’Aita i maita’i roa atu

’Ua oti Adeline i te tāpa’o i te ’ohipa hope’a i ni’a i tāna tāpura ’ohipa. I pīha’i mai, ’ua pāpa’i ’oia : Pure i te po’ipo’i ’e i te pō.

« E aha terā ? » ’Ua ui Māmā.

« Tē fa’aineine ra vau i tā’u tāpura ’ohipa nō ananahi », ’ua parau Adeline. « Tē fa’aineine ra vau i te hō’ē mahana maita’i roa ! »

Pe’e te tu’amata o Māmā i ni’a. « E parau mau ? »

Ueue te upo’o ’o Adeline. « I te Paraimere, tē ha’api’i nei mātou nō ni’a i te tāpaera’a i te fāito maita’i roa i roto i te Mesia. Tē ’ōpua nei e rave maita’i i te mau mea ato’a e tupu ai te mau mahana maita’i roa. »

« Tē ’oa’oa nei au ’ua hina’aro ’oe e rave i te mau mā’itira’a maitata’i », ’ua parau atu Māmā. « ’Ua ta’a rā ia ’oe ē, hō’ē noa ta’ata i ni’a i te fenua e mea maita’i roa—’o Iesu Mesia. »

Mutamuta ri’i Adelina. « ’Ua ’ite au. Terā rā, tē hina’aro mau nei au e tāmata ! Iā’u nei, e haere iā’u. »

’Ia po’ipo’i a’e, ’ua ineine roa Adeline. ’Ua fa’anaho i tōna ro’i ’e ’ua pure i tāna pure po’ipo’i.

I te tāmā’ara’a po’ipo’i, ’ua tauturu ’oia i te fa’atāmā’a i tōna teina, ia Sylvia. I te mani’ira’a Sylvia i tāna mau pēti nā ni’a i tōna pārahira’a, ’aita ’o Adeline i au roa. ’Ua tai’o ’oia i te maha ’e tauturu a’era e tāmā.

I te fare ha’api’ira’a, ’ua hi’o Adeline i te mau ta’ata tei hina’aro i te tauturu. ’Ua ’o’i te ’āvae o Lucas, nā Adelina ïa e ta’ita’i i tāna ’iri ’āfa’ira’a mā’a.

’A ho’i ’oia mai te fare ha’api’ira’a, ’ua fa’a’ite Adeline i te mata ’ata’ata i te vahine e tāpe’a i te ’ūputa rahi o te fare ha’api’ira’a. ’Ua mātauhia e vahine mata riri tōna. I teie rā mahana, ’ua ’ata’ata ri’i mai ’oia !

I muri mai i te fare ha’api’ira’a, ’ua hōro’a Adeline ia Sylvia i tāna ’ānimara ha’avare au roa a’e nō te ha’uti. ’E hou ’a haere ai e ta’oto, ’ua parau ’oia i tāna pure. ’Ua tāpa’o ’oia i te mau ’ohipa i ni’a i tāna tāpura ’ohipa ’e mohi atu ra i raro a’e i te ’ahu ta’oto. E mana’o ’oa’oa tōna ’e te rohirohi ato’a. ’Ua ineine ’oia nō te tahi atu mahana maita’i roa ananahi !

I te arara’a Adeline i te po’ipo’i a’e, ’ua purara tāna mau pēpe hurio nā raro. Tei roto te hō’ē i te rima o Sylvia, ’e te hō’ē pae i roto i te vaha. Pāpū ē nāna i huti mai ia rātou !

« E Sylvia ! » ’Ua tuō Adeline. « ’Ua parau vau ia ’oe ’eiaha e ha’uti i tā’u mau pēpe hurio ! » Haru mai nei i te pēpe hurio i roto i te rima o Sylvia. ’Ua ta’i ’o Sylvia ’e ’ua horo atu ra.

Hi’o ihora Adeline i tāna tāpura ’ohipa i ni’a i te ’ūputa. ’Ua hepohepo tōna ’ā’au.

Tae mai nei ’o Māmā, e roimata i ni’a i tōna papari’a.

« E aha tei tupu ? » Te uira’a ïa a Māmā.

« ’Ua mo’e iā’u tā’u pure. ’Aita vau i fa’anaho i tō’u ro’i. » Rūrū te reo o Adeline. « ’E ’ua tuō vau i ni’a ia Sylvia. ’Ua ’ino roa tō’u mahana maita’i roa ! »

Tauahi a’era Māmā ia Adeline. « E mea pa’ari mau ’ia tae i te fāito maita’i roa i te mau taime ato’a. E’ita roa e nehenehe. »

Tu’atu’a te mata o Adeline. « Nāhea ïa vau e tae i te fāito maita’i roa i roto i te Mesia ? »

« Terā mau te rāve’a ! E’ita e nehenehe e tae i te fāito maita’i roa ’aita ana’e Iesu Mesia », ’ua parau Māmā. « ’Ua hōro’a ’oia i tōna ora nō tātou nō te mea ’ua ’ite te Metua i te ao ra e hape tātou ’e e tītauhia tāna tauturu. Nā Iesu e rave i tā tātou mau tāmatara’a hapehape nō te fa’ariro i te reira ’ei mea maitata’i. »

’Ua feruri Adeline i te reira. « E’ita ïa tā’u e nehenehe e fa’atupu i te mahana maita’i roa i te mau mahana ato’a ? », ’ua ui ’oia.

Ueue te upo’o o Māmā. « ’Aita. E tupu iho ā te mau mahana fifi. E tupu ato’a rā te mau mahana maitata’i. » ’Ua tu’u Māmā i te rouru o Adeline i muri i tōna tari’a. « Tē fa’aitoito nei ’oe, terā te mea faufa’a a’e. Noa atu ē, e ha’amata te hō’ē mahana nā roto i te mā’itira’a hape, i te mau taime ato’a e nehenehe tātou e pure nō te tātarahapa ’e nō te tāmata fa’ahou ā. Maoti te tauturu a Iesu Mesia, ’ua nava’i roa ’oe. »

E mana’o māhanahana i roto ia Adeline.

« I teienei, tā ’oe tāpura ’ohipa. » Fa’atoro ihora Māmā i ni’a i te tāpura ’ohipa. « E aha te mana’o mai te peu e rōtahi noa tāua i ni’a i te hō’ē mea ? »

’Ua hi’o Adeline i tāna tāpura ’ohipa. Pāhae ihora i te hō’ē pae o te pāpie ’e tāpiri atu ra i te mea e toe i ni’a i te ’ūputa. Te ’ohipa i toe tē parau ra : Pure i te mau po’ipo’i ato’a ’e te mau pō ato’a.

’Ua ’ata’ata Adeline. « ’Aita paha tō’u mahana i ha’amata ma te maita’i roa, e nehenehe rā tā’u e pure i teienei. ’E maoti te tauturu a Iesu Mesia, e nava’i roa ïa ! »

Pia i te PDF

Fa’ahōho’ara’a nā Giovanni Abeille