’Ia ’apo ’e ’ia tupu i te rahi
’Ua tae mai tātou i ni’a i te fenua nei nō te ha’api’i ’e nō te tupu i te rahi ’e nō te riro mai te Metua i te ao ra te huru ’ia tae i te hō’ē mahana (hi’o Mose 1:39). I te tahi taime e rave tātou i te mau mā’itira’a ’aita tātou e te’ote’o roa nei. ’Ia hara ana’e tātou ’aore rā ’ia hape tātou, ’ua fāna’o tātou e nehenehe tātou e fāriu i ni’a ia Iesu Mesia.
E nehenehe tātou e tupu tāmau i te rahi ’e e ha’amata fa’ahou ā ’ia hape tātou ’aore rā ’ia rave tātou i te hō’ē mā’itira’a ’ino. ’Ua here maita’i roa te Metua i te ao ra ’e ’o Iesu Mesia ia ’oe, ’e e nehenehe tā rāua e tauturu ia ’oe i te mau taime ato’a !
E nehenehe te tā’āto’ara’a e tātarahapa
Te mā’itira’a ’ia rave i te hō’ē mea tā ’oe i ’ite ē e mea pāto’i i te mau fa’auera’a a te Atua, e hara ïa. ’Ua ’ite te Metua i te ao ra ē, e rave tātou pā’āto’a i te hara ’e e rave tātou i te mau mā’itira’a ’ino. Nō reira ’oia i tono mai ai i tāna Tamaiti, ’o Iesu Mesia. Maoti ’oia, e nehenehe tātou e tātarahapa, e ’ite i tōna here ’e e rave i te mau mā’itira’a maitata’i a’e (hi’o Enosa 1:5–6). ’A ha’amana’o ē, ’ua parau fafau te Fatu : « ’O ’oia ’o tei tātarahapa i tāna ra mau hara, ’ua fa’a’orehia ïa te reira, ’e e ’ore ho’i au ’o te Fatu e ha’amana’o fa’ahou ā i te reira » (Te Ha’api’ira’a Tumu ’e te mau Fafaura’a 58:42).
’Apo i te ha’api’ira’a mai roto mai i te mau hape
Te mau hape, e mau mea mana’o-’ore-hia ïa tā ’oe i rave. I te tahi taime e fa’atupu te mau hape i te mana’o ’oto ’e te ha’amā. ’Aita rā i tītauhia ’ia rōtahi i ni’a i tā tātou mau hape ! E nehenehe tātou e ’apo i te ha’api’ira’a mai roto mai i te reira ’a vaiiho atu ai. E nehenehe ato’a Iesu Mesia e tauturu ia tātou i roto i te reira.
Fa’ahōho’ara’a nā Tatsiana Burgaud