Ko e Muimui ʻia Kalaisí

Ko e Muimui ʻia Kalaisí ʻoku ʻikai ko ha ngāue noa pē pe fakataimi. Ko ha tukupā hokohoko ia mo ha tōʻonga moʻui ʻoku totonu ke ne tataki kitautolu ʻi he taimi kotoa pē pea ʻi he feituʻu kotoa pē. ʻOku tofa ʻe Heʻene ngaahi akonakí mo e sīpingá ʻa e halá maʻá e ākonga kotoa pē ʻa Sīsū Kalaisi. …

ʻOku ʻomi ʻe he ngaahi fekau ʻa e ʻOtuá ʻa e ivi tākiekina mo taʻeueʻia ʻi heʻetau moʻuí. …

ʻOku toe ʻi ai ha akonaki ʻa e Fakamoʻuí ʻoku ngali fiemaʻu hano toe fakamamafaʻi ʻi hotau ngaahi tūkunga ʻi he ʻaho ní.

Ko ha taimi ʻeni ʻo e ngaahi lea kakaha mo fakalavealoto ʻi he ngaahi fetuʻutaki mo e kakaí pea ʻi he taimi ʻe niʻihi ʻi hotau ngaahi fāmilí. …

Ko e hā ʻoku totonu ke akoʻi mo fai ʻe he kau muimui ʻa Kalaisí ʻi he taimi ko ʻeni ʻo e ngaahi fetuʻutaki ʻoku ʻikai leleí? Ko e hā ʻEne ngaahi akonakí mo e sīpingá? …

… ʻOku fiemaʻu ke tau ʻofa mo fai lelei ki he taha kotoa pē. ʻOku fiemaʻu ke tau fakaʻehiʻehi mei he fakakikihí pea hoko ko e kau faʻa fakalelei ʻi heʻetau ngaahi fetuʻutaki kotoa pē. ʻOku ʻikai ʻuhinga ʻeni ke uesia ai ʻetau ngaahi tefitoʻi moʻoní mo e ngaahi meʻa mahuʻingá, ka ke taʻofi ʻa hono fakaangaʻi ʻa e niʻihi kehé koeʻuhi ko ʻenau ngaahi tefitoʻi moʻoní. Ko e meʻa ia naʻe fai ʻe hotau Faʻifaʻitakiʻanga Haohaoá ʻi Heʻene ngāue fakafaifekaú. Ko e sīpinga ia naʻá Ne fokotuʻu maʻatautolu ʻi Heʻene fakaafeʻi kitautolu ke muimui ʻiate Iá. …

ʻI heʻetau hoko ko e ākonga ʻa Kalaisí, ʻoku tau akoʻi mo fakamoʻoniʻi ʻa Sīsū Kalaisi, ko hotau Faʻifaʻitakiʻanga Haohaoá. Ko ia, tau muimui muʻa ʻiate Ia ʻaki ʻetau fakaʻehiʻehi mei he fakakikihí. ʻI heʻetau poupou ki he ngaahi tūkunga fakapolitikale ʻoku tau kau ki aí, tau fakafeʻungaʻi muʻa kitautolu maʻa ʻEne ngaahi tāpuakí ʻaki hono fakaʻaongaʻi ʻo e ngaahi lea mo e founga ʻo ha kakai faʻa fakalelei. ʻI hotau ngaahi fāmilí mo e ngaahi vā fetuʻutaki fakataautaha kehé, tau fakaʻehiʻehi muʻa mei hono ngāue ʻaki ʻa ia ʻoku kakahá mo tāufehiʻá.