Stretem Wanem Yumi Wantem wetem Wanem Hem I Wantem

Ol dia fren blong mi, taem yumi jusum blong letem God i gat moa paoa long laef blong yumi bitim ol samting we yumi wantem blong yumiwan, yumi save gro olsem wan disaepol mo gat moa paoa long maen mo hat blong yumi blong i wan wetem Sevya. Be taem yumi no letem wei blong God i win long laef blong yumi, yumi stap yumiwan, mo insperesen blong Lod i no lidim yumi, mo yumi save faet from rong blong yumi. Yumi save mekem ol eskius tu blong yumiwan taem yumi mekem samting long wei blong yumiwan, mo stap talem, “mi stap mekem samting long wei blong mi nomo.”…

… Taem ol situesen blong laef olsem helt, ples, mo ol jalenj long saed blong bodi mo maen i afektem laef blong yumi long ol samting we oli moa impoten, i gat wan ples we i mekem se yumi fri blong jusum blong folem o no folem paten we Lod i bin rere long hem blong laef blong yumi.…

Olsem ol disaepol blong Kraes, yumi wantem blong wokbaot long rod we Hem i makem blong yumi long taem blong ministri blong Hem long laef ia. Yumi no wantem blong mekem wanem we Hem i wantem nomo mo evri samting we bae Hem i glad long hem, be tu yumi lukaotem blong kam moa olsem Hem. …

Mi testifae long yufala se blong folem tingting blong Lod long laef blong yumi, bae i mekem yumi save faenem naesfala perel ia long wol—kingdom blong heven. Mi prea se wanwan long yumi, long taem blong yumi, bae yumi save talemaot, wetem tras blong kavenan, long Papa blong yumi long Heven mo Sevya Jisas Kraes se “wanem i wok blong Yu, i wok blong mi.”