Te tahi ’ohipa e rave nō te Mai, pe’e mai

E pi’i te Atua i te mau ’episekōpo ’e i te mau peresideni ’āma’a nō te tauturu i te tāvini i te ta’ata i roto i tā rātou mau pāroita ’e te mau ’āma’a (hi’o Te Ha’api’ira’a Tumu ’e te mau Fafaura’a 72:2). Tāpūpū i te mau māfatu pāpie ’e pāpa’i i te mau mea tā ’outou e au nō ni’a i tō ’outou ’episekōpo ’aore rā te peresideni ’āma’a, i ni’a i te pāpie tāta’itahi. Tāpiri i te mau māfatu i ni’a i te ’ūputa o tāna piha ’aore rā tōna fare.

’Ia tae i te hō’ē mahana, e nehenehe tātou e ora i roto i te bāsileia tiretiera nā muri i te Metua i te ao ra, Iesu Mesia ’e tō tātou ’utuāfare (hi’o Te Ha’api’ira’a Tumu ’e te mau Fafaura’a 76:62, 70, 92). Tē fa’aau nei te mau pāpa’ira’a mo’a i te bāsileia tiretiera i te mahana. ’A fa’a’ohipa i te hō’ē merētia pāpie ’aore rā te hō’ē tuha’a pāpie nō te hāmani i te hō’ē mahana. Tāpūpū i te tahi mau porotoru nō te mau hihi mahana ’a tāpiri atu ai i ni’a i te menemene ma te tahi pia tāpiri aore rā te hutiāvere. ’A paraparau e aha tā ’oe e nehenehe e rave i teienei nō te fa’aineine i te ora i pīha’i iho i te Metua i te ao ra ’e ia Iesu Mesia, ’ia tae i te hō’ē mahana.

I raro a’e i te fa’aterera’a a te Atua, ’ua hāmani Iesu Mesia i te mau ta’ata ato’a i ni’a i te fenua nei (hi’o Te Ha’api’ira’a Tumu ’e te mau Fafaura’a 77:2). Ha’uti i te tu’upiri e aha terā ’ānimara ! E rave te hō’ē ta’ata mai te huru i te hō’ē ’ānimara. E tāmata te tahi mau pu’era’a nō te feruri e ’o vai terā ’ānimara. ’Ia ’itehia ’o vai te ’ānimara, ’a parau i te hō’ē mea tā ’outou e au i terā ’ānimara.

Tē fa’aro’o tāmau nei te Metua i te ao ra i tā tātou mau pure (hi’o Te Ha’api’ira’a Tumu ’e te mau Fafaura’a 81:3). ’A hīmene ’e tō ’outou ’utuāfare i te hīmene « Te pure a te hō’ē tamari’i » (Buka hīmene nā te mau tamari’i, 12). Ha’amata i te hīmene ma te hō’ē noa ta’ata. Mai reira e ’āmui marū noa mai ai te tahi atu mau ta’ata ato’a. I muri a’e i te hīmenera’a, ’a paraparau nō te mau mea tā ’outou e nehenehe e pure ’ei ’utuāfare.