Moni i te mātete
I teie nei, e rave pāpū maita’i au i te mea tā tō’u māmā e ani mai, ’ua feruri Anane.
E ’ā’amu mau nō Ghana mai.
E mata ’ata’ata tō Anane ’a haere ai ’oia nā te āroa. ’Ua fa’a’ī te no’ano’a o te i’a farai ’e te paraparaura’a oraora a te ta’ata i te mātete. Tē haere rā ’oia i te fare o tōna metua tāne feti’i. ’Ua hōro’a māmā i te moni ia Anane nō te hōro’a i tōna metua tāne feti’i.
’Ua hi’o haere ’oia ’ati a’e iāna i te mau pa’epa’e ato’a e ho’o ra i te mau mā’a hotu, te mā’a ’īna’i ’e te tahi atu mau tauiha’a. ’Ua haru tōna mata i muri iho i ni’a i te hō’ē ’ohipa.
Tē vai ra hō’ē pa’epa’e nō te mā’a ’īna’i e ho’o ra e piti o tāna mā’a monamona au roa a’e, te tihota pa’apa’a ’e te faraoa monamona. ’Ua hi’o ’oia i te moni tā māmā i hōro’a iāna. Hō’ē hānere cedis e mea rahi roa, ’ua mana’o ’oia. E 10 noa cedis te ho’o o tāna mā’a monamona au roa a’e. E’ita paha te metua tāne feti’i e ’ite ē, ’ua mo’e te tahi.
’Ua ho’o mai Anane i te mau mā’a monamona. ’Ua tu’u ’oia hō’ē tihota pa’apa’a i roto i tōna vaha ’e ’ua tāmau ā i te haere i te fare o te metua tāne fēti’i.
Tē ti’a ra te metua tāne fēti’i i mua i tōna fare ’a haere mai ai Anane.
« ’A hi’o na e ’ere ’o Anane iti terā ! ’A haere mai », ’ua parau tonton. « E aha tā ’oe e haere mai ra ? »
« Tē ’āfa’i mai nei au i te moni tā tō’u māmā i hōro’a mai ». ’Ua hōro’a atu Anane i te moni iāna ra, ’e ’ua patia atu i tōna nā rima i roto i tōna pūtē. E ’ite ānei tonton ē, ’ua mo’e te tahi moni ? ’Ua hi’o atu ’oia ia tonton i te tai’ora’a i te reira.
« Māuruuru roa nō tō ’oe ’āfa’ira’a mai i te reira », ’ua parau tonton.
’Ua ’oa’oa roa Anane i te ’orera’a te metua tāne fēti’i i ’ite i te moni i mo’e. ’Ua parau atu ’oia ’a parahi ’e ’ua ha’amata i tōna ho’ira’a roa i te fare. I ni’a i te purumū, ’ua pau iāna i te ’amu i te tihota pa’apa’a ’e te mau faraoa monamona.
« Mai te aha te huru i tō ’oe haerera’a i te fare o tonton ? » ’Ua ui atu māmā i te ho’ira’a mai Anane i te fare.
’Ua fa’ateitei ’oia i te tapono. « Mea maita’i roa ».
« Māuruuru i te ’āfa’ira’a atu i teie moni iāna ra nō’u », ’ua parau māmā.
’Ua hi’o a’era Anane i raro. ’Ua ha’amata a’era ’oia i te fa’ahapa iāna iho. ’E mai te peu e ’ite mai tōna nā metua ’ua ha’amāu’a ’oia i te tahi tuha’a o te moni ? ’Aita ’oia e hina’aro ’ia ’ore tō rāua ti’aturira’a iāna.
I te po’ipo’i a’e, ’ua ani atu māmā ia Anane ’ia ho’o mai i te tahi ’ohipa i te hō’ē fare toa fātata mai. « ’A ho’i ’āfaro mai i te fare i muri a’e i tō ’oe ho’ora’a mai i te reira i te fare toa, pāpū maita’i ? »
« Nā reira ». ’Ua haere atu Anane nā roto i te mātete, ’aita rā ’oia i fa’aea nō te ho’o mai i te tahi mea. ’Ua fa’atu’atu’a ’oia i te mata ’e ’ua feruri, i teie nei, e rave pāpū maita’i au i te mea tā tō’u māmā i ani mai.
I te otira’a tāna ’ohipa i fa’auehia, ’ua ho’i ’āfaro atu ’oia i te fare. ’Ua hōro’a atu ’oia ia māmā i te tā’āto’ara’a o te moni i toe mai.
I te reira sābati, ’ua haere atu Anane i tāna piha Paraimere. « ’Ia ora na ! », ’ua parau tōna ’orometua ha’api’i. « I teie mahana, e ’āparau tātou nō ni’a i te ha’apa’o maita’i. E mea faufa’a roa ’ia fa’aro’o tātou i tō tātou nā metua ’e ’ia rave i te mau mā’itira’a maita’i ».
’Ua feruri Anane i te moni tāna i ha’amau’a nō te tihota pa’apa’a ’e te faraoa monanona. ’Ua ’ite mai ’oia i tōna ’ōuma i te vīra’a. ’Ua ’ite ’oia ’ua rave ’oia i te hō’ē mā’itira’a ’ino.
I muri a’e i te purera’a, ’ua hina’aro Anane e paraparau i tōna nā metua. ’Ua tupa’i pūai tōna māfatu.
« Māmā, pāpā ? Tē ha’amana’o ra ’oe i te moni tā ’oe i hōro’a mai iā’u nō te ’āfa’i ia tonton ra ? » ’Ua ui atu Anane. « Nō reira, ’ua ho’o mai au i te tahi mā’a monamona i te tahi tuha’a o te reira ». ’Ua hi’o Anane i raro. « Tē tātarahapa nei au ».
« Māuruuru nō tō ’oe ha’avare-’ore-ra’a », ’ua parau pāpā. Tē fa’ahiahia nei au ia ’oe ».
’Ua ’ata’ata Anane. ’Ua ’oa’oa roa ’oia i te paraura’a i te parau mau. ’E ’ua ’ite ’oia i te au maita’i i roto iāna i muri a’e i tōna fa’a’itera’a i tōna nā metua. ’Ua rave a’ena ’oia i te hō’ē mā’itira’a maita’i
Fa’ahōho’ara’a nā Aleksandar Zolotic