Te rāve’a o te marumaru
« E mai te mea e tanu tāua i te tahi mau tumu rā’au ? » ’Ua ui Cristal.
E ’ā’amu mau nō Rāparata mai.
« E nehenehe tāua e haere i te vāhi ? » Ui a’era Cristal, te tuahine ’o Ivan.
Hi’o a’era Ivan i rāpae. « Tē hina’aro nei au », ’ua parau ’oia. « Terā rā, e ti’a paha ia tāua ’ia tīa’i ’ia topa te mahana. E mea ve’ave’a roa ».
Te vāhi ’o te hō’ē ïa ’āua ’aihere rahi i pīha’i noa mai i tō rātou fare. E mea au roa nā rāua e perē fē ’aore rā e perē tāpō i reira ’e tō rāua mau hoa. ’Aita rā tō te vāhi e marumaru nō te fa’afa’aea i te ve’ave’a. ’E i teie pu’e tau māhanahana, e mea fifi roa te reira.
’Ua vai māmū noa Cristal ma’a taime. I muri iho ’ua parau ’oia : « E mai te mea e tanu tāua i te tahi mau tumu rā’au ? Mai te reira, e marumaruhia ïa te vāhi. E nehenehe noa ïa tātou e ha’uti, noa atu e mea ve’ave’a ! »
’Ua ’ata’ata Ivan. « Mea au roa nā’u terā mana’o ! »
Fa’ati’a a’era Ivan ’e ’o Cristal i tā rāua ’ōpuara’a ia pāpā. « E ani au i te ’oire i te parau fa’ati’a » ’ua parau ’oia.
Tau hepetoma i muri mai, ’ua fa’ari’i rātou i te parau fa’ati’a tā rātou i hina’aro ’e ’ua ineine rātou nō te ha’amata ! ’Ua ’āfa’i pāpā ia Ivan ’e ia Cristal i te tumu rā’au rahi e tupu ra i muri i tō rātou fare. I raro a’e i te tumu rā’au, tē tupu ra te mau tumu rā’au na’ina’i.
« ’Ia tiare-ana’e-hia te tumu rā’au rahi, e fa’atopa mai ’oia i te mau huero i ni’a i te repo », ’ua fa’ata’a mai pāpā. « I muri mai, e tupu te mau tumu rā’au ri’i nā roto mai i te reira. E au rā mai te mau temeio na’ina’i o te nātura ! »
’Ua fa’a’ite pāpā ia rāua nāhea ’ia heruheru maita’i i te mau tumu rā’au na’ina’i. ’Ua tanu marū noa Ivan ’e ’o Cristal i te reira i roto i te mau fāri’i tiare.
I muri iho, i te hō’ē avatea mahana mā’a ’a hunahia ai te mahana i muri mai i te mau ata, ’ua huri Ivan ’e ’o Cristal i te mau tumu rā’au na’ina’i i roto i te hō’ē pere’o’o tūra’i. Ma te marū noa, ’ua tūra’i atu rāua i te reira i te vāhi. ’Ua tauturu mai te mau taea’e ’e te mau tuahine teina ’o Ivan nō te amo i te mau pātete pape. ’Ua ’āfa’i mai māmā ’e ’o pāpā i te tahi mau ope.
’Ua mā’iti ’āmui rātou i te hō’ē vāhi nō te tumu rā’au tāta’itahi. ’Ua heru rātou i te mau ’āpo’o ’e ’ua tanu i te tumu rā’au tāta’itahi ma te here. ’Ua fa’a’ite māmā ia rātou nāhea ’ia heru i te ’āpo’o ’ati a’e te mau tumu rā’au nō te pīpī i te pape. « E hina’aro te mau tumu rā’au i te mahana, te pape, ’e e rave rahi mā’a nō te tupu i te rahi », tē parau ra ’oia. « Mai te mau tamari’i ato’a ! »
Mana’o a’era Ivan i te tumu rā’au i muri i tō rātou fare ’e ’ua feruri mai te aha te huru o te mau tumu rā’au i te hō’ē mahana. « E nehenehe ’oe e ti’aturi i te reira ? » ’ua parau ’oia. « I te hō’ē mahana e rarahi a’e teie mau tumu rā’au ia tātou ! »
I te tau fa’atupura’a rā’au, e fa’ahiahia te mau tumu rā’au i te mau ta’ata ato’a i tō rātou mau tiare tārona ora. I te tau ve’ave’a, e parare ’ati a’e tō rātou marumaru i te vāhi. ’E i te tau ha’apohera’a rā’au, e tāpo’i te mau rau’ere i te repo i te hō’ē vauvau tahua re’are’a.
I te mau mahana ato’a, e haere Ivan ’e ’o Cristal i te vāhi nō te hi’opo’a i te huru o te mau tumu rā’au. ’Ia pāpū maita’i ia rāua ē ’ua nava’i maita’i te pape nō te tumu rā’au tāta’itahi. ’E i te mau taime ato’a e tupu mai te hō’ē rau’ere ’aore rā te hō’ē ’āma’a ’āpī, e te’ote’o roa rāua. ’Ua ho’o’ona tā rāua ’ohipa pūai !
’Ua ’oa’oa roa Ivan i te mana’ora’a e fāna’o te mau ta’ata ato’a i te marumaru o te vāhi i te hō’ē mahana. ’Ua tauturu ’oia i te fa’arirora’a i te fenua ’ei vāhi nehenehe a’e nō te mau tamari’i ato’a a te Metua i te ao ra.
Fa’ahōho’ara’a nā Colleen McKeown