Dali, Sunod Kanako nga mga Kalihokan

Ang Dios nagtawag og mga bishop ug mga presidente sa branch aron motabang og pagserbisyo sa mga tawo sa ilang mga ward o mga branch (tan-awa sa Doktrina ug mga Pakigsaad 72:2). Paggunting og papel nga mga kasingkasing ug sulati sa mga butang nga ganahan ninyo mahitungod sa inyong bishop o presidente sa branch. Ipapilit ang mga kasingkasing sa pultahan sa ilang opisina o sa panimalay.

Sa umaabot nga adlaw kita makapuyo sa celestial nga gingharian kauban sa Langitnong Amahan, ni Jesukristo, ug sa atong mga pamilya (tan-awa sa Doktrina ug mga Pakigsaad 76:62, 70, 92). Ang mga kasulatan mitandi sa celestial nga gingharian ngadto sa adlaw. Paggamit og plato nga papel o piraso sa papel aron maghimo og adlaw. Paggunting og papel nga mga trayanggulo alang sa mga silaw sa adlaw ug paggamit og glue o tape aron ipapilit kini sa lingin. Paghisgot kon unsa ang inyong mabuhat karon aron makapangandam sa pagpuyo uban sa Langitnong Amahan ug ni Jesukristo sa umaabot.

Ubos sa direksiyon sa Dios, si Jesukristo milalang sa matag nilalang sa yuta (tan-awa sa Doktrina ug mga Pakigsaad 77:2.). Pagdula og pagtag-an sa mga hayop! Usa ka tawo ang magpakaaron-ingnon nga usa ka hayop. Ang tanan mosulay sa pagtag-an unsa sila nga hayop. Sa higayon nga sakto ang inyong tag-an, pagsulti og usa ka butang nga ganahan nimo mahitungod niana nga hayop.

Ang Langitnong Amahan kanunay nga makadungog sa atong mga pag-ampo (tan-awa sa Doktrina ug mga Pakigsaad 81:3). Kauban sa inyong pamilya, kantaha ang “Ampo sa Usa ka Bata” (Songbook sa mga Bata, 6). Sugdi ang awit sa usa lang ka tawo. Dayon sa hinay-hinay paapila ang tanan. Human kamo mokanta, paghisgot mahitungod sa mga butang nga inyong ikaampo isip usa ka pamilya.