Fakataha ʻo e Hoʻatā Tokonakí
Talitali Lelei ki he Siasi ʻo e Fiefiá
Ngaahi Konga Fakamatalá
Koeʻuhí ko e palani ʻofa ʻa ʻetau Tamai Hēvaní ki Heʻene fānaú takitaha, pea mo e moʻui mo e misiona huhuʻi ʻa hotau Fakamoʻui ko Sīsū Kalaisí, te tau lava—pea ʻoku totonu ke tau—hoko ko e kakai fiefia taha ʻi he māmaní! …
… Pea ʻoku ʻikai ha toe feituʻu ʻoku totonu ke ʻilonga ange ai ʻetau hoko ko ha kakai fiefiá ka ko e taimi ʻoku tau fakataha ai ʻi he ʻaho Sāpaté ʻi heʻetau houalotu sākalamēnití ke moihū ki he tupuʻanga ʻo e fiefia kotoa pē! …
ʻApasia fiefia? Mahalo te ke fehuʻi, “ʻOku ʻi ai ha meʻa pehē?” ʻIo, ʻoku ʻi ai! ʻOku tau ʻofa moʻoni, fakalāngilangiʻi, mo fakaʻapaʻapaʻi hotau ʻOtuá, pea ʻoku makatuʻunga ʻetau ʻapasiá mei ha laumālie ʻoku fiefia ʻi he fuʻu ʻofa lahi, ʻaloʻofa, mo e fakamoʻui ʻa Kalaisí! …
Kapau ko ʻetau fakatahá ke fakamanatua e Fakamoʻuí mo e huhuʻi naʻá Ne fakahokó, ʻoku totonu ke hāsino mei hotau fofongá ʻa ʻetau fiefiá mo e houngaʻiá! …
… ʻOku lekooti ʻe he folofolá “ko e hiva ʻa e kau māʻoniʻoní ko ha lotu ia [ki he ʻOtuá]” [Tokāteline mo e Ngaahi Fuakava 25:12] ʻa ia ʻoku fiefia ai ʻa Hono laumālié. Ko ia ai tau hiva! Pea fakavīkivikiʻi Ia!
ʻOku tau fakatefito ʻetau leá mo e fakamoʻoní ʻi he Tamai Hēvaní mo Sīsū Kalaisi pea mo e ngaahi fua ʻo e moʻui ʻaki ʻi he loto-fakatōkilalo ʻa ʻEna ongoongoleleí, ʻa e ngaahi fua ʻoku “melie hake ʻi he meʻa melie kotoa pē” [ʻAlamā 32:42]. …
… Tatau ai pē pe naʻa tau tangi ko e loto-mamahi pe tangi ko e houngaʻia lolotonga ʻa e sākalamēnití, ʻai ke hoko ia ko ha fuʻu ofoofo lahi ʻi he ongoongo fakafiefia ki hono meʻaʻofa ʻaki ʻe he Tamaí ʻa Hono ʻAló! …
… Ko ha fakaafe eni ke maʻu ʻa e meʻaʻofa ʻa e Fakamoʻuí ʻo e melinó, māmá, mo e fiefiá—ke nēkeneka lahi ai, ke ofoofo ai, pea ke fiefia moʻoni ai ʻi he Sāpate kotoa pē. …
ʻOku talitali lelei kimoutolu ki he siasi ʻo e fiefiá!