“Kaungāmeʻa he Lolé,” Ko e Kaumeʻá, ʻEpeleli 2026, 18–19.

Kaungāmeʻa he Lolé

Fai ʻe Norman Hill

Naʻe fie kaungāmeʻa ʻa Loueni mo ʻĒnesi, ka naʻe ʻikai ke ne ʻilo pe ko e hā te ne lea ʻakí.

Ko ha talanoa moʻoni mei USA.

Fakatātā ʻo ha kiʻi tamasiʻi loto-mamahi ʻoku ala atu ki ha kiʻi tamasiʻi loto-mamahi ʻoku tangutu ʻi he musié ʻi tuʻa, pea ʻoku tētē mai ha fanga kiʻi lole ʻi mui

Naʻe sio ʻa Loueni ki hono fakaafeʻi ʻe Misi Poloti ha tokotaha ako foʻou ke tuʻu ʻi muʻa ʻi he loki akó.

Naʻe pehē ange ʻe Misi Poloti, “Ko ʻĒnesi ʻeni. Naʻá ne toki aʻu mai ki Hauaiʻi mei ha fonua ʻoku ui ko ʻIukuleini. ʻOku ʻikai ke ne lea faka-Pilitānia. Te mou angalelei mo fakamaheni kotoa ki ai?”

Naʻe kamokamo pē ʻa Loueni mo hono kaungā-akó.

Naʻe sio pē ʻa ʻĒnesi ki lalo mo fakafulofula. Ko ia toko taha pē naʻe tui talausese lōloa mo sote nima lōloa.

Naʻe fifili ʻa Loueni pe ʻe fēfē haʻate hiki ki ha fonua foʻou mo ʻikai lea ʻaki e lea fakafonua ko iá. Naʻe ongo fakailifia ia!

ʻI he taimi mālōlō siʻí, naʻe fakatokangaʻi ʻe Loueni ʻoku lue toko taha ʻa ʻĒnesi ki ha feituʻu lolotonga e lele ʻa e toenga ʻo e fānaú ke vaʻinga fakatahá. Naʻá ne kei fakafulofula pē.

Naʻe fie kaungāmeʻa ʻa Loueni mo ia, ka naʻe ʻikai ke ne ʻilo pe ko e hā e meʻa te ne lea ʻakí. Te na kaungāmeʻa fēfē kapau naʻe ʻikai ke na lea ʻi he lea fakafonua tatau?

ʻI he tuku ʻa e akó, naʻe foki ʻa Loueni ki ʻapi ʻo kole tokoni kia Teti. “Te ke lava ʻo tokoni mai ke fekumi ki he founga ke lea faka-ʻIukuleini aí?” Ko e fehuʻi ange ia ʻa Louení. “ʻOku ʻi ai ha tamasiʻi foʻou ʻi heʻemau kalasí ʻoku ʻikai ke lea faka-Pilitānia.”

Naʻe kamokamo ʻa Teti. “ʻIo.”

ʻUluakí, naʻá na kumi e founga ke pehē ai, “Ko e taimi kai hoʻataá ʻeni.” Naʻe fakafanongo ʻa Loueni ki he talí. “Nastav obidniy chas.” Naʻe toutou feinga ʻa Loueni ke lea ʻaki ia. Naʻe faingata‘a ia! Ko ia naʻá ne kumi e founga ke pehē ai “mālō e leleí.”

Naʻe pehē ange he leʻo ʻi he komipiutá, “Pryvit.” Ne faingofua ange ia. Naʻe toutou fanongo ʻa Loueni ki he foʻi leá mo toutou akoako lea ʻaki ia.

ʻI he ʻaho hono hokó lolotonga e mālōlō siʻí, naʻe toe maʻu ʻe Loueni ʻa ʻĒnesi ʻoku tangutu toko taha pē ʻi he musié. Naʻe tuʻu ʻa Loueni ʻi hono tafaʻakí ʻo malimali. Naʻá ne lea leʻo lahi, “Pryvit!” Naʻá ne fakaʻamu pē naʻe tonu ʻene leá.

Naʻe malimali ʻa ʻĒnesi peá ne ʻoange kia Loueni ha foʻi lole.

Naʻe tangutu hifo ʻa Loueni ʻi he tafaʻaki ʻo ʻĒnesí mo toe pehē ange pē pryvit. Hili iá naʻá ne pehē ange leva, “Mālō e lelei.”

Naʻe lea māmālie ange ʻa ʻĒnesi, “Mālō e lelei.” Naʻá ne ʻoange kia Loueni ha foʻi lole ʻe taha. Naʻe nanamu ia hangē ha molí, pea naʻe ifo ia mo molū.

Tā fakatātaaʻi ʻo ha kiʻi tamasiʻi ʻokú ne ʻoange ha foʻi lole ki ha kiʻi tamasiʻi ʻokú ne hili hono nimá ʻiate ia

Naʻe tā ʻe Loueni ha laine ʻe fā ʻi he kelekele ʻi hona tafaʻakí ke faʻu ha puha tic-tac-toe. Naʻá ne akoʻi kia ʻĒnesi ʻa e founga ʻo e kiʻi vaʻingá. Naʻe faingataʻa ke fakamatalaʻi he naʻe ʻikai ke na lea ʻaki e lea fakafonua tatau. Ko e taimi ʻe niʻihi naʻe tā ʻe ʻĒnesi ʻa e X he taimi hala. Ka naʻe ʻikai tokanga ʻa Loueni ia ki ai. Naʻá ne fiemaʻu pē ke maʻu hano kaungāmeʻa foʻou.

ʻI he ʻaho kotoa pē he uike ko iá, naʻe vaʻinga ʻa Loueni mo ʻĒnesi ʻi he mālōlō siʻí. Naʻá na vahevahe ʻa e foʻi lolé mo vaʻinga fakataha.

Naʻe fehuʻi ange ʻe Teti ʻi ha ʻaho ʻe taha ʻi ʻapi, “ʻOku fēfē e kiʻi tamasiʻi foʻou ʻi hoʻo kalasí? Naʻá ke akoako e ngaahi lea naʻá ke ʻiló?”

“ʻIo! Ko hono hingoá ko ʻĒnesi,” ko e tali ange ia ʻa Louení. “ʻOkú ma vaʻinga ʻi he mālōlō siʻí, pea ʻokú ne faʻa ʻomai ʻeku lole.”

Naʻe malimali ʻa Teti. “Meʻa sai tama ia.” Naʻá ne tangutu hifo ʻi he tafaʻaki ʻo Louení ʻi he sea moluú. “Ko ʻĒnesi mo hono fāmilí ko e kau kumi hūfanga. ʻOku nau omi mei ha fonua mamaʻo. Naʻe pehē ʻe ʻEletā Kealoni ko Sīsū Kalaisí naʻe kumi hūfanga ʻi heʻene kei siʻí pea naʻá Ne kole mai ke tau fakakaungāmeʻa ʻi he taimi ʻoku tau feʻiloaki ai mo e kakai mei he ngaahi fonua kehé. ʻOkú ke pehē ko e hā e meʻa ʻoku fiemaʻu ke tau fai ke hoko ai ko ha kaungāmeʻa leleí?”

Naʻe kiʻi fakakaukau ʻa Loueni. Naʻá ne pehē, “ʻOku fiemaʻu ke ʻofa mo kumi ha vaʻinga ke vaʻinga fakataha ai. ʻE lava leva ke kau mai mo vaʻinga foki mo ha niʻihi kehe pea nau maheni ai.”

Naʻe fāʻofua atu ʻa Teti kia Loueni. Naʻá ne pehē ange, “ʻOkú ke muimui ʻia Sīsū mo fai e meʻa ʻoku kole mai ʻe he kau palōfitá ke tau faí. Pea ko ʻeni kuo ʻi ai haʻo kaungāmeʻa foʻou.”