Hō’ē ’Ēkālesia ’āpī nā Jamesi

Nā Lucy Stevenson Ewell

Tē putapū nei Jamesi i te ta’a-’ē-ra’a i’ō nei ’e i tā rātou atu fare purera’a.

E ’ā’amu mau nō Fītī mai.

Tē haere ra Jamesi i te vāhi na’ina’i tei ’āuahia i reira tōna ’utuāfare e fa’a’amu ai i te mau pua’a. « Teie, te mau pua’a ! » ’Ua tāora atu ’oia i te tahi mā’a nā rātou, ’e ’ua fe’ufe’u te mau pua’a ma te ’oa’oa.

I muri iho, ’ua ’āfa’i atu Jamesi i te mau mōhina pape mā i te rōpīnē i rāpae. ’Ua hī te pape to’eto’e i roto i te mōhina i te tātarara’a ’oia i te rōpīnē. Te fa’atāmā’ara’a i te mau pua’a ’e te ti’ira’a i te pape nā tōna ’utuāfare, ’o tāna ïa rāve’a nō te tauturu i te mau mahana ato’a.

« Jamesi ! » ’Ua piʼi mai māmā. « ’Ua ineine ’oe nō te fare purera’a ? »

’Ua tāmau Jamesi i te rōpīnē pape ’e ’ua ’āfa’i atu i te mōhina teiaha hope’a i roto. « ’Ua ineine au i teienei ! »

I te mau sābati ato’a, e haere te ’utuāfare o Jamesi i te hō’ē fare purera’a keresetiano nō tō rātou ’oire. E mea au roa nāna ’ia ha’api’i mai nō ni’a ia Iesu Mesia.

’Aita i maoro roa, tē haere ra Jamesi ’e tōna mau tuahine teina, ’o Unaisi ’e ’o Marama ’e te toe’a o tō rātou ’utuāfare i te fare purera’a. Tē ’o’o haere ra te tahi mau moa ’ōvere nā ni’a i te purūmu.

’Utuāfare e ti’a ra i mua i te hō’ē fare purera’a

I tō rātou rā taera’a atu i reira, ’ua ’ōpanihia te mau ’ōpani. « ’Ua mo’ehia iā’u ē ’ua ’ōpani te fare purera’a i teie hepetoma ’e i te hepetoma i muri nei, nō te mea ’ua reva te ’orometua », ’ua parau pāpā.

« Tē vai ra ānei te tahi atu fare purera’a tā tātou e nehenehe e haere ? », ’ua ui Jamesi. E ’oto ’oia nō te ’orera’a e haere i te purera’a i teie hepetoma.

’Ua feruri pāpā ma’a taime ri’i. « ’Ē », ’ua parau ’oia. « ’Ia mana’o vau tē vai nei hō’ē ».

’Ua pe’e atu Jamesi ’e tōna ’utuāfare ia pāpā ē tae roa i tō rātou fare. ’Ua ta’uma atu rātou pā’āto’a i roto i tō rātou poti rā’au na’ina’i i te hiti o te ’ānāvai. ’Ua pārahi pāpā i muri nō te fa’aharuru i te mātini.

E ’utuāfare i roto i te hō’ē poti rā’au na’ina’i i ni’a i te ’ānāvai

Tē haruru ra te poti i ni’a i te ’ānāvai. ’Ua ’imi Jamesi i te mau manu e tāpuni ra i roto i te mau tumu rā’au rarahi matie. I muri a’e e 15 minuti, ’ua ’ite atu rātou i te hō’ē fare purera’a na’ina’i. Tē vai ra hō’ē ’apa fa’a’itera’a tei pāpa’ihia « Te ’Ēkālesia a Iesu Mesia i te Feiā Mo’a i te mau Mahana Hope’a nei ».

« Teie te ’ēkālesia ’o tā’u i mana’o », ’ua parau pāpā. ’Ua fa’ahoro ’oia i te poti i te pae tahatai, ’e ’ua haere mai te mau ta’ata ato’a i rāpae. ’Ua fa’aro’o rātou i te pehe nā roto mai i te fare purera’a.

I roto, ’ua pārahi Jamesi i pīha’i iho i tōna nā metua ’e tōna mau taea’e ’e mau tuahine. ’Ua fa’aro’o atu rātou i te feiā a’o ’e te mau hīmene. ’Ua fa’ari’i Jamesi i te nīno’a mana’o māhanahana ’e te ’oa’oa i roto iāna.

I te hopera’a te rurura’a, ’ua haere mai te hō’ē vahine maita’i e paraparau ia rātou. « E piha ha’api’ira’a ta’a ’ē tā mātou nā te mau tamari’i », ’ua parau ’oia. « ’Ua pi’ihia te reira te Paraimere. E hina’aro ānei ’oe e haere mai ? »

’Ua hi’o atu Jamesi i tōna mau tuahine. ’Ua taiā ri’i ’oia i te haere atu i te hō’ē piha ha’api’ira’a, ’aita ho’i ’oia i mātau i te hō’ē ta’ata ! E nehenehe paha ïa tōna mau tuahine e haere ato’a mai. Penei a’e e mea ’ārearea roa.

« ’Oia mau », ’ua parau Jamesi.

« E haere ana’e ! » ’Ua ’ana’anatae roa Marama.

’Ua pe’e atu Jamesi ’e tōna mau tuahine na’ina’i i te vahine i roto i te hō’ē piha ha’api’ira’a. E rave rahi tamari’i e pārahi ra i ni’a i te mau pārahira’a na’ina’i, e paraparau ra ’e e ’ata’ata ra. I te pārahira’a mai Jamesi i raro, ’ua ’ata’ata rātou iāna. E mea maita’i roa te mau ta’ata ato’a !

’Ua hīmene rātou i te mau hīmene, ’e ’ua tauturu te tahi mau tamari’i ia Jamesi ’e tōna mau tuahine ’ia ha’api’i mai i te mau parau. I muri iho ’ua fa’ari’i rātou i te hō’ē ha’api’ira’a nō ni’a ia Iesu Mesia. Tē putapū nei Jamesi i te ta’a-’ē-ra’a i’ō nei ’e i tā rātou atu fare purera’a. E ta’a-’ē-ra’a maita’i teie.

E ’utuāfare ’oa’oa i mua i te hō’ē fare purera’a

I te fa’a’otira’a te purera’a, ’ua pa’uma atu te ’utuāfare o Jamesi i roto i te poti nō te ho’i i te fare. ’Ua hi’o fa’ahou Jamesi i te ’apa fa’a’itera’a i rāpae i te fare purera’a. ’O te i’oa o Iesu Mesia tō ni’a iho. E ti’a roa te reira ’o te ’Ēkālesia a Iesu Mesia ! ’Ua hina’aro Jamesi e pe’e ia Iesu.

« E nehenehe ānei tātou e ho’i fa’ahou mai i’ō nei i te hepetoma i muri nei ? » ’Ua ui atu Jamesi.

’Ua ’ata’ata māmā ’e ’o pāpā. « Tē mana’o ato’a nei māua mai te reira », ’ua parau māmā.

« ’Aita atu ai ! » ’Ua pōpō Unaisi.

E mata ’ata’ata tō Jamesi. ’Ua ’ite ’oia ē ’ua ’itehia mai ia rātou te hō’ē mea ta’a ’ē. ’E e hina’aro rahi tōna ’ia ha’api’i rahi mai ā.