“Hemia I Gospel blong Mi”—“Hemia I Jos blong Mi”

Olsem daenamaet we i nogat naetrogliserin, hem i no spesel tumas, Jos blong Sevya bae i spesel nomo sapos oli bildimap long gospel blong Hem. Sapos i nogat gospel blong Sevya mo atoriti blong mekem ol odinens, Jos ia bae i no jos we ol man i save long hem oltaem.

Sapos kiselgor i no holemtaet naetrogliserin i stap semmak, bae oli no save yusum. Olsem we histri i bin soem, sapos i nogat Jos ia blong Lod, andastaning blong man abaot gospel blong Hem bae i no stap semmak—doktrin bae i jenis mo bae ol defdefren relijin, kalja mo skul blong tingting, oli save kontrolem doktrin. …

Jos Ia blong Jisas Kraes blong Ol Lata-dei Sent i givim akses long paoa blong God from se God nao i givim raet, blong oli tijim doktrin blong Kraes mo blong mekem ol odinens blong gospel blong sevem man mo kam olsem wan god. Sevya i wantem tumas blong fogivim ol sin blong yumi, helpem yumi aksesem paoa blong Hem, mo jenisim yumi. Hem i bin safa from ol sin blong yumi mo i wantem tumas blong fogivim yumi aot long panismen we yumi sapos blong kasem. Hem i wantem yumi blong kam tabu mo kam stret evriwan tru long Hem. …

Mi invaetem yu blong givim yu fulwan moa long Sevya, gospel blong Hem, mo Jos Ia blong Hem. Taem yu mekem olsem, bae yu faenem se gospel blong Sevya we i joen wetem Jos blong Hem, i karem paoa i kam insaed long laef blong yu. Paoa ia i bigwan bitim daenamaet. Bae i brebrekem ol ston long rod blong yu mo jenisim yu i kam long wan we i gat raet long kingdom blong God. Mo bae yu “fulap wetem glad ia we toktok i no naf blong talem mo i fulap long glori” [Hileman 5:44].