Ko e Fiefia ‘o Hotau Huhuʻí

ʻOku fakaʻatā kitautolu ʻe he fakatomalá ke tau ongoʻi ʻa e ʻofa ʻa e ʻOtuá pea ʻiloʻi mo ʻofa ʻiate Ia ʻi ha ngaahi founga naʻe ʻikai ke tau mei ʻilo ki ai. …

ʻOku ou ʻilo ʻoku māfimafi hotau ʻEiki mo e Fakamoʻui ko Sīsū Kalaisí ke fakamoʻui. …

Mahalo te ke ongoʻi ʻi he taimi ʻe niʻihi he ʻikai malava ke huhuʻi koe, pe mahalo ʻokú ke mavahe mei he ʻofa ʻa e ʻOtuá mo e mālohi fakalelei ʻo e Fakamoʻuí koeʻuhí ko e meʻa ʻokú ke fefaʻuhi mo iá pe koeʻuhí ko e meʻa kuó ke faí. Ka ʻoku ou fakamoʻoni ʻoku ʻikai ke ke mamaʻo mei he tokoni ʻa e ʻEikí. …

ʻI he līʻoa ʻetau moʻuí ki he ʻOtuá mo tauhi ʻetau ngaahi fuakava mo Iá, ʻe lava ke foaki mai ʻe he ʻEikí ʻa e tokoni mo e mālohi ʻoku tau fiemaʻu ke fakatou fakatokangaʻi mo ikunaʻi hotau ngaahi vaivaí, kau ai ʻa e mahaki fakalaumālie kainikavea ʻo e hīkisiá. …

… ʻOku ʻikai ko ha kavenga kiate Ia ʻa ʻetau fiemaʻu ʻa e fakamoʻuí mo e tokoní, ka ko e ʻuhinga moʻoni ia naʻá Ne hāʻele mai aí. …

ʻOku ʻafioʻi koe ʻe heʻetau Tamai Hēvaní mo e Fakamoʻuí. ʻOkú Na ʻafioʻi ho lotó. ʻOkú Na tokanga ki he meʻa ʻokú ke tokanga ki aí, kau ai ʻa kinautolu ʻokú ke ʻofa aí. …

Kapau ʻokú ke fefaʻuhi mo ha tūkunga ʻokú ke pehē kuo totonu ke ke ikunaʻi ʻi he taimí ni, ʻoua naʻá ke foʻi. Faʻa kātaki pē, tauhi hoʻo ngaahi fuakavá, faʻa fakatomala, fekumi ki he tokoni hoʻo kau takí ʻo ka fiemaʻu, pea ʻalu maʻu pē ki he fale ʻo e ʻEikí ʻi he lahi taha te ke lavá. Fakafanongo pea talangofua ki he ngaahi ueʻi ʻokú Ne ʻoatu kiate koé. He ʻikai te Ne liʻaki Hono vā fetuʻutaki fakafuakava mo koé. …

Ko e ʻaho takitaha ko ha ʻaho foʻou ia ʻoku fonu ʻi he ʻamanaki leleí mo e ngaahi faingamālié koeʻuhí ko Sīsū Kalaisi.