Ol Paeonia long Evri Graon

I Smol Olsem Heven

I kam long Rebekah Jakeman

“?Yu wantem kam long jos?” Angkel Reza i askem.

Wan tru stori we i kam long India mo Kanada.

Tahira i foldem las set mo putum insaed long sutkes blong hem. Hem i stap fulumap ol klos blong hem blong wan trip blong hem blong spendem sama wetem angkel mo anti blong hem long Kanada. Hem i glad be hem i fraet smol tu. Kanada i stap longwe long hom blong hem long India.

“?Yu bin karem evri samting?” Mama i askem.

“Mi ting.” Tahira i sarem sutkes blong hem.

“Bae yu gat wan gud taem. Tingbaot blong givim Angkel Reza mo Anti Misu wan bigfala hag we i kam long mi,” mama i talem.

Taem Tahira i kamaot long plen long Kanada, hem i givim Angkel Reza mo Anti Misu wan bigfala hag. “Hemia i kam long mama blong mi,” hem i talem.

Oli spendem ol nekis dei blong lukluk raon long siti mo ol ples kolosap. Hem i visitim amusemen pak mo go luk Niagara Falls. !Hem i gud tumas!

Long Satedei aftenun, Tahira i help blong mekem jiken makhani blong dina. Afta we oli kakae, Angkel Reza i askem hem wan kwestin.

Man mo gel oli sidaon long tebol mo oli stap toktok

“?Yu laekem blong kam long jos wetem mifala tumoro?” hem i askem. “Mifala stap go long wan Kristen jos. Mifala lanem abaot Jisas Kraes mo gospel blong Hem long ples ia.”

“Yes,” Tahira i talem. Mama mo papa oli biliv long wan defren relijin, be Tahira i go long wan Kristen boding skul long India. Blong go long wan niu jos bae hem i no mekem wan defren.

Pipol oli stap sidaon long jea blong jos mo singsing wan hym

Long nekis dei, Tahira i putum dres we anti blong hem i givim long hem blong werem. Taem oli kasem japel mo wokbaot i go insaed, evriwan oli stap singsing. Tahira i stop mo lukluk long ol pipol. I gat ol mama mo papa oli sidaon wetem ol pikinini blong olgeta. Evriwan oli hapi. Singsing i bin naes tumas.

Hemia i filim olsem heven, Tahira i tingting.

Tahira i sidaon long wan long ol jea ia wetem Anti Misu mo Angkel Reza. Hem i wajem taem oli pasem ol trei blong bred mo wota. Hem i lisin long ol man we oli givim toktok oli tokbaot abaot Jisas Kraes. Mo hem i harem sam moa singsing. Las singsing hem i abaot famli i save stap tugeta blong oltaem. Hem i filim gud tumas long ol toktok blong singsing ia.

Afta long las prea, Tahira i tanem hem i go long Angkel Reza. “?I minim wanem blong stap tugeta oltaem?”

Angkel Reza i smael. “Yumi biliv se taem yumi folem Jisas Kraes mo mekem mo kipim ol promes wetem God, yumi save stap long heven wetem ol famli blong yumi wan dei—evriwan tugeta.

Tahira i filim wom insaed long hed blong hem kasem long ol fingga blong leg blong hem. Hem i laekem tingting ia blong stap wetem famli blong hem, blong oltaem.

Afta long jos, Tahira i stap tingting long naesfala miusik ia. Hem i wantem blong lanem moa abaot Jisas Kraes mo famli we i stap oltaem. Hem i bin disaed blong mit wetem ol misinari. Ol wik i pas, Tahira i save moa se gospel ia i tru.

Tahira i ringim papa mo mama blong hem mo talem long tufala wanem hem i stap lanem. Afta hem i askem tufala wan impoten kwestin. “?Mi save kasem baptaes? !Oli talem yes!

Long dei blong baptaes blong hem, Tahira, Angkel Reza, mo Anti Misu i singsing “Mi Pikinini blong God.” Angkel Reza i transletem i go long Hindi blong oli save singsing. Hindi hem i wan lanwis we Tehira i toktok long hem long hom blong hem long India.

Taem Tahira i singsing, hem i gat wan wom filing long hat blong hem. I filim olsem heven. Mo Tahira i save se from Jisas Kraes, sapos hem i kipim ol promes blong hem long Papa long Heven, hem i save stap wetem tufala Tugeta bakegen wan dei.