Tai’ora’a ’ōhie

Mau parau au ’e te ’ōhie

Nā Jane McBride

E ’ā’amu mau nō Marite mai.

Mau tamari’i e pārahi ra i roto i te Paraimere ’e e fa’aro’o ra i te hō’ē ti’a fa’atere

E mata ’ata’ata tō Kaci ’a pārahi ai ’oia i roto i te Paraimere. I teie mahana e fa’anahora’a ïa nā te mau tamari’i i te purera’a ’ōro’a. E mea ri’ari’a ’ia parau i tāna tuha’a, ’ua rave rā ’oia !

Tē ti’a ra te tuahine Dench, te peresideni o te Paraimere i mua. « Maita’i roa te ’ohipa i ravehia i te purera’a ’ōro’a i teie mahana ! » ’ua parau ’oia. « ’Ua ’ite au ē, ’ua ha’a itoito ’outou pā’āto’a nō te ha’api’i mai i tā ’outou tuha’a ».

Piti tamāroa e paraparau ra, e hō’ē tamāhine e mata ’oto ri’i tōna

« ’Aita rā ’o Kaci », ’ua parau hō’ē o nā tamāroa pa’ari a’e. « ’Aita te ta’ata e nehenehe e ta’a maita’i i te mea tāna e parau ra ».

’Ua fa’atu’atu’a te tuahine Dench i te mata mā te hi’o i te tamāroa, ’e ’ua fāriu atu ra i ni’a ia Kaci ma te mata ’ata’ata. « ’Ua rave ’oe i te hō’ē ’ohipa fa’ahiahia mau ».

’Ua tāmata Kaci ’eiaha e ta’i. ’Ua rave ’oia mai tāna e nehenehe nō te ha’api’i mai i tāna tuha’a. I te tahi rā taime, ’aita tāna mau parau pārare maita’i.

Tamāhine e ta’i ra ’e tōna ’utuāfare i roto i te pere’o’o

I ni’a i te purūmu nō te ho’ira’a, ’aita i nehenehe ia Kaci e tāpe’a fa’ahou i te roimata.

« E aha te fifi ? » ’Ua ui atu māmā.

« ’Ua fa’ao’ō’o hō’ē o te mau tamāroa iā’u. ’Ua parau ’oia ’aita vau i parau maita’i i tā’u tuha’a ». ’Ua ha’amata ’oia i te ta’i pūai atu ā.

Māmā ’e te tamāhine e ’āparau ra i roto i te pere’o’o

« ’Ua rave ’oe i te ’ohipa maita’i. Tē te’ote’o nei māua pāpā ia ’oe », ’ua parau māmā. « ’Ua ’ite ānei ’oe ’o vai te tahi e te’ote’o nei ia ’oe ? »

’Ua tā’iri’iri Kaci i tōna upo’o.

« Te Metua i te ao ra », ’ua parau māmā. « ’Ua ’ite ’oia ’ua rave ’oe mai tā ’oe e nehenehe ».

’Ua ’ite ’oia iāna i te maita’i a’e mai. ’Ua hina’aro ’oia e fa’a’ohipa i tāna mau parau nō te tauturu ia vetahi ’ē ’ia putapū i te ’oa’oa ato’a.

I te fare ha’api’ira’a, ’ua parau Kaci i tōna ’orometua ha’api’i ē, tē rave nei ’oia i te hō’ē ’ohipa maita’i ’ei ’orometua ha’api’i.

I te fare, tē tātā’i ra pāpā i te hō’ē pa’epa’e. ’Ua parau atu Kaci iāna, tē rave nei oia i te hō’ē ’ohipa maita’i nō te fa’anehenehe i tō rātou fare.

I rāpae, tē ha’uti ’āmui ra Kaci ’e tōna taea’e i te pōpō. ’Ua parau atu Kaci iāna ē, tē rave nei ’oia i te ’ohipa maita’i ma te taorara’a.

Tamāhine e feruri nei e nāhea ’oia ’ia fa’a’ohipa i te mau parau maita’i ’e vetahi ’ē

Te paraura’a i te ta’ata ē, tē rave nei rātou i te ’ohipa maita’i, ’ua fa’atupu mai i te au maita’i i roto iāna. ’A ’ite ai ’oia te mata ’ata’ata o vetahi ’ē, ’ua ’ite ’oia ē e fa’atupu tāna mau parau ’ōhie i te hō’ē ta’a-’ē-ra’a rahi.