Fakataha ʻo e Hoʻatā Tokonakí
Ko Hono Tanu ‘Etau Meʻatau ʻo e Angatuʻú
Ngaahi Konga Fakamatalá
Ko e angatuʻú ʻe lava ke fai ʻi he fakahāhā pe fakapulipuli. …
Mahalo ko e founga kākā ange ʻo e angatuʻu ki he ʻOtuá ko e tuʻunga fakapulipulí—ʻa e taʻetokanga ki Hono finangaló ʻi heʻetau moʻuí. Ko e niʻihi tokolahi he ʻikai ke nau teitei fakakaukau ke angatuʻu fakahāhaá te nau kei malava pē ke fakafepakiʻi ʻa e finangalo mo e folofola ʻa e ʻOtuá ʻaki ʻenau tulifua ʻenau taumuʻa pē ʻanautolu kae ʻikai te nau tokanga ki ha fakahinohino fakalangi. …
Ko e ʻū heletā mo e ngaahi meʻatau kehe naʻe tanu ʻe he kau Leimana naʻe uluí ko e ngaahi meʻatau ia naʻa nau angatuʻu ʻakí koeʻuhí ko e founga naʻa nau fakaʻaongaʻi ai iá. Ko e faʻahinga meʻatau tatau pē ko iá naʻe ngāue ʻaki ʻi he nima ʻo honau ngaahi fohá ke maluʻi ʻa e fāmilí mo e tauʻatāiná, naʻe ʻikai ko ha toe meʻatau ia ke angatuʻu ʻaki ki he ʻOtuá. …
ʻI he founga tatau pē ko ʻení, ʻoku ʻi ai ha ngaahi meʻa ʻi heʻetau moʻuí ʻe lava pē ke ʻikai kau ki ha tafaʻaki pe ʻoku lelei fakanatula pē ia ka ʻi hono fakaʻaongaʻi ʻi he founga halá ʻe hoko leva ia ko ha “ngaahi mahafu ke angatuʻu ʻaki.” …
… Kapau ʻoku hoko ʻetau ʻofa ki he ʻOtuá mo ʻetau loto-fakapapau ke ngāue Maʻana ʻaki hotau iví, ʻatamaí mo e mālohí kotoa ko e makatuʻunga ia ʻo ʻetau fakamāuʻi ʻa e meʻa kotoa pē mo fai mei ai ʻetau ngaahi fakakaukau kotoa pē, tā kuo tau tanu ʻetau ngaahi mahafu ʻo e angatuʻú. ʻI he ʻaloʻofa ʻa Kalaisí, ʻe fakamolemoleʻi ʻe he ʻOtuá ʻetau ngaahi angahala mo e angatuʻu ʻo e kuohilí pea toʻo ʻa e ʻuli ʻo e ngaahi angahala mo e angatuʻu ko iá mei hotau laumālié. …
ʻOku fakatau ʻa hono tanu ʻo e ngaahi mahafu ʻoku tau angatuʻu ʻakí ki ha fiefia makehe. … Fakatauange te tau tanu—ke loloto ʻaupito—ha faʻahinga tafaʻaki pē ʻo e angatuʻu ki he ʻOtuá mei heʻetau moʻuí, ʻo fetongi ʻaki ia ha loto-vilitaki mo ha ʻatamai vilitaki.