Ansa blong Sed
“?Olsem wanem sapos yumi planem sam tri?” Cristal i askem.
Wan tru stori we i kam long Ajentina.
“?Mifala save go long plasa?” Sista blong Ivan, Cristal i askem.
Ivan i lukluk i go aotsaed. “Mi tu mi wantem go,” hem i talem. “Be bae yumi mas wet san i go daon. Ples i hot tumas”
Plasa i wan bigfala fil blong gras kolosap long haos blong olgeta. Oli laekem blong plei lelu mo haed mo lukaotem long ples ia wetem ol fren blong olgeta. Be plasa i nogat wan sed blong olgeta blong oli spel long hem from hit blong san. Mo long sama ia hem i wan bigfala problem.
Cristal i stap kwaet blong smol taem. Afta hem i talem,“?Olsem wanem sapos yumi planem sam tri? Olsem ia long wei ia plasa bae i save gat sed. Afta yumi save pleiplei iven sapos ples i hot tumas.
Ivan i smael. “!Mi laekem tingting ia!”
Ivan mo Cristal i talem long Papá plan blong tufala. “Bae mi askem siti blong oli givim raet long yumi,” hem i talem.
Samfala wik afta, oli kasem raet we oli nidim mo oli rere blong stat! Papa i tekem Ivan mo Cristal i go long wan bigfala tri we i gro biaen long haos blong olgeta. Andanit long tri ia, i gat sam smolsmol tri oli stap gro.
“Taem ol bigfala tri i givim flaoa, ol sid oli foldaon long graon,” Papa i eksplenem. “Afta ol smol tri oli gro aot long hem. !Oli olsem ol smol merikel blong neja!”
Papa i soem long olgeta olsem wanem blong diggim ol smol tri ia. Ivan mo Cristal tufala planem gud ol tri ia go long wan flaoa pot.
Wan Satedei aftenun taem we san i stap haed biaen long ol klaod, Ivan mo Cristal tufala i putum ol smol tri long wan kat. Sloslo oli pusum i go long plasa. Ol smol brata mo sista blong Ivan oli help blong karem ol baket blong wota. Mama mo Papa tufala karem sam savel.
Tugeta oli jusum wan ples blong wanwan long ol tri ia. Oli digim ol hol mo planem wanwan tri wetem lav. Mama i soem long olgeta olsem wanem blong digim ol smol hol raon long tri blong oli wotarem. “Ol tri oli nidim laet blong san, wota, mo plante kakae blong mekem oli gro strong,” hem i talem. “!Olsem ol pikinini!”
Ivan i stap tingting long tri biaen long haos blong olgeta mo stap pikjarem olsem wanem bae ol tri ia oli luk olsem wanem wan dei. “?Yu save bilivim hemia?” hem i talem. “Sam dei bae ol tri ia oli tol bitim yumi!”
Long spring , ol tri bae i mekem evriwan i sapraes wetem ol naes pink flaoa blong olgeta. Long sama, bae sed blong olgeta i go krosem plasa. Mo long fol, ol lif blong olgeta bae i kavremap graon olsem wan yelo kapet.
Evri dei, Ivan mo Cristal tufala i visitim plasa blong jekem ol tri. Oli mekemsua se wanwan tri i gat inaf wota. Mo evri taem wan niu lif o branj i kamaot, oli filim gud tumas. !Hadwok blong tufala i stap kam gud!
Ivan i filim hapi taem i stap tingting long evri pipol we bae oli laekem sed long plasa wan dei. Hem i help blong mekem wol ia i wan moa naes ples blong ol pikinini blong Papa long Heven.
Ol pikja i kam long Colleen McKeown