Fakataha ʻo e Hoʻatā Sāpaté
Tauhi ʻa e Aká, pea ʻe Tupu ʻa e Ngaahi Vaʻá
Ngaahi Konga Fakamatalá
Ko e taha ʻo e ngaahi meʻa mahuʻinga taha ʻe lava ke tau ako ʻi he moʻui ní ko e faikehekehe ‘o e meʻa ʻoku taʻengatá mo ia ʻoku ʻikaí. …
… Ko e ngaahi moʻoni ʻe niʻihi ko e uho, ʻoku mahuʻinga, ʻi he aka ʻo ʻetau tuí. Ko e ngaahi meʻa kehé ko e tānaki pe ngaahi vaʻa pē ia—ʻoku nau mahuʻinga, ka ʻi he taimi pē ʻoku nau fehokotaki ai mo e ngaahi meʻa mahuʻingá. …
Ko hono fakalea ʻe tahá, ko Sīsū Kalaisi mo ʻEne feilaulau fakaleleí ko e aka ia ʻo ʻetau fakamoʻoní. Ko e toenga kotoa ʻo e ngaahi meʻa kehé ko e ngaahi vaʻa. …
ʻI he taimi ʻoku tau fakatupulaki ai ʻetau fakamoʻoni kia Sīsū Kalaisí, ʻoku ou fifili pe ʻoku tau faʻa fetoʻoaki ʻi he taimi ʻe niʻihi ʻa e ngaahi vaʻá ko ha ngaahi aka. …
Kuo pau ke tau fehuʻi kiate kitautolu: ʻOku makatuʻunga nai ʻeku fakamoʻoní ʻi he meʻa ʻoku ou ʻamanaki ke hoko ʻi heʻeku moʻuí? ʻOku fakafalala nai ia ki he ngaahi tōʻonga pe ʻulungaanga ʻo e niʻihi kehé? Pe ʻoku makatuʻunga mālohi nai ia ʻia Sīsū Kalaisi, ʻo “aka mo langa hake ʻiate ia,” [Kolose 2:7], tatau ai pē pe ko e hā ʻa e ngaahi tūkunga feliliuaki ʻo e moʻuí? …
ʻOku totonu ke ʻoua naʻa tau ʻamanaki ʻe mahino ʻa e meʻa kotoa kimuʻa pea tau toki ngāue. ʻOku ʻikai ko e tuí ia. … Kapau te tau tatali kae ʻoua kuo tali kotoa ʻetau ngaahi fehuʻí pea tau toki ngāue, ʻoku tau fakangatangata lahi ʻa e lelei te tau lava ʻo fakahokó, mo tau fakangatangata ʻa e mālohi ʻo ʻetau tuí. …
ʻOku kātekina ʻe he tuí ʻa e ngaahi faingataʻa mo e taʻepau ʻo e moʻuí koeʻuhí he ʻoku tuʻu maʻu ia ʻia Kalaisi mo ʻEne tokāteliné. ʻOku faʻu fakataha ʻe Sīsū Kalaisi mo ʻetau Tamai Hēvaní ʻa ia naʻá Ne fekauʻi mai Iá, ʻa e taumuʻa taʻe-liua mo falalaʻanga haohaoa pē taha ʻo ʻetau fakafalalá. …
Ko ʻeku fakaʻānaua moʻoni mo e tāpuaki ke tau tauhi maʻu pē ʻa e aka ʻo ʻetau tui ki he Fakamoʻuí, ki Heʻene tokāteliné, pea ʻi Hono Siasí.