Māʻoniʻoni ki he ʻEikí ʻi he Moʻui Fakaʻahó

ʻOku ʻākilotoa kitautolu ʻe ha ngaahi faingamālie ke kakata, fiefia, mo vakai ʻaki ha fakakaukau ʻo e houngaʻiá. Ko ‘etau ongoongoleleí ko ha ongoongolelei ia ʻo e fiefia mo e māʻoniʻoni ʻi he moʻui fakaʻahó. ʻOku hanga ʻe he māʻoniʻoní ʻo fakafaikehekeheʻi ʻa e ngaahi meʻá ki ha taumuʻa toputapu. Ka ʻoku fakaafeʻi foki kitautolu ʻe he māʻoniʻoní ke tau fefiofi ʻa e moʻui fakaʻahó mo e meʻa toputapú—ke fiefia ʻi he ngaahi tāpuaki fakaʻahó ʻi he uhouhonga ʻo e mafasia mo e pole ʻo e māmani ko ʻení. Ke ʻaʻeva mo e ʻEikí, kuo pau ke tau hoko ʻo māʻoniʻoni, he ʻokú Ne māʻoniʻoni, pea ʻoku fakaafeʻi kitautolu ʻe he ʻEikí ke tau ʻaʻeva mo Ia, ke tokoniʻi kitautolu ke tau māʻoniʻoni.

ʻOku hanga ʻe he ʻapi ʻoku fakatefito ʻi he tuí mo e ngāue fakataha ʻa e Kāingalotú ʻo fakafepakiʻi ʻa e fakamakehekehé mo e kakai ʻoku liʻekiná. Ko e māʻoniʻoni ki he ʻEikí ʻoku lea ʻikai ki he anga taʻe-fakaʻapaʻapá, ʻikai ki hono manukia ʻo e niʻihi kehé, ʻikai ki hono tuku atu ha faʻahinga fakamatala ʻi he mītia fakasōsialé ʻoku fakatupunga ai ha loto-ʻita mo ha ʻā vahevahe ke maʻu mei ai ha paʻanga. Ko e māʻoniʻoni ki he ʻEikí ʻoku lea ʻio ki he toputapú mo e ʻapasiá, ʻio ki he hoko ko hotau tuʻunga tauʻatāina, fiefia, moʻoni mo lelei tahá ʻi heʻetau muimui kiate Ia ʻi he tuí.

ʻOku hanga ʻe he māʻoniʻoni ki he ʻEikí ʻo ʻai ke toputapu ʻa e moʻui fakaʻahó. ʻOkú ne tohoakiʻi kitautolu ke tau vāofi ange pea fiefia ange mo e ʻEikí pea mo e niʻihi kehé pea ʻokú ne teuteuʻi kitautolu ke tau nofo mo e ʻOtua ko ʻetau Tamaí, Sīsū Kalaisi, pea mo hotau ngaahi ʻofaʻangá.

ʻI he māʻoniʻoni ki he ʻEikí, te tau lava ʻo ongoʻi ʻEne ʻofá ʻi heʻetau ʻai ʻa e māʻoniʻoni ki he ʻEikí ke ʻotautolu ia ʻi he ʻaho takitaha, ke fakafiefia pea taʻengata.