“Meʻakaí & Fiefiá,” Ko e Kaumeʻá, ʻEpeleli 2026, 12–13.
Meʻakaí & Fiefiá
Ko ʻeni pe Ko ē?
Lau e ngaahi potufolofola ko ʻeni mei he Fuakava Motuʻá pea ʻeke ki hoʻo ngaahi kaungāmeʻá mo e fāmilí ʻa e ngaahi fehuʻi fakaoli ko ʻení. Peá ke feinga leva ke ke fakakaukauʻi haʻo fehuʻi pē ʻa koe!
Naʻe fekauʻi ʻe he Tamai Hēvaní ʻa ʻĀtama mo ʻIvi ke na tokangaʻi ʻa e fonuá mo e fanga monumanú (vakai, Sēnesi 1:26).
Te ke fie tokangaʻi nai ha ngoue pe ko ha kiʻi monumanu lalata?
Hili hono taaʻi ʻe Mōsese ʻa e Tahi Kulokulá, naʻe tauʻolunga mo hiva ʻa e kau ʻIsilelí ke fakamālō ki he ʻEikí ʻi hono fakatauʻatāinaʻi kinautolu mei ʻIsipité (vakai, ʻEkesōtosi 15:1, 20).
Te ke fie ako nai ha hulohula pe ko ha foʻi hiva?
Naʻe fekauʻi ʻe he ʻEikí ʻa Noa ke ʻomi ha ongo monumanu ʻi he faʻahinga kotoa pē ki he ʻaʻaké (vakai, Sēnesi 6:19).
Te ke fie tauhi nai ha fuʻu ngata saieniti pe ko ha fuʻu pea?
ʻI he taimi naʻe feinga ai ʻa e kakaí ke aʻu ki he langí ʻaki hono langa e Taua ʻo Pēpelí, naʻe liliu ʻe he ʻOtuá ʻenau ngaahi leá koeʻuhí ke ʻoua naʻa nau lava ʻo femahinoʻaki (vakai, Sēnesi 11:7).
Te ke fie lea nai ʻi he lea fakafonua kotoa pē pe tohi ʻi he lea fakafonua kotoa pē?
Naʻe tokoniʻi ʻe he ʻEikí ʻa Tēvita ke ne ikunaʻi ʻa Kolaiate koeʻuhí ko e tui ʻa Tēvitá, neongo naʻe ʻikai ke tupu lahi pe mālohi ʻa Tēvita ʻo hangē ko Kolaiaté (vakai, 1 Samuela 17:45–49).
Te ke fie maʻu nai ha mālohi lahi pe ngāue ʻi ha founga vave ʻaupito?
Vaʻinga Mateʻi ʻo e Fuakava Motuʻá
Fili ha taha mei he Fuakava Motuʻá mei he lisi ʻi laló. ʻOua te ke tala ki ha taha pe ko hai ia! ʻAi ke ʻeke ʻe he niʻihi kehé ha ngaahi fehuʻi ʻoku tali ʻio pe ʻikai (hangē ko e, “Ko ha palōfita nai ia?”) ke nau feinga ke mateʻi pe ko hai naʻá ke filí. Taufetongi pea taimiʻi pe ko e hā e vave taha te ke lava ai ʻo mateʻí. Ko hai pē ʻe vave taha ʻene mateʻi hili ha takai ʻe tolú, ko ia ʻe ikuná!
-
Siosefa
-
Tēvita
-
Mōsese
-
Noa
-
Lute
-
Siona
-
Kuini ʻĒseta
-
ʻAisake
-
Taniela
Fokotuʻutuʻu ʻo e Meʻakai Maʻamaʻá
Fokotuʻutuʻu fakalelei e fanga kiʻi meʻakai maʻamaʻa ʻokú ke saiʻia taha aí ki ha vaʻakau (wooden skewer). Mahalo te ke fiemaʻu ha tokoni mei hoʻo mātuʻá. ʻAhiʻahiʻi e ngaahi tuifio fakalata ko ʻení!
-
Kālepi, situloapeli, fanga kiʻi kiupi siisi
-
Temata iiki, kiukamipā, polo
-
Pepaloni kuo peluki, fanga kiʻi siisi mosalela fuopotopoto, fuaʻi ʻōlive