“Ngaahi Founga ʻe 5 ke ʻOfa ʻo Hangē ko Sīsuú,” Ko e Kaumeʻá, ʻEpeleli 2026, 26–27.

Ngaahi Founga ʻe 5 ke ʻOfa ʻo Hangē ko Sīsuú

Ko e taha ʻo e ngaahi meʻa fakaʻosi naʻe folofola ʻaki ʻe Sīsū Kalaisi ki Hono ngaahi kaungāmeʻá kimuʻa ʻi Heʻene Fakaleleí ko e “hangē ko ʻeku ʻofa kiate kimoutolú, … feʻofaʻaki foki kiate kimoutolu” (Sione 13:34). Ko e fekau ko iá maʻatautolu foki! Ko ha founga ʻeni ʻe nima te ke lava ai ʻo ʻofa ki he niʻihi kehé ʻo hangē ko ia naʻá Ne faí.

ʻOfa ki Ho Kaungāʻapí

Tā fakatātā ʻo ha kiʻi tamasiʻi mo ha kiʻi taʻahine ʻokú na fufulu fakataha ha matapā sioʻata

Naʻe akoʻi mai ʻe he Fakamoʻuí, ko e ongo fuofua fekaú ke ʻofa ki he ʻOtuá pea ke ʻofa ki ho kaungāʻapí ʻo hangē pē ko koé (vakai, Mātiu 22:37–40). Ko hai ho kaungāʻapí? Tokotaha kotoa pē!

ʻI he taimi ʻokú ke feinga ai ke ʻofaʻi lelei ange ha tahá, manatuʻi ʻa Sīsū. Feinga ke fakakaukau kiate kinautolu ko ha fānau ʻa e ʻOtuá pea fai kiate kinautolu ʻa e meʻa ʻokú ke loto ke fai kiate koé.

ʻOfa Ki Homou Ngaahi Filí

Fakatātā ʻo ha kiʻi taʻahine ʻoku tūʻulutui ʻo lotu mo ha fakakaukau ki ha kiʻi tamasiʻi naʻá ne tekelele ia

Naʻe foaki ʻe Sīsū Kalaisi ʻEne moʻuí maʻá e tokotaha kotoa pē, ʻo aʻu pē ki he ki he kakai naʻa nau fehiʻa kiate Iá. Naʻá Ne fakahaaʻi ʻa e ʻofa lahi tahá.

ʻI he taimi ʻoku angakovi ai ha tahá, manatuʻi ʻa Sīsū. Te ke lava ʻo taukaveʻi koe ʻi he angaʻofa pe kolea ha tokoni mei ha tokotaha lahi falalaʻanga. ʻAhiʻahi malimali ki he tokotahá pe lotua kinautolu. Mahalo he ʻikai ke nau liliu, ka ʻe liliu ho lotó ʻi hoʻo fakahaaʻi ʻa e ʻofá.

ʻOfa ʻi he Kakai ʻOku Nau Ongoʻi Liʻekiná

Tā fakatātā ʻo ha kiʻi taʻahine ʻokú ne ʻoange ha foʻi pulu pasiketipolo ki ha kiʻi tamasiʻi

Naʻá ke ʻiloʻi nai naʻe fakaʻaongaʻi ʻe Sīsū Kalaisi ha konga lahi ʻo Hono taimí mo e kakai naʻe fakafisingaʻi ʻe he niʻihi kehé? ʻOku lahi ha ngaahi talanoa ʻi he Tohi Tapú ʻoku nau fakamatala ki he founga naʻá Ne tokoniʻi ai ʻa e kau angahalá pea tuʻu ke fakamoʻui ʻa kinautolu naʻe liʻekiná.

ʻI he taimi ʻokú ke sio ai ki ha taha ʻoku ngali ongoʻi tuenoá, manatuʻi ʻa Sīsū. Feinga ke talanoa kiate kinautolu, fakaafeʻi ke mou vaʻinga, pe fakafanongo kiate kinautolu.

ʻOfa ʻi he Kakai ʻOku Nau Fiemaʻu ʻa e Fakafiemālié

Fakatātā ʻo ha kiʻi tamasiʻi ʻoku tangutu mo ha taʻahine loto-mamahi

ʻI he taimi naʻe pekia ai e kaungāmeʻa ʻo e Fakamoʻuí ko Lāsalosí, naʻá Ne tangi mo e ongo tuofāfine ʻo Lāsalosí—neongo naʻe ʻamanaki ia ke Ne fokotuʻu ʻa Lāsalosi mei he maté! (Vakai, Sione 11:32–36.) Naʻá Ne fakahaaʻi ʻa e ʻofá ʻaki ʻEne tuku ha taimi ke mamahi ai mo e kakai naʻe loto-mamahí, kae ʻikai ko e feinga pē ke fakaleleiʻi ʻenau palopalemá.

ʻI he taimi ʻoku loto-mamahi ai ha tahá, manatuʻi ʻa Sīsū. Feinga ke tangutu pē ʻo feohi mo kinautolu, fāʻofua, pe fai ha kiʻi tohi ʻofa.

ʻOfa ʻi he Kakai ʻOku Nau Fiemaʻu ʻEne Tokoní

Tā fakatātā ʻo ha kiʻi taʻahine ʻi ha saliote teketeke ʻokú ne foaki ha kiʻi meʻa lelei ki ha kiʻi tamasiʻi ʻoku puke tautau hono nimá ʻi ha meʻa haʻi ʻi hono umá

Naʻe fakamoʻui ʻe Sīsū Kalaisi ʻa e mahakí mo kinautolu naʻe faingataʻaʻiá. ʻOkú Ne fakamoʻui foki ʻa e kakaí mei he angahalá ʻo fakafou ʻi he fakatomalá. Mahalo he ʻikai ke tau lava ʻo fakamoʻui ʻo hangē ko iá, ka te tau kei lava pē ʻo tokoni ʻi Heʻene ngāue faifakamoʻuí ʻi he taimi ʻoku tau tokoni ai ki he niʻihi kehé.

ʻI he taimi ʻoku fiemaʻu tokoni ai ha taha, manatuʻi ʻa Sīsū—pea ʻoku tau fiemaʻu kotoa ʻEne tokoní. ʻAhiʻahi fakakaukau ki he founga lelei taha ke tokoni mo ʻofa ai kiate kinautolú.