Sandei Aftenun Sesen
Fidim Ol Rus, mo Ol Branj Bae Oli Gro
Samfala Pat
Wan long ol samting we i moa impoten we yumi save lanem long laef ia, hem i wanem i defren bitwin samting we i blong taem we i no save finis, mo samting we i no blong taem we i no save finis. …
… Sam trutok oli impoten mo, yumi nidim long ol rus blong fet blong yumi. Ol narawan oli hang o oli stap olsem ol branj—oli impoten nomo taem oli joen wetem ol stamba trutok. …
Long ol nara toktok, Jisas Kraes mo sakrifaes blong Atonmen blong Hem oli rus blong testemoni blong yumi. Evri nara samting oli ol branj. …
Mi stap tingting sapos samtaem yumi stap miksim ol rus mo ol branj, taem hem i taem blong stap fidim testemoni blong yumi abaot Jisas Kraes. …
Yumi mas askem yumiwan: ?Testemoni blong mi i stanap long wanem mi hop blong i hapen long laef blong mi? ?Hem i dipen long ol aksen mo fasin blong narawan? ?O hem i stanap strong long Jisas Kraes “olsem we rus blong tri i holem graon,”[Kolosi 2:7] nomata long ol situesen blong laef we i stap jenis? …
Yumi no mas tingting blong andastanem evri samting bifo yumi tekem aksen. Hemia i no fet. … Sapos yumi wet blong kasem ol ansa long evri kwestin blong yumi bifo yumi tekem aksen, yumi stap stopem bigwan hamas gudfala samting yumi save mekem i hapen, mo yumi putum limit long paoa blong fet blong yumi. …
Fet i stanap strong long ol hadtaem mo ol situesen blong laef we i no sua, from se rus blong hem i stanap strong long Kraes mo doktrin blong Hem. Jisas Kraes mo Papa blong yumi long Heven we i sendem Hem, tugeta Tufala i mekem se yumi save trastem Tufala fulwan mo bae Tufala i no save lidim yumi rong. …
Hem i prea blong hat blong mi mo blesing se bae yumi oltaem fidim ol rus blong fet blong yumi long Sevya, long doktrin blong Hem, mo long Jos blong Hem.