Isi blong Ridim

Ol Swit mo Simpol Toktok

I Kam long Jane McBride

Wan tru stori we i kam long YSA.

Ol pikinini oli stap sidaon insaed long Praemeri mo stap lisin long wan lida

Kaci i smael taem hem i sidaon long jea blong hem insaed long Praemeri. Tedei hem i sakramen miting presentesen blong ol pikinini. Hem i fraet blong talem pat blong hem, be hem bin i mekem!

Sista Dench, Praemeri presiden, i stanap long fored. “Gud wok long sakramen miting tedei!” hem i talem. “Mi save se wanwan long yufala i wokhad blong lanem ol pat blong yufala.”

Tu boe i stap toktok, wan gel i harem nogud.

“Be Kaci nomo,” wan long ol bigfala boe i talem. “I nogat wan man i save talem wanem hem i stap talem.”

Sista Dench i mekem fes blong hem i nogud long boe ia, mo afta i tanem hem i go long Kaci mo i smael. “Yu mekem wan gudfala wok.”

Kaci i traehad blong no krae. Hem i traem bes blong hem blong lanem pat blong hem. Be samtaem ol toktok blong hem i no kamaot gud.

Gel i stap krae wetem famli blong hem long trak.

Taem oli stap gobak long haos, Kaci i nomo save holemtaet wota blong ae blong hem.

“?Wanem i rong?” Mama i askem.

“Wan long ol boe i stap jikim mi. Hem i talem se mi no bin talem gud pat blong mi.” Hem i stat blong krae moa.

Mama mo wan gel i stap toktok long trak.

“Yu bin mekem wan gudfala wok. Papa mo mi i glad long yu,” Mama i talem. “?Yu yu save se huia bakegen i glad long yu?”

Kaci i saksakem hed blong hem blong talem no.

“Papa long Heven,” Mama i talem. “Hem i save se yu mekem bes blong yu.”

Kaci i filim moa gud. Kaci i wantem blong yusum ol toktok blong hem blong helpem ol narawan i filim hapi tu.

Long skul, Kaci i talem long tija blong hem se hem i stap mekem wan gudfala wok blong stap tij.

Long haos, Papa i stap fiksim wan sef. Kaci i talem long hem se hem i stap mekem wan gudfala wok blong mekem haos blong olgeta i naes.

Aotsaed, Kaci mo brata blong hem oli stap pleplei tugeta long balong. Kaci i talem long hem se hem i stap mekem wan gudfala wok blong stap sakem balong.

Gel i stap tingting long olsem wanem hem i yusum ol kaen toktok wetem ol narawan

Stap talem long ol pipol se yu stap mekem wan gudfala wok i mekem Kaci i filim gud insaed. Taem hem i stap luk ol narawan i smael, hem i save se ol simpol toktok blong hem i mekem wan bigfala jenis!