Mau pionie nā te mau fenua ato’a
Mai te huru ri’i i te ra’i
« ’Ua hina’aro ānei ’oe e haere mai i te pureraa ? » ’Ua ui atu Pā’ino Reza.
E ’ā’amu mau nō ’Īnītia ’e Tanata.
’Ua tūfene Tahira i te ’ahu hope’a ’e tu’u atu ra i roto i tāna ’āfata ’ōta’a. Tē fa’aineine ra ’oia i tāna mau tauihaa’ nō te haere i te tau ve’ave’a ’e tōna pātea ’e te pā’ino i Tanata. ’Ua ’oa’oa roa ’oia, ’ua taiā ato’a rā. E mea ātea roa Tanata i tōna fare i ’Īnītia.
« ’Aita i mo’ehia te hō’ē mea ? » ’Ua ui atu Māmā.
« ’Aita. » ’Ua tāpiri Tahira i tāna ’āfata ’ōta’a.
« E au ’oe i tō ’oe tere. ’Eiaha e mo’ehia e ’āpā maita’i ia Pā’ino Reza ’e ia Pātea Misu nō’u », ’ua parau Māmā.
I te poura’a mai Tahira mai ni’a mai i te manureva, ’ua ’āpā maita’i ’oia ia Pā’ino Reza ’e ia Pātea Misu. « Nā Māmā terā », ’ua parau atu ’oia.
I te mau mahana nō muri mai, ’ua tere māta’ita’i rātou i te ’oire ’e te mau vāhi nā reira. ’A tahi ra ’oia i haere ai i roto i te hō’ē vāhi fa’a’oa’oara’a ’e ’a ’ite ai i te topara’a pape Niagara Falls. E mea ’ārearea roa !
I te avatea mahana mā’a, ’ua tauturu Tahira i te tunu i te moa makhani nō te tamā’ara’a i te pō. I muri a’e i te tāmā’ara’a, ’ua ui atu ’o Pā’ino Reza i te hō’ē uira’a.
« E hina’aro ānei ’oe e haere mai i te purera’a nā muri ia mātou ananahi ? », ’ua ui ’oia. « E haere mātou i te hō’ē purera’a keresetiano. Tē ha’api’i nei mātou nō ni’a ia Iesu Mesia ’e tāna ’evanelia. »
« Nā reira », tā Tahira i pāhono. E mea ’ē te ha’apa’ora’a fa’aro’o tā Māmā ’e Pāpā e ti’aturi, ’ua haere rā Tahira i te hō’ē fare ha’api’ira’a keresetiano ma te vāhi nohora’a nō te mau pīahi, i ’Īnītia. ’Aita ïa e ’ohipa ta’a ’ē ’ia haere atu i te hō’ē purera’a ’āpī.
I te mahana nō muri iho, ’ua ’ō’omo Tahira i te hō’ē ’ahu roa tā tōna pātea i hōro’a mai. I te taera’a rātou i te fare purera’a ’e i te tomora’a i roto, tē hīmene ra te mau ta’ata. ’Ua fa’aea Tahira ’e ’ua hi’o atu ra i te mau ta’ata. E mau māmā ’e te mau pāpā ’e tā rātou mau tamari’i. E hōho’a mata ’oa’oa ana’e. E mea nehenehe roa te hīmene.
Mai te huru ri’i teie i te ra’i, ’ua mana’o ’o Tahira.
Pārahi ihora Tahira i ni’a i te hō’ē pārahira’a ’e tōna Pātea Misu ’e tōna Pā’ino Reza. ’Ua hi’o ’oia i te mau fāri’i pāne ’e pape i te ’ōperera’ahia. ’Ua fa’aro’o ’oia i te mau ta’ata a’o i te paraura’a nō Iesu Mesia. ’E ’ua fa’aro’o ’oia i te tahi atu ā hīmene. Te hīmene hope’a, nō ni’a ïa i te mau ’utuāfare e vai ’āmui ē a muri noa atu. ’Ua au roa ’oia i te mau mana’o i tupu i roto iāna i terā mau parau.
I muri a’e i te pure hope’a, ’ua fāriu Tahira i ni’a ia Pā’ino Reza. « E aha te aura’a ’ia ’āmui ē a muri noa atu ? »
’Ua ’ata’ata Pā’ino Reza. « Tē ti’aturi nei mātou ē, mai te mea e pe’e tātou ia Iesu Mesia ma te rave ’e ma te ha’apa’o i te mau parau fafau ’e te Atua, e nehenehe tātou e ora i te ra’i ’e tō tātou ’utuāfare ’ia tae i te hō’ē mahana—tātōu pā’āto’a. »
E māhanahana tei tupu i roto iāna mai tōna upo’o i tōna ’āvae. ’Ua au roa ’oia i te mana’o e vai i pīha’i iho i tōna ’utuāfare ē a muri noa atu.
I muri a’e i te purera’a, ’ua feruri tāmau noa Tahira i te pehe nehenehe. I hina’aro ’oia e ha’api’i rahi atu ā nō ni’a ia Iesu Mesia ’e te mau ’utuāfare mure ’ore. Fa’aoti a’era ’oia e fārerei i te mau misiōnare. ’A ma’iri noa ai te mau hepetoma, tē ’ite rahi noa atu ra Tahira ē e parau mau te ’evanelia.
’Ua niuniu Tahira i tōna nā metua nō te parau atu i te mea tāna e ha’api’i ra. Ui a’era ’oia ia rāua i te hō’ē uira’a faufa’a rahi. « E nehenehe ānei au e bāpetizo iā’u ? » Nā ’ō mai ra rāua ’ē !
I te mahana nō tōna bāpetizora’a, ’ua hīmene Tahira, ’o Pā’ino Reza ’e ’o Pātea Misu i te hīmene « E tamari’i au nā te Atua. » I ’īriti Pā’ino Reza i te reira ’ia ti’a ia rātou ’ia hīmene nā roto i te reo Hindi. ’O te reo Hindi tāna e paraparau i tōna fare i ’Īnītia.
’A hīmene ai Tahira, e mana’o māhanahana tāna i putapū i tōna ’ā’au. Mai te ra’i ra te huru. ’E ’ua ’ite Tahira ē, maoti Iesu Mesia, mai te mea e ha’apa’o ’oia i tāna mau parau fafau i te Metua i te ao ra, e nehenehe tāna e ora fa’ahou i pīha’i iho ia rāua to’opiti ’ia tae i te hō’ē mahana.
Fa’ahōho’ara’a nā Ekata Mandal