Hop Bae I Win

Hop i wan presen we i kam fri nomo long God. …

Taem yumi mekem fet blong yumi long Jisas Kraes i kam moa strong, yumi save lukluk i go moa bitim ol hadtaem blong yumi se oli ol blesing mo ol promes blong taem we i no save finis. Olsem wan laet we i stap gro, hop i givim laet long wol ia we i tudak, mo yumi save luk fiuja blong yumi we i gat glori. …

Ol brata mo sista blong mi, hop i wan presen we i laef i stap, wan presen we i gro taem yumi mekem fet blong yumi long Jisas Kraes i kam antap. … Yumi bildim ol pruf—blong fet blong yumi—tru long prea, ol tempol kavenan, kipim ol komanmen, gohed blong kaekae long ol skripja mo ol toktok blong ol profet blong tedei, tekem sakramen, givim seves long ol narawan mo wosip evri wik wetem Ol Sent.

Blong mekem hop blong yumi i kam moa strong long wan taem we fasin nogud i stap kam antap bigwan, Lod i daerektem profet blong Hem blong bildim ol tempol long plante ples long wol. …

I no gat harem nogud, sik, fasin we i no stret, safaring, o samting we i save daonem hop blong yumi taem yumi bilif mo holemtaet ol kavenan blong yumi wetem God insaed long haos blong Lod. Hem i wan haos blong laet, wan haos blong hop. …

Ol brata mo sista, pis we yu stap lukaotem oli no save kam kwiktaem olsem we yu yu wantem, be mi promesem yu se taem yu trastem Lod, pis blong Hem bae i kam.

Bae yumi lukaot gud long gudfala fet blong yumi, wokbaot i go fored wetem wan stret mo klin hop. Mi testifae se hop blong yumi i Sevya Jisas Kraes. Tru long Hem, evri drim blong yumi we i stret mo gud bae oli kam tru. Hem i God blong hop—we bae i win. Hem i laef mo i lavem yu.