No Stret Evriwan
!Dei blong Adeline we i stret evriwan i finis!
Wan tru stori we i kam long Franis.
Adeline i finis droem las bokis blong tikim long pepa blong hem. Narasaed long hem, hem i raetem Talem ol prea long moning mo naet.
“?Wanem ia?” Mama i askem.
“Mi stap mekem wan jeklis blong tumoro,” Adeline i talem. “!Bae mi gat wan dei we i stret evriwan!”
Mama i leftemap aebro blong hem. “?Tru?”
Adeline i sakem hed blong agri. “Long Praemeri mifala i lanem blong kam stret fulwan long Kraes. Bae mi gud moa blong mekem se bae mi save gat ol dei we i stret evriwan.”
“Mi glad se yu wantem mekem ol gudfala joes,” Mama i talem. “Be yu save, i gat wan man nomo long wol ia we i stret evriwan—Jisas Kraes”
Adeline i pulum win blong hem. “Mi save. !Be mi i wantem blong traem! Mi save se mi save mekem.”
Taem we moning i kam, Adeline i rere. Hem i mekem bed blong hem mo talem moning prea blong hem.
Long taem blong brekfas, hem i help blong fidim smol sista blong hem Sylvia. Taem we Slyvia i kapsaedem ol pij blong hem long jea blong hem, Adeline i pulum gud win blong hem. Hem i kaon kasem fo afta i help blong klinap.
Long skul, Adeline i lukaotem ol pipol we oli nidim help. Lucas i tanem leg blong hem, mekem se Sylvia i holem lanj trei blong hem.
Taem hem i stap aot long skul, Adeline i putum bigfala smael long woman we i openem get blong skul. Woman ia oltaem nomo i stap kros. !Be tedei hem i smael i kambak!
Afta skul, Adeline i givim long Sylvia fevret nunus blong hem blong hem i pleplei wetem. Mo bifo hem i go long bed, hem i talem wan prea. Hem i tikim evri aetem long lis blong hem mo silip i go insaed long blangket blong hem. Hem i glad mo i taet tumas. !Hem i rere blong gat wan nara dei we i stret evriwan tumoro!
Taem Adeline i wekap long nekis dei, evri doli blong hem i silip olbaot long flo. Slyvia i stap holem wan mo i stap titi long hem. !Hem i mas pulumaot evriwan.
“!Sylvia!” Adeline i singaot. “!Mi talem long yu blong no tajem ol doli blong mi!” Hem i karem aot doli we Sylvia i stap holem. Sylvia i krae mo ronwe.
Adeline i lukluk long jeklis blong hem long doa. Hat blong hem i brok.
Mama i kam insaed stret long taem we Adeline i filim wota blong ae blong hem long jiks blong hem.
“?Wanem nao i hapen?” Mama i askem.
“Mi fogetem blong talem prea blong mi. Mi no bin mekem gud bed blong mi.” Voes blong Adeline i seksek. “Mo mi bin mekem strong long Sylvia. !Dei blong mi we i stret evriwan i finis!”
Mama i haggem Adeline. “Hem i had blong stap stret evriwan oltaem. Blong talem stret, bae i no save nomo.”
Adeline i mekem fes blong hem i nogud. “?Be olsem wanem nao mi save kam stret evriwan long Kraes?”
“!Hemia nao!” “Sapos i no Jisas Kraes bae yumi no save kam stret evriwan,” Mama i talem. “Hem i givim laef blong Hem long yumi from Papa long Heven i save se bae yumi mekem ol mistek mo bae yumi nidim help. Jisas i tekem ol fasin nogud mo i mekem olgeta i kam moa gud.”
Adeline i tingting smol long hemia. “?So i minim se mi no save gat ol dei we i stret evriwan evri dei?” hem i askem.
Mama i saksakem hed blong hem blong talem no. “No. Bae yu gat ol dei we i had. Be bae yu gat ol dei we oli gud tu.” Mama i putum hea blong Adeline i go biaen long sora blong hem. “Wanem we i gud hem i we yu stap traem bes blong yu. Iven sapos wan dei blong yu i stat wetem wan rong joes, oltaem yumi save talem wan prea blong sakem sin mo traem bakegen. Wetem help blong Jisas Kraes, yu yu inaf.”
Adeline i filim wom insaed.
“Naoia, long lis blong yu.” Mama i poenem i go long lis. “?Olsem wanem yumi lukluk nomo long wan samting?”
Adeline i lukluk long lis blong hem. Hem i brekem pepa mo skojem wanem we i stap biaen long doa. Wan aetem we i stap yet i talem Talem ol prea long moning mo naet.
Adeline i smael. “Dei blong mi i no stat gud yet, be mi stil save talem wan prea naoia. !Wetem help blong Jisas Kraes, bae hem i inaf!”
Ol pikja droing oli kam long Giovanni Abeille