Fakataha ʻo e Hoʻatā Sāpaté
Ngaahi Folofola Toputapú—ko e Fakavaʻe ʻo e Tuí
Ngaahi Konga Fakamatalá
Naʻá ku mamata kimuí ni mo hoku uaifi ko Melé ʻi ha falani ʻoku tā ai ha fakatātā ʻo ha tohi pea mo ha pōpoaki ʻi muʻa naʻe pehē: “ʻŪ Tohi: Ko e ʻUluaki Meʻangāue Toʻotoʻó.” …
Tatau ai pē pe ʻoku toʻotoʻo pe fakaʻilekitulōnika, ko e Tohi Tapú mo e Tohi ʻa Molomoná: Ko ha Fakamoʻoni ʻe Taha ʻo Sīsū Kalaisí, ʻokú na ʻomai ʻa e tataki fakalaumālie mo e akonaki meia Sīsū Kalaisi, ko e Fakamoʻui ʻo e māmaní. …
Hangē ko ʻeku lavé, naʻa ku mālieʻia ʻi he fakakaukau ki he meʻangāue toʻotoʻó—ko ha tohi. Ka neongo ia, ʻoku ou ʻilo hono mahuʻinga lahi ʻo e ʻinitanetí ʻi māmani ʻi he ʻaho ní. … ʻOku hoko ʻa e ʻinitanetí ko ha meʻangāue ʻaonga moʻoni ki hono ako ʻo e ongoongoleleí. Ko e ʻaho ní, ʻoku vahevahe ʻe ha kakai tokolahi ʻa e folofolá mo honau ngaahi kaungāmeʻá ʻo fakaʻaongaʻi ʻa e tekinolosiá. …
ʻOku akoʻi kitautolu ʻe he folofolá ke tau fakakaukau lelei mo fakapotopoto ʻi he meʻa kotoa. ʻE lava ke ngāue ʻaki ʻa e ʻinitanetí ʻi ha founga lelei pe founga fakatuʻutāmaki. …
… ʻOua ʻe fakakaukau ki he meʻa ʻoku taʻetāú, taʻe-faitotonú, pe taʻe-māʻoniʻoní. … Fakafonu hoʻo moʻuí ʻaki ʻa e ngaahi fakakaukau lelei, mo māʻoniʻoní; moʻui fiefia; pea feohi fiefia kae fakaʻehiʻehi mei he taʻe-fakapotopotó. ʻOku ʻi ai ha kehekehe. … Kae mahuʻinga tahá, fakafemoʻuekinaʻi maʻu pē koe ʻi he Tohi ʻa Molomoná, he te ne ʻomi ʻa e Laumālié ki hoʻo moʻuí mo tokoni ke ke ʻilo ʻa e moʻoní mei he halá.
Ko ʻeku naʻinaʻi kiate kinautolu ʻoku fakahehema ʻi ha faʻahinga founga pē mei he hala ʻo e fuakavá ke ke foki ki he ngaahi folofola toputapú, fakahinohino fakaepalōfitá, tauhi ʻo e tuʻunga fakalotú ʻi he ʻapí, pea mo e ʻū hiva ʻo e tuí. ʻOku mahuʻinga ʻa e laumālie kotoa ki he ʻEikí. ʻOku mau fiemaʻu koe! ʻOku fiemaʻu koe ʻe he ʻEikí, pea ʻokú ke fiemaʻu Ia! ʻE talitali lelei maʻu pē koe.