Wan Niu Jos blong Jamesi
Jamesi i filim i defren long ples ia bitim we hem i filim long nara jos blong olgeta.
Wan tru stori we i kam long Fiji.
Jamesi i wokbaot aot i go long ples we famli blong hem i pulum smol fanis we oli stap lukaotem ol pig long hem. “Hemia blong yufala, ol pig.” Hem i sakem sam kakae, mo ol pig oli mekem ol hapi noes.
Afta Jamesi i karem ol klin wota botel long tap aotsaed. Kol wota i kamaot mo go insaed long botel taem hem i onem tap. Fidim ol pig mo karem wota blong famli blong hem i olsem wanem nao hem i stap helpem famli blong hem evri dei.
“!Jamesi!” Mama i singaot. “?Rere blong go long jos?”
Jamesi i ofem wota mo karem las botel we i hevi i go insaed. “!Mi rere naoia!”
Evri Sandei famli blong Jamesi i stap go long wan Kristen jos long taon blong olgeta. Hem i laekem blong stap lanem abaot Jisas Kraes.
I no long taem Jamesi mo ol smol sista blong hem, Unaisi mo Marama, oli wokbaot wetem ol famli blong olgeta go long jos. Sam wael jiken i stap mekem noes long rod.
Be taem oli kasem ples ia, ol doa oli klos. “Mi fogetem se jos i klos long wik ia mo nekis wik from pasta i aot,” Papa i talem.
“?I gat wan narafala jos yumi save go long hem?” Jamesi i askem. Hem bae i harem nogud sapos hem i no go long jos long wik ia.
Papa i tingting blong wan smoltaem. “Yes,” hem i talem. “Mi ting se mi save wan.”
Jamesi mo famli blong hem oli folem Papa i gobak long haos blong olgeta. Evriwan i go long smol wud bot blong olgeta long en blong reva. Papa i sidaon biaen blong mekem ejin i stat.
Bot i ron go daon long reva. Jamesi i stap lukaotem ol pijin we i stap haed long ol tol grin tri. Afta long 15 minit, oli luk wan smol jos bilding. I gat wan saen we i talem: “Jos Ia blong Jisas Kraes blong Ol Lata-dei Sent.”
“Jos ia nao mi stap tingting long hem,” Papa i talem. Hem i draevem bot i go long so, mo evriwan i kamaot. Oli save harem miusik i stap kam long japel.
Insaed, Jamesi i sidaon wetem papa mo mama blong hem mo ol sista blong hem. Oli lisin long ol toktok mo ol singsing. Jamesi i filim wan wom, hapi filing insaed.
Taem we miting i finis, wan naes woman i kam toktok long olgeta. “Yumi gat wan spesel klas blong ol pikinini, hem i talem. “Oli singaotem Praemeri. ?Yu wantem kam?”
Jamesi i lukluk long tufala smol sista blong hem. Hem i fraet smol blong go long wan klas we hem i no save wan man! I gud se tufala smol sista blong hem i kam tu. Ating bae hem i naes!
“Yes,” Jamesi i talem.
“!Yumi go!” Marama i glad we.
Jamesi mo tufala smol sista blong hem i folem woman ia i go long wan klasrum. I gat plante long ol pikinini oli stap sidaon long ol smol jea, oli stap toktok mo laflaf. Taem Jamesi i sidaon oli smael long hem. !Evriwan oli naes!
Oli singsing long ol singsing, mo ol narafala pikinini oli helpem Jamesi mo ol sista blong hem oli lanem ol toktok. Oli gat ol lesen abaot Jisas Kraes. Jamesi i filim i defren long ples ia bitim we hem i filim long nara jos blong olgeta. Hem i wan defren we i gud.
Taem we jos i finis Jamesi i klaem bakegen i gobak long bot blong gobak hom. Jamesi i stap lukluk long saen blong bilding bakegen. I gat nem blong Jisas Kraes long hem. !So i minim se hemia i Jos blong Jisas Kraes! Jamesi i wantem blong folem Jisas.
“?Yumi save kambak nekis wik bakegen?” Jamesi i askem.
Mama mo papa, tufala i smael. “Mitufala i stap tingting long semmak samting,” Mama i talem.
“!Yes! Unaisi i singaot.
Jamesi i smael. Hem i save se oli faenem wan samting spesel. Mo hem i no save wet blong lanem moa.
Ol pikja droing oli kam long Bethany Stancliffe