Mane long Maket

I kam long Bradley Salmond III

Naoia, bae mi mekem stret wanem Mama i askem, Anane i tingting.

Wan tru stori we i kam long Ghana.

Boe i stap holem mane mo lukluk long ol samting long maket stol.

Anane i smael taem hem i stap wokbaot long rod. Smel blong fis we oli stap fraenem mo ol pipol oli bisi storian. Hem i stap wokbaot i go long haos blong Angkel blong hem. Mama i givim hem sam mane blong go givim long Angkel blong hem.

Hem i lukluk raon long ol stol we oli salem ol samting we oli mekem, ol kaekae, mo ol narafala samting. Be ae blong hem i fas long wan samting.

I gat wan stol blong kaekae we i salem tu long ol fevret swit blong hem, tofi mo ol biskit. Hem i lukluk long mane we Mama i givim long hem. Wan handred sedis (800 vatu) hemia i tumas, hem i tingting. Ol fevret swit blong hem i 10 sedis nomo. Angkel bae i no luksave nomo sapos sam mane i lus.

Anane i pem sam swit. Hem i sakem sam tofi i go insaed long maot blong hem mo gohed blong wokbaot i go long haos blong Angkel blong hem.

Angkel i stap stanap aotsaed long haos blong hem taem Anane i wokbaot kasem hem.

“Be i no smol Anane ia! Kam long ples ia,” Angkel i talem. “?Wanem nao mi save mekem blong yu?”

“Mi karem sam mane i kam blong givim long yu, Mama i givim.” Anane i givim long hem mane ia, afta i putum bak han blong hem i gobak long ol poket blong hem. ?Bae Angkel i luksave se sam mane i lus? Hem i wajem taem we Angkel i stap kaontem.

“Tangkyu blong karem i kam,” Angkel i talem.

Anane i glad se Angkel i no luksave se sam mane i nogat. Hem i talem tata mo stat blong wokbaot i gobak hom. Taem hem i stap gobak, hem i kakae flatem ol tofi mo biskit blong hem.

“?Olsem wanem long wokbaot blong yu kasem haos blong Angkel?” Mama i askem taem we Anane i kam long haos.

Hem i leftemap solda blong hem. “I gud nomo.”

“Tangkyu blong karem mane ia i go long hem, long bihaf blong mi ” Mama i talem.

Anane i lukluk daon long floa. Hem i stat blong filim gilti. ?Olsem wanem sapos papa mo mama i faenemaot se hem i spenem sam mane? Hem i no wantem lusum tras blong olgeta.

Nekis moning, Mama i askem hem blong go pem sam samting long wan stoa we i stap kolosap. “?Afta yu kambak stret long haos afta we yu go long stoa, OKei?”

“Okei.” Anane i wokbaot tru long maket, hem i no bin stop blong pem wan samting. Hem i tantanem ol aebro blong hem mo tingting, Naoia bae mi mekem stret wanem Mama askem.

Afta we hem i finis, hem i go stret long haos. Hem i givim evri jenj i go long Mama.

Long Sandei ia, Anane i go long Praemeri klas. “Gud moning!” tija blong hem i talem. “Tedei bae yumi tokbaot fasin blong stap obei. Hem i impoten blong yumi lisin long ol papa mo mama blong yumi mo mekem ol gudfala joes.

Anane i tingbaot mane we hem i spenem long tofi mo ol biskit. Hem i harem bel blong hem tanem. Hem i save se hem i mekem wan rong joes.

Mo afta jos, Anane wantem toktok long papa mo mama blong hem. Hat blong hem i stap pam.

“?Mama, Papa? Yu save mane we yu givim long mi blong go givim long Angkel.” Anane i askem. “Okei, mi bin pem sam swits wetem sam mane ia.” Hem i lukluk daon long floa. “Mi sore.”

“Tangkyu blong stap ones, Papa i talem.” Mi praod long yu.”

Anane i smael. Hem i glad se hem i talemaot trutok. Mo hem i harem gud insaed afta we hem i talem long papa mo mama blong hem. Hem i save se hem i mekem wan gud joes finis.