Fakataha ʻo e Hoʻatā Sāpaté
ʻE Toe Hāʻele Mai ʻa e ʻEiki ko Sīsū Kalaisí
Ngaahi Konga Fakamatalá
ʻOku fakavaveʻi moʻoni ʻe he ʻEikí ʻEne ngāué.
Ko e hā ʻoku tau langa vave pehē ai ʻa e ngaahi temipalé? Ko e hā hono ʻuhingá? Koeʻuhí he kuo fakahinohinoʻi kitautolu ʻe he ʻEikí ke tau fai ia. ʻOku tokoni ʻa e ngaahi tāpuaki ʻo e temipalé ke tānaki ʻa ʻIsileli ʻi he ongo tafaʻaki fakatouʻosi ʻo e veilí. ʻOku toe tokoni foki ʻa e ngaahi tāpuakí ni ke teuteu ha kakai te nau tokoni ʻo teuteu ʻa māmani ki he Hāʻele ʻAnga Ua Mai ʻa e ʻEikí! …
Ko ʻeku palōmesi ʻeni kiate koé: Ko e taha kotoa pē ʻoku kumi fakamātoato kia Sīsū Kalaisí, te ne maʻu Ia ʻi he temipalé. …
Kuó u ako ko e fehuʻi mahuʻinga taha ʻeni kuo pau ke tau takitaha talí: Ko hai pe ko e hā ʻa e meʻa te u foaki ki ai ʻeku moʻuí?
Ko ʻeku fili ko ia ke muimui ʻia Sīsū Kalaisí ko e fili mahuʻinga taha ia kuó u faí. … Kuó ne toe tokoniʻi foki au ke u matuʻuaki ʻa e ngaahi matangi ʻo e moʻuí. …
ʻOku ou kole atu ke tuku haʻo taimi ʻi he uike takitaha—ʻi he toenga ʻo hoʻo moʻuí—ke fakalahi hoʻo mahino ki he Fakalelei ʻa Sīsū Kalaisí. …
Naʻe toʻo ʻe Sīsū Kalaisi kiate Ia ʻa hoʻo ngaahi angahalá, hoʻo ngaahi mamahí, hoʻo loto-mamahí, mo ho ngaahi vaivaí. ʻOku ʻikai ko ha meʻa pau ke ke fuesia toko taha pē kinautolu! …
ʻOku ʻikai ke fuʻu vave pe fuʻu tōmui ke ke hoko ko ha ākonga līʻoa ʻa Sīsū Kalaisi. …
Siʻoku ngaahi tokoua mo e tuofāfine ʻofeina, ko e lelei tahá ʻoku teʻeki ai hoko mai, koeʻuhí he ʻe toe hāʻele mai ʻa e Fakamoʻuí! Ko e lelei tahá ʻoku teʻeki ai hoko mai koeʻuhí he ʻoku fakavaveʻi ʻe he ʻEikí ʻa ʻEne ngāué. Ko e lelei tahá ʻoku teʻeki ai hoko mai ʻi haʻatau liliu kakato hotau lotó mo ʻetau moʻuí kia Sīsū Kalaisí.