Fakataha ʻo e Pongipongi Tokonakí
Ko e Ikuna ʻo e ʻAmanaki Leleí
Ngaahi Konga Fakamatalá
Ko e meʻafoaki ʻo e ʻamanaki leleí ko ha fakakoloa mahuʻinga lahi ia mei he ʻOtuá. …
ʻI heʻetau fakamālohia ʻetau tui kia Sīsū Kalaisí, ʻoku ope atu ʻetau vakaí mei hotau ngaahi faingataʻaʻiá ki he ngaahi tāpuaki mo e talaʻofa ʻo e taʻengatá. Hangē ko ha maama ʻoku tupulaki ʻene ulo ngingilá, ʻoku fakamaama ʻe he ʻamanaki leleí ʻa e māmani kuo fakapoʻulí, pea tau vakai ki hotau kahaʻu nāunauʻiá. …
Siʻoku ngaahi tokoua mo e tuofāfine, ko e ʻamanaki leleí ko ha meʻafoaki moʻui ia, ko ha meʻafoaki ʻoku tupulaki ʻi heʻetau fakalahi ʻetau tui kia Sīsū Kalaisí. … ʻOku tau langa ʻa e tuʻunga ko ʻení—ʻa e ngaahi kongokonga fakamoʻoni ʻo ʻetau tuí—ʻi he lotú, ngaahi fuakava ʻo e temipalé, tauhi ʻo e ngaahi fekaú, keinanga maʻu pē mei he folofolá pea mo e ngaahi lea ʻa e kau palōfita ʻi onopōní, maʻu ʻo e sākalamēnití, pea mo e lotu fakauike mo hotau Kāingalotú.
Ke fakamālohia ʻetau ʻamanaki leleí ʻi he kuonga ʻoku fakautuutu ai ʻa e koví, kuo tataki ʻe he ʻEikí ʻEne palōfitá ke langa Hono ngaahi temipalé ʻi he māmaní. …
ʻOku ʻikai ha mamahi, mahaki, fakamaau taʻetotonu, faingataʻaʻia, ʻikai ha meʻa ke ne fakafeʻātungia ʻetau ʻamanaki leleí ʻi heʻetau tui mo puke maʻu ʻetau ngaahi fuakava mo e ʻOtuá ʻi he fale ʻo e ʻEikí. Ko ha fale ia ʻo e maama, ko ha fale ʻo e ʻamanaki lelei. …
Siʻi kāinga, mahalo he ʻikai vave ʻa hoʻo maʻu ʻa e fiemālie ʻokú ke fiemaʻú, ka ʻoku ou palōmesi atu, ʻi hoʻo falala ki he ʻEikí, te ke maʻu ʻEne fiemālié.
ʻOfa ke tau tanumaki ʻetau tui mahuʻingá, pea vilitaki atu ʻi ha ʻamanaki ʻoku mālohi haohaoa. ʻOku ou fakamoʻoni ko ʻetau ʻamanaki leleí ʻa hotau Fakamoʻui ko Sīsū Kalaisí. ʻE hoko ʻo moʻoni ʻa ʻetau ngaahi fakaʻānaua māʻoniʻoni kotoa pē ʻo fakafou ʻiate Ia. Ko Ia ʻa e ʻOtua ʻo e ʻamanaki leleí—ikuna ʻo e ʻamanaki leleí. ʻOkú Ne moʻui mo ʻofa ʻiate koe.