʻaho hono tolú. Naʻá Ne ikunaʻi ʻa e maté—ʻa ʻEne pekiá mo haʻatautolú. Naʻe fakamanatuʻi mai ʻeni kiate kimautolu koeʻuhí ko Ia, ʻoku malava ʻa e meʻa kotoa pē.

ʻI he pongipongi Toetuʻú, naʻa mau fuʻu ʻā pongipongia ʻaupito. Naʻa mau fiefia ʻi he ulo ʻo e ngaahi maama fakalanulanu Kilisimasí ʻo ne fakamaama ʻa e fakapoʻuli kimuʻa ʻi he mafoa ʻa e atá. Naʻa mau fakaava fiefia hake ʻemau meʻaʻofá pea maʻu ʻemau meʻatokoni pongipongi angamaheni ʻi he Kilisimasí ko e mā ʻoku faingofua hono pakipakí. ʻI he kamata ke ulo mālohi mai ʻa e laʻaá ʻi tuʻá, naʻa mau kumi ʻa e ngaahi fuaʻimoa Toetuʻú mo fakafiefiaʻi ʻa hono fakaofo ʻo e Toetuʻú. Naʻa mau maʻu ʻa e sākalamēnití ʻi he lotú, ʻa ia naʻá ne ʻomi ʻa e moʻoni ʻo e Fakalelei ʻa e Fakamoʻuí ʻi he lolotonga ní.

Naʻe hanga ʻe hono fakamanatua fakataha ʻa e “Kilisimasí mo e Toetuʻú” ʻo ʻai ke mau toe ʻilo lelei ange ta ʻoku toki mahino lelei taha ʻa e Kilisimasí mo e Toetuʻú ʻi hono fakamanatua fakatahá. ʻOku totonu ke mahino fakataha pē ʻa e Kilisimasí mo e Toetuʻú koeʻuhí he ʻoku fonu ia ʻi he talaʻofá, pea mahino fakataha ʻa e Toetuʻú mo e Kilisimasí koeʻuhí he ʻoku fakafofongaʻi ʻe he Toetuʻú ʻa hono fakahoko ʻo e ngaahi talaʻofa ki he misiona ʻo Sīsū Kalaisí.

Naʻa mau vakai fiefia ki he aʻusia ko ʻení koeʻuhí he naʻa mau fakataha pē mo Tena ʻi ha toe Kilisimasi ʻe taha kimuʻa peá ne mālōloó. ʻI he ʻaho ní, ʻoku mau sio pē ki muʻa ʻi he loto falala ko ʻemau māvahevahe mo Tená ʻoku kiʻi taimi nounou pē koeʻuhí he ʻoku tau fiefia ʻi he Kilisimasí he kuo “fanauʻi kiate kitautolu ha tamasiʻi” (ʻĪsaia 9:5), pea ʻoku mau manatuʻi ʻi he Toetuʻú—pea manatuʻi maʻu pē—he [“kuó Ne toetuʻu”] (vakai, Mātiu 28:6).