ʻE Toʻu Tupu Tofiʻa Fakaʻeiʻeiki

Tofiʻa tukufakaholó! … Ko ha kupuʻi lea fakamāfana ia. Ka ʻoku ʻuhinga ia ki he hā? …

… ʻOku tau talanoa fekauʻaki mo e tofiʻa ʻokú ke maʻu ʻi hoʻo hoko ko e kaungā ʻea-hoko mo Kalaisí koeʻuhi ko e vā fakafuakava kuó ke fili ke fakahoko mo Ia pea mo hoʻo Tamai ʻi Hēvaní.

Fakakaukau ki ai! ʻOku falala atu ʻa e ʻOtuá kiate koe—ʻi he kotoa ʻo e kakai ʻo e māmaní, ko e fānau ʻo e fuakavá—ʻa ʻEne kau kauvaká—ke ke tokoni ki Heʻene ngāue ke ʻomi kotoa ʻEne fānaú ke malu ʻi ʻapi mo Iá. …

… Ko ha toʻu tupu tofiʻa fakaʻeiʻeiki koe. Ko hoʻo vā fakafuakava mo e ʻOtuá mo Sīsū Kalaisí ko ha vā ia ʻo e ʻofa mo e fefalalaʻaki, ʻa ia ʻokú ke maʻu ai ha konga lahi ange ʻo ʻEna ʻaloʻofá—ko ʻEna tokoni fakalangí, fakakoloa ʻo e mālohí, mo ha mālohi fakaivia. Ko e mālohi ko iá, ʻoku ʻikai ko ha fakaʻānaua pē, pe ko ha meʻa kumi monū, pe ko hano fakahoko ʻo ha fakaʻamu. Ko ha meʻa moʻoni ia.

ʻOku ʻikai ke ke teitei tuenoa ʻi hoʻo fakakakato ho ngaahi fatongia ki hoʻo tofiʻa tukufakaholó. … ʻOkú ke ngāue fetakinima mo Sīsū Kalaisi. Hili hono fakahoko ʻo e fuakava foʻou takitaha—pea ʻi he fakaʻau ke fakaloloto ange ho vā mo Iá—ʻokú mo fepikitaiʻaki vāofi ange kae ʻoua kuo fakamaʻu fakataha kimoua. ʻI he fakataipe toputapu ko ia ʻo ʻEne ʻaloʻofá, te ke maʻu ai ʻa e holi pea mo e mālohi ke moʻui ʻo hangē tofu pē ko e moʻui ʻa e Fakamoʻuí—ʻo kehe mei he māmaní. Te ke lavaʻi ia he ʻoku poupouʻi hake koe ʻe Sīsū Kalaisi! …

… ʻOua naʻa tuku ke liliu koe ʻe he māmaní lolotonga ia hono fanauʻi koe ke ke liliu ʻa e māmaní.