ʻOku ʻIkai ke Ne Fakangaloki Kitautolu

Naʻe mātuʻaki faingataʻa hoku ʻuluaki taʻu ʻi he akoʻanga māʻolungá. Naʻá ku ako pē ʻi he ʻinitanetí koeʻuhí ko e COVID-19. Lolotonga ʻa e taʻu ko iá, naʻe maʻu ʻe heʻeku tangataʻeikí ʻa e COVID peá ne mālōlō ai. Naʻá ku fefaʻuhi mo e meʻa fakamamahi ko iá ʻi he taʻú kakato. Hili ha taʻu ʻe taha mei ai, naʻe mālōlō mo ʻeku kui tangatá. Lolotonga hoku taʻu fakaʻosí, naʻe mālōlō ʻeku kui fefiné. Naʻá ku ʻi he lokí pē mo ia ʻi he taimi naʻá ne mālōlō aí.

Naʻá ku ongoʻi tuenoa maʻu pē koeʻuhí ko e ngaahi meʻa ko ʻeni naʻe hoko ki heʻeku moʻuí. Naʻá ku ongoʻi hangē naʻe ʻi ai ha meʻa hala naʻá ku fai pe ko hono totongi ʻeni ʻeku ngaahi fehalākí pe ko ha meʻa pehē. ʻI he taimi foki ko ʻení, naʻe ʻikai ke u tauhi ʻa e ngaahi fekaú. Naʻe ʻikai ke u fakaulo atu ʻa e maama ʻo Kalaisí ʻiate au.

ʻI ha ʻaho ʻe taha, lolotonga haʻaku lau ʻa e ngaahi lea ʻo e himi “ʻOku Fakaofo” (Ngaahi Himí, fika 102), naʻe ongo moʻoni kiate au ʻa e foʻi laine [“ʻE anga fēfē ha ngalo ʻiate au ha faʻahinga ʻaloʻofa, faʻahinga ʻofa mo ha mateaki pehē?”] ʻI heʻeku lau iá, naʻá ku ongoʻi ha māfana makehe. Naʻe hanga ʻe he ngaahi foʻi lea ko e “ʻe anga fēfē ha ngalo ʻiate au” ʻo ʻai ke u kiʻi fakakaukau. ʻI he ngaahi meʻa kotoa kuó u faingataʻaʻia mo foua ʻi hono kotoa ʻo ʻeku moʻuí, naʻá ku loto ke fakangaloʻi. Naʻá ku loto ke maʻu ha founga faingofua ange, ke fiefia, pea fai ʻa e ngaahi meʻa naʻe ʻikai totonú, pea ʻikai pē ke fai ha falala kia Sīsū Kalaisi.

Neongo naʻá ku ongoʻi puputuʻu mo feinga ke ʻalu ʻo hē, ka naʻe ʻikai tuku ʻe Sīsū Kalaisi ke ngalo ʻiate au ʻEne ʻaloʻofá mo e ʻofá. ʻI heʻeku loto-mamahí, naʻe ʻikai te Ne fakangaloki au. Ko ia, kapau naʻe ʻikai ke Ne fakangaloki au, pea ʻoku totonu ke ʻoua naʻa ngalo Ia ʻiate au.

ʻOku ou tui neongo kapau ʻokú ke tuenoa mo fakakaukau he ʻikai ke ʻoatu ʻe he ʻOtuá haʻo toe faingamālie, te Ne kei ʻoatu pē ho faingamālie. ʻOkú Ne ʻofa mo tokanga atu kiate koe.