“Ko e Lēsoni ʻo e Fua‘imoa Toetuʻú,” Ko e Kaumeʻá, ʻEpeleli 2026, 4–5.
Ko e Lēsoni ʻo e Fuaʻimoa Toetuʻú
Naʻe kaihaʻasi ʻe ha tokotaha ʻemau ngaahi foʻi fuaʻimoa ki he Toetuʻú!
Ko ha talanoa moʻoni mei Nuʻu Sila.
ʻI he ʻaho kimuʻa he Toetuʻú, naʻe ʻā pongipongia hake ʻa Feleti. Naʻá ne sio ki he tafaʻaki hono piló, mo e fiefiá. Naʻá ne maʻu maʻu pē ha fuaʻimoa masimēlou ki he Toetuʻú. Ka naʻe liliu ʻene malimalí ʻo fakafulofula. Naʻe ʻikai ha fuaʻimoa maʻana!
Naʻe sio hake ʻa Feleti ki he tafaʻaki ʻo e mohengá. Naʻá ne kaila ki hono tuofefiné, “Matila! Naʻá ke kaihaʻasi ʻeku fuaʻimoa Toetuʻú?”
Naʻe talaange ʻe Matila, “ʻIkai. ʻOku ʻikai ke ʻi heni mo ʻeku fuaʻimoa ia ʻaʻakú!” Naʻe tuhu ʻa Matila ki hono piló.
Naʻe hanga ʻe he longoaʻá ʻo fakaʻaaki e toenga ʻo e ngaahi tokoua mo e tuofāfine ʻo Feletí. Naʻe pulia kotoa ʻenau ngaahi foʻi fuaʻimoa Toetuʻu ʻe fitú!
“Ko e hā fua e longoaʻa ko ʻení?” Ko e fehuʻi ange ia ʻa Mamí.
“Naʻe kaihaʻasi ʻe ha tokotaha ʻemau fuaʻimoá!” Ko Feleti ange ia.
Naʻe pehē ange ʻe Mami, “Naʻe ʻikai kaihaʻasi ia ʻe ha taha. Naʻe ʻikai ke ma kumi mai ha fuaʻimoa he taʻú ni.”
“Hala ha fuaʻimoa Toetuʻu?” Ko e kaila ia ʻa Feletí. “Ka ʻoku ʻomi maʻu pē ʻemau fuaʻimoa!”
Naʻe pehē ange ʻe Mami, “ʻOku mahulu hake ʻa e Toetuʻú ʻi he kai fakaneifuá pē. Ko ha taimi makehe ia ke fakakaukau ai kia Sīsū Kalaisi.”
Naʻe fakafulofula ʻa Feleti. Talu mei he liliu e ngāue ʻa Tetí, mo e lahi ange e tali ʻikai ʻa Mami mo Tetí. ʻIkai ha ʻaho ʻeveʻeva. ʻIkai ha meʻakai falekai. Pea ko ʻeni kuo maumauʻi foki mo e Toetuʻú!
Naʻe pehē ange ʻe Mami, “ʻOku ou ʻilo ʻoku mou loto-mamahi. Ka te tau kei lava pē ʻo fiefia ʻi he ngaahi fuaʻimoa makehe ʻo e Toetuʻú he ʻahó ni. Mou haʻu!”
Naʻe ʻi ai ha kato fuaʻimoa ʻa Teti ʻi peito. Naʻe māpuhoi ʻa Feleti. “Ko e ngaahi foʻi fuaʻimoa pē ʻena ia ʻa e fanga moá.”
Naʻe fehuʻi ange ʻe hono tuofefine lahi ko Selesitiá, “Te tau vali kinautolu?”
Naʻe kamokamo pē ʻa Mami. “Ka kuo pau ke tau ʻuluaki haka ia.”
Naʻe ʻikai ke saiʻia ʻa Feleti he tatalí. Naʻá ne fiefia ʻi he taimi naʻe pehē ai ʻe Mami kuo feʻunga hono haka e fuaʻimoá. Naʻá ne pehē, “Mālō ia!”
Naʻe pehē ange ʻe Mami, “ʻOleva pē. ʻOku kei fiemaʻu pē ke fakamokomoko.”
Naʻe toe leʻolahi ange e māpuhoi ʻa Feletí. Ko e toe tatali ē!
Hokó, naʻe tokoni ange ʻa Mami ke nau ngaohi e valí. Naʻa nau tuifio ʻa e viniká mo e vai velá pea ʻai ki ai ha ʻū tulutā ʻo e fakalanu meʻakaí. Naʻe saiʻia ʻa Feleti he sio ki he tuifio ʻa e ngaahi tulutaá ʻi he loto vaí.
“Ko e hā e lanu te ke filí?” Ko e fehuʻi ange ia ʻa Selesitiá.
“Pulū!” Ko Feleti ange ia.
Naʻe fuoloa hono unu e ngaahi foʻi fuaʻimoá ʻi he valí. Ka naʻe ʻikai ke loto-mamahi ʻa Feleti ia he tatalí. Naʻe ʻikai ke ne toe tokanga ki ai. Naʻe fakafiefia ʻa e feohi mo hono fāmilí. Naʻá ne fakakaukau ki he meʻa naʻe lea ʻaki ʻe Mamí—ʻa e founga ʻoku mahulu ange ai e Toetuʻú ʻi he kai pē ha fakaneifuá.
Naʻe pehē ange ʻe Feleti, “Mami, ʻoku ou tui ʻoku mahino kiate au ʻa e founga ʻoku tokoniʻi ai e fuaʻimoa Toetuʻú ke tau manatuʻi ʻa e Toetuʻu ʻa Sīsū Kalaisí.”
Naʻe malimali ange ʻa Mami. “Pea ʻoku founga fēfē ia?”
Naʻá ne pehē ange, “ʻOku ou saiʻia ʻaupito ʻi heʻeku fuaʻimoa kuo valí. Ka naʻe fiemaʻu ha taimi lahi ki ai. Naʻe faingataʻa e tatali kotoa ko iá. Naʻá ku fakakaukau leva ki he pau ke tatali fuoloa ange ʻa e kau ākongá ki he Toetuʻu ʻa Sīsū Kalaisí hili ʻEne pekia ʻi he kolosí.”
Naʻe pehē ange ʻe Mami, “ʻOkú ke moʻoni. Naʻe ʻikai faingofua ia ke nau tatali foki mo kinautolu. Ka naʻe toe tuʻu ʻa e Fakamoʻuí. Pea ko ʻeni kuo hoko hoʻo ngaahi foʻi fuaʻimoa angamahení ko ha ngaahi foʻi fuaʻimoa fakaʻofoʻofa kuo vali.”
Naʻe malimali ʻa Feleti ʻi he ngaahi foʻi fuaʻimoa lanu māmá. Naʻe ʻikai ke nau ifo ʻo hangē ko e ngaahi foʻi fuaʻimoa masimēloú, ka naʻa nau makehe. Naʻe fakaʻamu ʻa Feleti te nau toe vali fuaʻimoa pē he taʻu kahaʻú.
ʻŪ tā fakatātā ʻa Tania Rex. ʻOua naʻa hiki hano tatau.