Ngāue Tokoni ʻa e Telefoni Toʻotoʻó

Tā fakatātaaʻi ʻe Michael Mullan

ʻI ha taʻu ʻe taha, naʻá ku ʻalu ai mo ʻeku fineʻeikí, mo hoku tuofefiné ki he ʻapi ʻo ʻeku faʻētangatá ke mau nofo ai ʻi he ngaahi ʻaho mālōloó. ʻI ha ʻaho ʻe taha kimuʻa pea mau ʻalú, naʻá ku tamateʻi kotoa ʻeku ngaahi polokalama mītia fakasōsialé koeʻuhí he naʻa nau uesia moʻoni hoku tuʻunga fakalaumālié. Naʻá ku ʻiloʻi ko e meʻa lelei tahá ʻa e mavahe mei he mītia fakasōsialé, ka naʻá ku ongoʻi taʻelata mo tuenoa. Hili ha ngaahi ʻaho lahi hili ʻeku mavahe mei ʻapí, naʻe ʻikai ke fetuʻutaki mai ha taha kiate au, pea naʻá ku ongoʻi ʻoku hangē ʻoku ʻikai tokanga mai ha taha ia kiate au.

Naʻá ku kei ongoʻi taʻelata pē mo loto-mamahi ʻi he ʻAho ʻo e Taʻu Foʻoú. Ka naʻá ku maʻu ha text ko ha pōpoaki taʻeʻamanekina mei haku kaungāmeʻa, ʻo fakamonūʻia mai ke u maʻu ha Taʻu Foʻou fiefia. Naʻe ʻikai ke ma fuʻu vāofi, ka naʻe ongo ʻaupito ʻene pōpoakí kiate au—ʻo mahino ʻoku ʻi ai ha taha ʻoku tokanga mai.

Naʻá ku maʻu leva ha ueʻi—ko e hā ʻoku ʻikai ke u ʻave ai ha pōpoaki text ki hoku ngaahi kaungāmeʻá kotoa? Naʻá ku kamata leva ʻi he taimi pē ko iá ʻa hono fakaʻamua ke nau maʻu takitaha ha Taʻu Foʻou fiefia mo fakahā ʻa ʻeku houngaʻia ʻiate kinautolú. Mahalo pē naʻe ʻi ai hanau niʻihi naʻa nau fiemaʻu ha taha ke fetuʻutaki ange kiate kinautolu. Naʻe fakafokifā pē ʻa e faingofua ange kiate au ke u ʻiloʻi ʻa e fasi naʻe taá pea mo e fiefia naʻe hā mai mei hoku kāingá. Naʻá ku ongoʻi ʻa e Laumālié, pea hokohoko atu ʻeku ongoʻi fiefiá ʻi he ʻahó kotoa.

ʻOku ou houngaʻia ʻaupito ʻi hoku kaungāmeʻá ʻi heʻene ʻomi ʻa e text ko iá, pea ʻoku ou fiefia naʻá ku talangofua ki he ueʻi ke tuku atu mo haʻaku pōpoaki. Naʻe tokoni ʻa e meʻá ni ke u kakapa atu ʻo tokoniʻi ʻa e niʻihi kehé ʻi he taimi naʻá ku ongoʻi ai ʻoku ou fiemaʻu ha taha ke tokoni mai kiate aú. ʻOku ou ʻiloʻi ʻoku moʻoni ʻa e ngaahi lea ko ʻeni ʻa Palesiteni M. Lāsolo Pālati (1928–2023): “Te tau maʻu ʻa e nongá, nēkeneká, mo e fiefiá ʻi heʻetau moʻuí ʻi he taimi ʻoku tau tokoni ai ki he ʻEikí mo hotau kaungāʻapí.”