“Ko ʻEmau Fakakaukau ki he Toetuʻú,” Ko e Kaumeʻá, ʻEpeleli 2026, 17.

Ko ʻEmau Fakakaukau ki he Toetuʻú

Fai ʻe Ashton R., taʻu 10, ʻIutā, USA

Tā fakatātā ʻo ha kiʻi taʻahine fofonga malimali ʻokú ne pukepuke ha kato meʻaʻofa

Naʻá ku mamataʻi mo ʻeku kalasi Palaimelí ʻa e Kaumeʻa ki he Kaumeʻá ʻa ia naʻe fai ai ʻe ʻEletā mo Sisitā Petinā ha pōpoaki fekauʻaki mo e ngāue tokoní. Naʻa mau loto ke palani ʻemau ʻekitivitī ngāue tokoni pē ʻamautolu.

Naʻe fakataha mai ʻemau kalasi Loto-toʻa 10 hili ʻa e lotú ke palani pea ne mau maʻu ha ngaahi fakakaukau kehekehe. Hili ʻemau talanoaʻi e ngaahi fakakaukau kotoa pē, naʻa mau fakakaukau ke ngaohi ha ʻū kato Toetuʻu maʻá e fānau ʻoku ʻikai ke nau maʻu ha meʻa lahi ki he Toetuʻú ʻo hangē ko kimautolú.

Naʻá ku faʻu mo hoku kaungā-kalasí ha fanga kiʻi laʻipepa, pea ʻi he ʻaho Sāpaté naʻa mau tufa ia ʻo fakamatala ki he taha kotoa fekauʻaki mo e ʻekitivitií. Naʻa mau ʻave foki mo ha fanga kiʻi laʻipepa ki he ngaahi ʻapi ʻo e kakaí.

ʻI he taimi pē naʻe ʻiloʻi ai ia he taha kotoa, naʻa mau tuku leva ha ʻū puha maʻá e kakaí ke nau tānaki ki ai ha ngaahi meʻa maʻá e ʻū kato Toetuʻú. Hili pē ha ngaahi ʻaho siʻi, naʻe lahi e ngaahi meʻa naʻa mau maʻú!

Ne faifai pea fai ʻemau ʻekitivitií. Naʻá ku fai ʻa e fua lotú peá u kole ki he Tamai Hēvaní ke tāpuakiʻi ʻa e fānau te nau maʻu e ʻū kató ke nau ʻiloʻi e lahi ʻo e ʻofa ʻoku mau ʻoatu mo e ʻū kató. Ne kamata leva ʻemau ngāué. Naʻa mau teuteuʻi e ʻū kató ʻo fakaʻaongaʻi ha ʻū peni fakaʻilonga mo ha fanga kiʻi sitika, pea fakafonu ia ʻaki ha ʻū meʻaʻofa. Naʻa mau ngaohi ha ʻū kato Toetuʻu ʻe 100 tupu! Naʻá ku ongoʻi ʻa e talamai ʻe he Laumālie Māʻoniʻoní naʻe fiefia ʻa e Tamai Hēvaní mo Sīsū Kalaisi.

ʻOku ou ʻilo naʻe fai ʻe heʻeku kalasi Palaimelí ʻa e meʻa totonú ʻaki hono tokoniʻi e fānau kehé. ʻOku ou ʻilo ʻoku laukau ʻaki kimautolu ʻe he Tamai Hēvaní mo Sīsū. Pea ʻoku ou poupouʻi ʻa e tokotaha kotoa pē ke tokoni ki he niʻihi kehé.